KOLOSE 2:11 - WUKE SUSI WATTI'U AL᷊AL᷊USASSA

¹¹ Ana waugu uaaukka ringanni Kristus, i yamiu suete nisunatta, wal᷊ine ringannu sunatta apan niola'u taumata, ewe'e sunatta apan niola'i Kristus, apan namallosi yamiu wuassu taṛṛinon pallal᷊agu apan marosa.

KOLOSE 2:11 Referans Kwoze

ROMA 2:29

Arawe sangkatou Yahudi apan tutune eteudde taumata apan naungnge naungngu Yahudi; wuṛṛu sunatta apan tutune eteudde sunatta su naungnga apan mammanarannu Ghaṛṛahon Duata, wal᷊inewe niwoṛṛetta sulal᷊ummu wuke. Taumata ereudde, mannengkamma daralo wuassu Ruata, wal᷊ine wuassu taumata.

FILIPI 3:3

Sumbal᷊i ete i ite manga taumata apan suete nanarimmattu sunatta apan tutune, wal᷊inewe i mangitou. I ite massubba Ruata ringannu aehettu Ghaṛṛahon Duata sassane, wuṛṛu i ite maadiangkamanna ana waugu i ite mabbiakka su sambau ringanni Kristus Yesus. I ite tawe uatundeeta su manga inolaanna apan a'olaannu taumata.

EFESUS 4:22

Ana waugu udde tantanga'e pallal᷊agun taumata tabbe ringannu ola'u pabbiaṛṛana tabbe apan tantal᷊anna ihagohakku manga apulun runia apan mangngal᷊iwu.

ROMA 6:6

I ite masingkata manungku pallal᷊agun kite apan tabbe suete nipate su adio'a ringanni Kristus su alu arussa tadea'u taṛṛinon pallal᷊agun kite apan marosa udde niramme; ringannu aroddi i ite tate lai allangngu rosa.

GALATIA 5:24

Manga taumata apan naola'e pussa'an Kristus Yesus, manga taumata udde buatte nanantangngu pallal᷊agun taumata ringannu al᷊awo'u apulu naungnge wuṛṛu pallal᷊agune.

TAHIUL᷊E 30:6

I yamiu wuṛṛu papapulunnu sarun onggol᷊annu naungnga matuṛṛutta, ma'oman sara i yamiu marangngu Mawu Ruatanu ringannu ahewallu naungngu wuṛṛu wotongnge sidutu matana'a su wanua udde.

GALATIA 2:20

Orassa indi wal᷊inewe i ya'u mabbiakka, arawe ete Kristus apan mabbiakka sulal᷊ummu wadangku. Wiakka apan iraṛṛingi'u orassa indi eteudde mabbiakka ipangngimanna Ana'u Ruata apan marangngu si ya'u wuṛṛu buatte nanantillu watangan-Ne ana waugu i ya'u.

2 KORINTUS 5:17

Taumata apan buatte naaukka ringanni Kristus, maola'a taumata wakku atonna-tonna. Apan tabbe nal᷊iute – sarangkanambone naola'e wakku.

IBRANI 9:24

Ana waugu i Kristus tawe sinumutta su Wabbo'a Susi inolaannu taumata, apan tumba'u hambarannu Wabbo'a Susi apan ṛinone. Mawu Yesus sinumutta sassane su surga; poiaroddi orassa indi i Tou uasaruanna Ruata hunane si ite.

TAHIUL᷊E 10:16

Nariaddi manattakka orassa indi yamiu ṛinone matuṛṛutta su Mawu wuṛṛu puanu tate mangattikka lai.

IBRANI 9:11

Arawe i Kristus suete nirumanta ere sangkatou Imam Wahewa wuassu inolaanna apan mapia wuṛṛu piate. Su Rasannu Mawu suapa i Tou mappaamattu manarane ere sangkatou Imam Wahewa eteudde rasanna apan lembon mawantuga wuṛṛu lembon nasuungnga. Udde tawe niola'u taumata; atappasanne wal᷊ine niarantanne wuassu runia apan niriaddi indi.

YEREMIA 4:4

Agasse pa'airenu si Ya'u, Mawunu, wuṛṛu ṛaea'e watangannu tumba'u huna-U, ei tumana'u Yehuda wuṛṛu Yerusalem. Amungkangngu tawe, ne asasa'u-U sarun ṛumopa wuṛṛu manoṛṛobba ere putungnga apan tawe iapaddummu isai-sai. Sarangkanambone udde sarun maṛṛia'a su watangannu ana waugu manga inolaannu apan dal᷊eo.”

2 KORINTUS 5:1

Ana waugu i yami masingkata manungku amungkangngu wal᷊e – eteudde wadangnga – apan atatanaanni ite su runia indi ihohakka, Ruata sarun manaddia wal᷊en kite su surga, apan niola'u Ruata sassane wuṛṛu tawe mahohakka sarangkal᷊o'engnge.

WATTI'U MANGA RASUL 17:24

Ruata apan nandiaddi runia indi wuṛṛu al᷊awo'u lal᷊oṛṛone, ete i Tou Ruatan su langitta wuṛṛu runia. I Tou tawe uatana'a su manga wal᷊em paal᷊uanna apan niola'u taumata.

WATTI'U MANGA RASUL 7:48

Ewe'e Ruata lembon ahewal᷊anne tawe matana'a su wal᷊e apan niola'u taumata; ana waugu su Wuke Nabi uawoṛṛetta arendi,

LUKAS 2:21

Napawe uukke ual᷊ute allo, ana'a udde nissunatte. Wuṛṛu aranne nissagote mangitou Yesus, aranna apan suete nionggolu mala'ekatta si Tou tantal᷊anna i Tou ta'e su illoṛṛon inangnge-Ne.

MARKUS 14:58

“I yami naaringikka taumata indi mabbisara, ‘I Ya'u sarun manggohakku Wal᷊e Ruata indi apan suete niola'u taumata, wuṛṛu napawe tallute allo i Ya'u sarun mapararisikku waine lai, apan wal᷊ine niola'u taumata.’ ”

ROMA 7:24

Ne, aroddite ola'u riri'u: i ya'u tuttuṛṛutta tita Duata ringannu ṛingiṛṛangku, arawe ringannu pallal᷊agu'u ere sangkatou taumata, i ya'u uasuṛṛubawa su rosa. Tumanite nal᷊ongonna i ya'u indi! Isai maapulu manal᷊amatta si ya'u wuassu wadangnga indi apan mangngapi'u su papate? Adiangkamanna su Ruata! I Tou maapulu manal᷊amatta si ya'u sulal᷊ummu Mawu Yesus Kristus.

KOLOSE 3:5

Ana waugu udde, tantanga'e paa'apulun dunia apan maawinasa ririnu, ere sandaga, manga inolaanna apan tawe matataṛṛino, apulu naungnga, tawe masabare, apulu apan lal᷊eo, wuṛṛu awawal᷊iu (ana waugu awawal᷊iu udde nassul᷊ungngu massubba paal᷊uanna).