GALATIA 4:7 - WUKE SUSI WATTI'U AL᷊AL᷊USASSA

⁷ Nariaddi, yamiu wal᷊ine lai allangnga, ewe'e ana'a. Wuṛṛu ana waugu i yamiu ana'u Ruata, ne Ruata sarun mangonggola si yamiu al᷊awo'u sarannapa apan buatte nisaddia-Ne su manga al᷊aṛṛanang-Nge.

GALATIA 4:7 Referans Kwoze

GALATIA 3:29

Amungkangngu i yamiu tatahuanni Kristus ne eteudde i yamiu papapulunni Abraham. Ne i yamiu sarun manengkamma apa apan buatte pina'iren Duata.

GALATIA 3:26

Ana waugu i yamiu mangngimanna si Kristus Yesus, ne i yamiu uaaukka ringanni Tou; wuṛṛu ana waugu udde i yamiu maola'a al᷊aṛṛana'u Ruata.

GALATIA 4:31

Nariaddi, manga tuṛṛangnga, i ite indi wal᷊inewe al᷊aṛṛana'a wuassu sangkatou allangnga wawine; eteudde i ite manga ana'a wuassu wawine apan wal᷊ine allangnga.

DARALO 73:26

Salaiwe niawa'u wadangku mabbal᷊i lome, ete I'o atatoha'u, oh Ruata; Ete I'o wuassu sarangkanambone apan tatahuanangku saran mal᷊annu-l᷊annu.

LAL᷊ALLU 3:24

Mawu uddewe darotongku tutune. Ana waugu udde, i ya'u uaantimma si Tou.

YEREMIA 10:16

Ruatan Yakub wal᷊ine ere manga paal᷊uanna udde; i Tou mandariaddi al᷊awo'a. Aran-Ne eteudde Mawu Apan Lembontaṛṛino; i Tou buatte namile Israel maola'a uman-Ne.

PANDARIADDI 15:1

Wua'udde, i Abram naasomba sondappa wuṛṛu naaringikka Mawu nabbisara si tou, “Arie paata'utta, i Abram, i Ya'u sarun mallu'adda si'o wuassu asasilaka, wuṛṛu mangonggolla si'o lal᷊antakke apan manambo.”

SONDAPPA 21:7

Manga taumata apan naauntunga sarun manengkama manga wawal᷊issu inolaanne udde wuassia-U. I Ya'u sarun maola'a Ruatane, wuṛṛu i tou sarun maola'a ana-U.

YEREMIA 31:33

Eteindi pa'aire wakku apan Ta'u niola'a ringannu umattu Israel: Manga tita-U sarun Ta'u iaddo sulal᷊ummu naungngi mangitou, wuṛṛu Ta'u iwoṛṛetta sulal᷊ummu ate mangitou. I Ya'u sarun maola'a Ruatan mangitou, wuṛṛu i mangitou sarun maola'a uma-U.

DARALO 16:5

Mawu, tumba'u I'o tatahuanangku; I'o nangonggolu sarangkanambone apan pappandumangku, wia'u tumba'u sulal᷊ummu lima-Nu.

MATIUS 6:24

“Tawe saran sangkatou taumata maamanara su ruang katou mawu. Ana waugu i tou sarun lembo marangngu sangkatou wuassu sangkatou apan baine. Ara'e i tou lembo matuṛṛutta su mawune apan sambau wuassu mawune apan baine. Aroddi lai matataṛṛino si yamiu. I yamiu tawe maappammanara manara su Ruata wuṛṛu su darotongnga lai.