EFESUS 6:11 - WUKE SUSI WATTI'U AL᷊AL᷊USASSA

¹¹ Paata'e al᷊awo'u peddetu pangalo apan nionggolu Ruata si'o, tadea'u i yamiu wotongnge mando'appa apapande apan lal᷊eo wuassu Setanna.

EFESUS 6:11 Referans Kwoze

2 KORINTUS 10:4

Manga ahidda apan ipappaatti yami sulal᷊ummu manaran kami wal᷊inewe ahidda wuassu runia indi, arawe ahidda wuassu Ruata uataṛṛino. Ringannu manga ahidda udde i yami maṛṛimunsa'a manga tampa mangitou; i yami manniko'u manga patatatiakka

ROMA 13:12

Ṛabbi maranite mal᷊iudda; wuṛṛu ete lai adio'a allote. Nariaddi mappianne i ite mangillol᷊o ma'ola'a inolaanna apan marandumma. I ite ṛinone mapaasuungngu watanganni ite ringannu ahiddu asasemakka.

1 TESALONIKA 5:8

Arawe i ite indi manga taumata apan nasutta su allo apan masemakka; ana waugu ṛingiṛṛanni ite ṛinone masemakka. I ite ṛinone sidutu mangngimanna Mawu wuṛṛu mandangngu manga taumata waine wuṛṛu mangngantimma ringannu atonna manungku Ruata sarun manal᷊amatta si ite. Eteudde ahidda apan ual᷊indumma si ite sulal᷊ummu manara lumawangnga araranduma.

EFESUS 6:13

Ana waugu udde, orassa indi, luṛṛea'e al᷊awo'u peddetu pangalon Duata, tadea'u su allo apan lal᷊eo udde, i yamiu wotongnge lumawangnga lal᷊aṛṛagu seetta. Wuṛṛu tadea'u napawe i yamiu mammangalo saran pangudusanne, i yamiu ta'e matohassa.

1 PETRUS 5:8

Ṛinone i yamiu paatehamma wuṛṛu paariagga! Ana waugu Setanna udde seetti yamiu. I tou ere singa u'amatta mammal᷊intadu runia lapiddu mannuntingikka maddea'a pabbawiakke.

2 KORINTUS 2:11

I ya'u na'ola'a udde tadea'u Setanna tawe maapanganu tempone ipamarenta si ite, ana waugu i ite masingkatu manga pandumanne.

EFESUS 4:14

Ne i ite tate maola'a lai al᷊aṛṛana'a apan nial᷊iwune, wuṛṛu iaapiddu al᷊awo'u hatin al᷊aṛṛa'u manga taumata apan taṛṛa awusu. I mangitou mangngal᷊iwun taumata ringannu wawahian mangitou.

KOLOSE 3:10

I yamiu orassa indi suete nionggol᷊annu wiakka wakku. I yamiu taumatate wakku, apan sidutu lallimbakuannu mandiriaddine eteudde Ruata, tumuṛṛuttu pahudde sassane. Pandumanne eteudde tadea'u i yamiu maaillal᷊a Ruata ringannu mapia-pia.

ROMA 13:14

Wala'e Mawu Yesus Kristus mangatokku apa apan sarun olaanna. Wuṛṛu imbaṛṛangnga tumuṛṛutta pallal᷊agun taumata marosa ipamatu'a apulun naungnga.

2 KORINTUS 11:3

Arawe i ya'u sussinggawangnga ṛingiṛṛannu, sarun awono'anna tawe tumuṛṛutta si Kristus, ere Hawa paarorone lai inawono'annu atoanna.

2 KORINTUS 6:7

wuṛṛu ringannu mabbatti'a watti'u Ruata wuṛṛu ringannu taṛṛinon Duata, i yami mapaal᷊iatta'a manungku i yami indi allangngu Ruata. I yami uaagassa apulu Ruata maola'a ahiddi ami ipamangalo ara'e ipannohassa wadangngi yami.

SONDAPPA 2:24

Arawe i yamiu waine su Tiatira apan maddiri tumuṛṛutta al᷊aṛṛa'a lal᷊eo udde, wuṛṛu maddiri mangurumma al᷊aṛṛa'u Setanna. I Ya'u mabbisara manungku i Ya'u tawe manamba winabbawanu apan mawakkata.

EFESUS 4:24

Ṛinone i yamiu mabbiakka ere taumata wakku apan niola'a uatuṛṛutu apulu naungngu Ruata; eteudde ringannu pallal᷊agu apan atonna, matul᷊idda wuṛṛu susi.

IBRANI 7:25

Ana waugu udde saran mal᷊annu-l᷊annu Mawu Yesus wotongnge manal᷊amatta manga taumata apan nirumanta ringannu Ruata sulal᷊ummi Tou, ana waugu i Tou mabbiakka saran mal᷊annu-l᷊annu ipangapiddu sasal᷊ande su Ruata, hunane su manga taumata udde.

YUDAS 1:24

Ruata, apan wotongnge mallu'adda si yamiu ana see tawe manawo, wuṛṛu wotongnge mangapiddu su araratuan-Ne apan mawantuga ringannu al᷊al᷊uassa apan tawe urangnge,

2 KORINTUS 4:4

Monganna lal᷊eo apan uaparenta runia indi nakkapingnga ṛingirannu manga taumata apan tawe mangimanna udde. Monganna apan sidutu mannal᷊are si mangitou tadea'u i mangitou tawe maasilo semakka wuassu Watti'u Al᷊al᷊uassa udde, su ola'u awawantugi Kristus, apan naola'a lihiddu Ruata.

1 KORINTUS 10:13

Al᷊awo'u wawono'a apan niasombanganni yamiu, eteudde wawono'a apan masokkate niapendamannu taumata. Arawe Ruata sidutu uaaggasa paaire-Ne. I tou maddiri mamalanu wono'anna nangillembo wuassu pangangimanni yamiu. Su tempo i yamiu nia'omannu wawono'a, i Tou sarun mamantingiddu lal᷊anna si yamiu tadea'u maola'a matohassa wuṛṛu i yamiu wotongnge maataṛṛangnga.

MARKUS 13:22

Ana waugu mananal᷊amatta awusu wuṛṛu manga nabi awusu sarun dumanta. I mangitou sarun ma'ola'a al᷊awo'u inolaanna wahahewa wuṛṛu al᷊awo'u al᷊aṛṛindu'a ipangawusu al᷊aṛṛana'u Ruata amungkangngu wotongnge.

SONDAPPA 12:9

Naga apan bahewalla udde niramme su liudde! Ete i tou atoanna timmade udde apan aranne Setanna ara'e Ghaṛṛaho Lal᷊eo, apan nangawusu ahewallu runia. I tou niramme su runia su sambau ringannu manga mala'ekanne.

SONDAPPA 19:20

Ne winatangnga udde niasametta suadio'a ringannu nabi awusu apan suete na'ola'a manga al᷊aṛṛindu'a su saruannu winatangnga udde. (Ringannu manga al᷊aṛṛindu'a uddewe winatangnga udde nangawusu manga taumata apan uatahuanna tatialam binatangnga udde, wuṛṛu manga taumata apan massubba paal᷊uannu winatangnga udde.) See winatangnga udde wuṛṛu nabi awusu udde niramme ta'e wiakka sulal᷊ummu tahal᷊oangngu putungnga apan lukkenggama ringannu belerangnga.

YAKOBUS 4:7

Ana waugu udde, paatuṛṛutte Ruata wuṛṛu ro'apete Setanna, ne Setanna sarun tumal᷊angnga wuassi yamiu.

MAL᷊AṚṚUUNGNGA 3:2

Mawu na'ola'a udde tumba'u ringannu pandumma ipanantiro al᷊awo'u taumatan Israel mapapangalo, nipangillembote lai si mangitou apan tawe naatemma napapangalo.

NEHEMIA 4:13

Ana waugu udde i ya'u nattahia hal᷊ele, sambeangnga wuṛṛu anaanna su tumana'a, ana see i mangitou ta'u nitahia tumuṛṛuttu ṛuanganne sambau-sambau su liuddu darandungnga, su manga tampa apan taambe nasue niola'a.