MARKUS 12:37 - WUKE SUSI WATTI'U AL᷊AL᷊USASSA

³⁷ Nariaddi amungkangngu i Daud mannagon Ratum Punnu Sal᷊amatta udde ‘Mawu’, ereapa wotongnge i tou papapulunni Daud?” Taumata nambo apan su Wal᷊e Mawu udde mal᷊uassa naungnge madaringikka Mawu Yesus mangngaṛṛa'a.

MARKUS 12:37 Referans Kwoze

SONDAPPA 22:16

“I Ya'u, Mawu Yesus, suete nandolokku malaeka-U si yamiu tadea'u i tou mamasingkatu manga olangnge indi su manga jamaatta. I Ya'u indi papapulunni Daud; ete i Ya'u aṛṛusuallo apan masemakka udde.”

YAKOBUS 2:5

Paanaunge, manga tuṛṛangnga apan arangnguanna! Taumata asiangnga su runia indi, nipilen Duata maola'a taumata ala sulal᷊ummu pangangimanna. Manga taumata udde sarun maola'a reengannu al᷊aṛṛana'u Ruata ere suete nipa'iren Duata su taumata apan mandangngu si Tou.

1 TIMOTIUS 3:16

Taweddu saran sangkatou wotongnge massinaada, aroddi ahewalle addapingu agaman kite: I tou namasilon batanganne sulal᷊ummu lihiddu taumata, wuṛṛu niapaal᷊iatta'u Ghaṛṛahon Duata, see aellehannu manga mala'ekatta. Wattinge niapararingikka su wallatu manga walahanna, wuṛṛu i Tou apangimananna su ahewallu runia wuṛṛu niapaasengkenga su surga.

ROMA 9:5

Ete i mangitou udde papapulunna wuassu iupungngu al᷊amonan kite. Kristus su olangnge ere sangkatou taumata wuassu walahanni mangitou. I Tou lembon atanggaṛṛanne wuassu sarangkanambone. Paddalote Ruata sarangkal᷊o'engnge! Amin.

YOHANES 12:9

Manambo taumatan Yahudi naaringikka manungku Mawu Yesus poi su Betania, nariaddi i mangitou inaite lai poiaroddi. I mangitou inai tawe tumba'u ana waugu Mawu Yesus. Arawe ana waugu i mangitou lai maapulu ma'ellega si Lazarus apan suete niapaawiakki Tou wuassu papate.

LUKAS 21:38

Suapan rua'allo, manga taumata rudanta su Wal᷊e Mawu madaringikka Mawu Yesus mangngaṛṛa'a.

LUKAS 19:48

arawe tawe maasomba lal᷊anne ipa'ola'a olangnge udde, ana waugu manga taumata sidutu uararingikka si Tou, wuṛṛu mal᷊uassa madaringikka wisara-Ne.

MATIUS 21:46

Nariaddi i mangitou mangke mappandumma manametta si Tou. Arawe i mangitou matta'uttu taumata nambo, ana waugu taumata nambo udde ma'ellega manungku Mawu Yesus ere sangkatou nabi.

MATIUS 11:25

Su tempo udde Mawu Yesus u'al᷊iomanna, “Iamangnga Mawu apan uataṛṛino langitta wuṛṛu runia! I Ya'u ma'adiangkamanna Si'o ana waugu sarangkanambone udde niadapping-Ngu wuassu manga taumata apan pande wuṛṛu pia asingkanne, arawe I'o mannualaga su manga taumata apan tawe si'ol᷊ane.

MATIUS 11:5

Taumata wuta naasilo, taumata lome naa'amatta, taumata raddangnge paro napia, taumata wengella naaringikka, taumata nate nabbiakka apia, wuṛṛu Watti'u Al᷊al᷊uassa wuassu Ruata niapasingkatta su manga taumata asiangnga.

MATIUS 1:23

“Sangkatou maṛṛuala sarun mangilloṛṛo wuṛṛu mangunsiwen sangkatou ana'a esakka. Ana'a udde sarun isaggo aranne Imanuel.” (Imanuel eteudde wisaran Ibrani atappasanne, “Ruata su sampunna ringanni ite”.)

MATIUS 21:45

Su tempo manga imam tembonanne wuṛṛu manga taumatan Farisi naaringikka sasumandingngu Mawu Yesus udde, i mangitou naasingkatta manungku Mawu Yesus mabbatti'i mangitou.