MAL᷊AṚṚUUNGNGA 10:16 - WUKE SUSI WATTI'U AL᷊AL᷊USASSA

¹⁶ Wua'udde anambon paal᷊uanna sassubbanna nirammete si mangitou, ana see nassubbate Ruata. Ne Ruata nompo'a naung-Nge naasilo si mangitou sulal᷊ummu asasusa.

MAL᷊AṚṚUUNGNGA 10:16 Referans Kwoze

YESAYA 63:9

i Tou sassane niaṛṛiaannu asasusa mangitou, Mawu tawe nandolokku daroloṛṛanna ara'e maṛṛinu; Ete i Tou sassane namallossi mangitou ana waugu darangngu wuṛṛu tatal᷊antum-Me. I Tou sidutu mammadul᷊i si mangitou ro'en al᷊amonane.

HOSEA 11:8

Mawu nabbisara, “Ei Israel, tawe mariaddi i'o Ta'u iwala ara'e Ta'u itantangnga. Wotongngewe i'o Ta'u ṛimunsaanna ere Adma? Ara'e Ta'u olaanna ere Zeboim? Tawe maola'a naung-Ku mapaammattu olangnge udde, ana waugu darangngu-U tumaniten bahewalla si yamiu!

YEREMIA 31:20

Israel, i'o ana'a arangnguang-Ku, ana'a iaakkanna, tatuno naung-Ku. Suapawe i Ya'u mamakkamma si'o i Ya'u sidutu uanaungnga si'o ringannu ṛintulu. I'o sarun Ta'u olaanna ringannu ahewallu tatal᷊antuppa.

TAHIUL᷊E 32:36

Mawu sarun manal᷊amatta al᷊aṛṛanang-Nge wuṛṛu umakkannu manga allang-Nge, napawe i Tou maasilo i mangitou lomete wuṛṛu niasueanten atatohassa.

IBRANI 4:15

Imam Bahewalli ite udde wal᷊inewe imam apan tawe maapendama manga al᷊allomeng kite. Arawe i Tou suete niwono'anna sulal᷊ummu al᷊awo'u inolaanna, ere i ite lai sassane; tumba'u i Tou tawe na'ola'a rosa!

IBRANI 3:10

Ana waugu udde i Ya'u nasa'u si mangitou wuṛṛu i Ya'u nabbisara, ‘I mangitou sidutu maddiri tumuṛṛutta wuṛṛu tawe tumuṛṛutta manga parenta-U.’

EFESUS 4:32

Arawe ṛinone naungngi yamiu waresi wuṛṛu uaa'akkana sangkatou ringannu waine, wuṛṛu uaaonggolu ampunga ere lai Ruata nangampunga si yamiu sulal᷊ummi Kristus.

LUKAS 19:41

Su tempo Mawu Yesus maraniten Yerusalem, wuṛṛu naasilote soa udde, i Tou nilumuain Yerusalem.

LUKAS 15:20

Ne i tou inaite napul᷊e ringannu iamangnge. Ta'e marau wuassu wal᷊e, i tou niasiloanten iamangnge. Ringannu aakkanna iamangnge tinumal᷊angnga naisasomban tou, see naṛṛa'uppa wuṛṛu nangari'a si tou.

HOSEA 14:8

I mangitou sarum mabbelengnga ringang-Ku wuṛṛu matana'a sulal᷊ummu lal᷊u'arang-Ku. Ringannu mal᷊ihakka i mangitou sarun aatambanna lal᷊umanangnge, naal᷊ihidda gandumma apan tinumuwo su wawail᷊anna apan masuwukka wuṛṛu naal᷊ihidda wawail᷊annu anggore. Naal᷊ihidda ua'en anggore Libanon aranni mangitou tinumelengnga.

2 TAWARIKH 33:15

I tou nandammen manga paal᷊uannu mongannu walahanna waine see lai manga paal᷊uanna apan buatte niaddone su Wal᷊en Mawu. I tou nanggohakku manga mezbah pasasubbanna su wuiddu Wal᷊en Mawu, wuṛṛu su manga tampa waine su Yerusalem. Sarangkanambone udde niapidde watukku liuddu soa ana see niramme.

2 TAWARIKH 15:8

Napawe i Asa naaringikka wisaran Azarya ana'i Oded udde, naungnge natohasse apia. I tou nangingkattu anambon paal᷊uanna su wanuan Yehuda wuṛṛu Benyamin, wuṛṛu manga soa apan buatte niwaddone su panenteannu Efraim, ana see i tou nangapia mezbah Mawu apan uaraddo su rallakku Wal᷊en Mawu.

2 TAWARIKH 7:14

ana see al᷊aṛana-U apan nappaattu arang-Ku udde sumallungngu watanganne, wuṛṛu umal᷊iomanna ana see rumanta ringang-Ku wuṛṛu manatangngu inolaanni mangitou apan lal᷊eo, ne wuassu surga i Ya'u sarun maddaringikka aal᷊iomanni mangitou. I Ya'u sarun mangampungnga manga rosan mangitou wuṛṛu ma'ola'a wanuam mangitou su lal᷊umana'a apia.

YOSUA 24:23

“Amungkangngu aroddi, paaraua'a manga mawun walahanna waine apan sasahipunanni yamiu udde,” unni Yosua, “wuṛṛu pa'diandite manungku i yamiu sidutu tuttuṛutta Mawu, Mawu Ruatan Israel.”

PANDARIADDI 6:6

I Tou sinumassilla buatte nandiaddi si mangitou wuṛṛu napaatana'i mangitou su runia. I Tou tumaniten sinumassilla,

YOHANES 11:34

Ne i Tou naiwal᷊ote si mangitou, “Suapa i yamiu nallabingngi tou?” “Wette pa'ellega, Mawu,” sasimbakki mangitou.

1 SAMUEL 7:3

Ana see i Samuel nabbisarate walahannu Israel, “Amungkangu i yamiu mabelengnga ringannu Mawu wuṛṛu massubba si Tou ringannu ahewallu naungngu, ṛinone i yamiu mandammen anambon monganna wakku, wuṛṛu paal᷊uanni Dewi Asytoret. Tantil᷊a'e watangannu sarangkanambone udde su Mawu wuṛṛu tumba'u pattaṛṛamawu si Tou sassane, ne i yamiu sarun ipallossu Mawu wuassu taṛṛinon taumatan Filistin.”

1 SAMUEL 12:10

Wua'udde i mangitou niumal᷊iomanna su Mawu wuṛṛu nanga'u rosan mangitou; wisarane, ‘Yami narosate ana waugu tinumal᷊iudda Si'o, oh Mawu, wuṛṛu yami lai massubba manga paal᷊uannu Monganni Baal wuṛṛu Asytoret. Arawe, orassa indi, sal᷊amatewe yami wuassu manga seetti yami, ne yami sidutu mattaṛṛamawu Si'o!’

DARALO 73:21

Sutempo i ya'u naapendamma sasassila wuṛṛu naungku naal᷊ihidda niusu'a,

MAL᷊AṚṚUUNGNGA 2:18

Amungkangngu Mawu mangonggolu sangkatou piaṛṛa'a su walahannu Israel, Mawu sidutu ual᷊u'adda piaṛṛa'a udde. Su al᷊o'engngu piaṛṛa'a udde mabbiakka, Mawu sidutu mapal᷊iun mangitou wuassu manga seetti mangitou. I Tou u'akkanni mangitou napawe I Tou maaringikka i mangitou sussal᷊iomanna ana waugu pappateanna ara'e tawe maal᷊ore.

1 SAMUEL 7:4

Nariaddi taumatan Israel nandammen manga paal᷊uannu Monganni Baal wuṛṛu paal᷊uannu Monganni Asytoret, ana tumba'u mattaṛṛamawu su Mawu sassane.

2 MARARATU 13:23

Arawe Mawu marangnge walahan-Ne wuṛṛu nangampunga si mangitou. I Tou maddiri mamalan mangitou pateanna, arawe nangontolla si mangitou, ana waugu pa'aire-Ne si Abraham, si Ishak wuṛṛu si Yakub. Na'oman sara orassa indi i Tou tawe maabul᷊in walahan-Ne.

MIKHA 7:18

Tawe Duata waine ere I'o, oh Mawu, apan nangampungnga rosan umatta apan nipile-Nu apan lambene. Tawe saran mal᷊annu-l᷊annu I'o masa'u; arawe mawal᷊ia, I'o mal᷊uassa mapal᷊iatta'u darangngu-Nu apan tawe pattaal᷊anne udde.