EFESUS 2:10 - WUKE SUSI WATTI'U AL᷊AL᷊USASSA

¹⁰ Ete i ite indi riadiannu Ruata, wuṛṛu wuassi Kristus Yesus, Ruata na'ola'a si ite, tadea'u i ite mammanara manga inolaanna apan mapia apan buatte nissaddian Tou si ite.

EFESUS 2:10 Referans Kwoze

FILIPI 2:13

ana waugu Ruata sassane apan mammanara sulal᷊ummu ririnu ipa'ola'a si yamiu mawala wuṛṛu wotongnge maal᷊uassa naungngu Ruata.

KOLOSE 1:10

Ringannu aroddi yamiu wotongnge mabbiakka tuttuṛṛuta apulun Duata, wuṛṛu sidutu malluassa naugnge, na'oman sara sulal᷊ummu al᷊awo'u inolaanna i yamiu wotongnge mamasilo manga inolaanna apan mapia. Wuṛṛu asingkati yamiu su ola'u Ruata sarun aatambanna lai.

IBRANI 13:21

Antimanna Ruata punnu paddarame udde manuungngi yamiu ringannu al᷊awo'u apapia apan pappandumanni yamiu ipa'ola'a apulu-Ne. Antimanna ringannu tatangngannu Mawu Yesus i Kristus, Ruata mammanara sulal᷊ummu naungngi ite, apa apan ipaapulu-Ne. Ṛinone Kristus raloanna saran mal᷊annu-l᷊annu! Amin.

2 KORINTUS 5:17

Taumata apan buatte naaukka ringanni Kristus, maola'a taumata wakku atonna-tonna. Apan tabbe nal᷊iute – sarangkanambone naola'e wakku.

2 KORINTUS 9:8

Ruata uataṛṛino mangonggola si yamiu al᷊amatta apan manambo-nambo, tadea'u i yamiu sidutu uatahuanna apa apan ipaapulun kamiu; wuṛṛu i yamiu lai sarun pia lebbene ipa'ola'a apapia wuṛṛu pasasumbala su taumata waine.

EFESUS 4:24

Ṛinone i yamiu mabbiakka ere taumata wakku apan niola'a uatuṛṛutu apulu naungngu Ruata; eteudde ringannu pallal᷊agu apan atonna, matul᷊idda wuṛṛu susi.

FILIPI 1:6

Ruata sassane apan nanattakku manara apan mapia udde si yamiu, wuṛṛu i ya'u mangantimma i Tou sarun manassu manara udde ma'oman sara masue su allo Kristus Yesus rumanta apia.

2 TIMOTIUS 3:17

Ringannu Wuke Susi udde taumata apan mangngimbe Ruata wotongnge peddetannu asasuungnga su al᷊awo'u manara apan mapia.

EFESUS 4:1

Ana waugu udde i ya'u – sangkatou taumatan ṛuumanna, apan nitaṛṛanganna ana waugu mangngimbe Mawu – sussal᷊ande si yamiu: pabbiakke uasulungngu ere io sangkatou taumata apan suete niwagoannu Ruata.

2 TIMOTIUS 2:21

Taumata apan mammaresi watanganne wuassu anambon al᷊al᷊eo, taumata udde sarun ipaatta su pandumma apan apianne. I tou maola'a pussa'a apianne wuṛṛu mahuna su mawune. I tou sasaddianna ipaatta su al᷊awo'u manara apan mapia.

DARALO 100:3

Paanaungete manungku Mawu uddewe Ruata. I Tou nandiaddi si ite wuṛṛu i ite tatahuanan-Ne; i ite al᷊aṛanang-Nge, walahanna apan papadul᷊ianan-Ne.

TITUS 2:14

I Tou suete nanantillu watangan-Ne ana waugu i ite wuṛṛu ana waugu mamallosi ite wuassu al᷊awo'u al᷊al᷊eo, wuṛṛu na'ola'a si ite sambau walahanna apan nal᷊iu wuassu al᷊awo'u rosa wuṛṛu tumba'u naola'a pussa'a-Ne sassane, wuṛṛu maṛṛimadda ma'ola'a apapia.

YESAYA 43:21

Ete i mangitou walahanna apan Ta'u niola'a wuassu watangang-Ku, tadea'u wotongnge magion daralo si Ya'u.”

EFESUS 1:4

Tantal᷊anna runia indi taambe nariaddi, Ruata buatte namile si ite sulal᷊ummi Yesus Kristus ringannu pandumanna tadea'u i ite maola'a pussa'a-Ne sassane wuṛṛu tawe sal᷊ane su saruan-Ne. Ana waugu darangngun Duata,

1 TIMOTIUS 6:18

Paddorongke si mangitou mapaal᷊iatta'u apapia, ringannu ma'ola'a al᷊awo'u inolaanna apan mapia, masaṛṛionto'a, wuṛṛu laghune mapia.

TITUS 3:14

Manga taumatan kite ṛinone mangurumma al᷊aṛṛa'a, ma'ola'a inolaanna apan mapia tadea'u wotongnge mapaasuungngu sarannapa apan ipaapulune; arie ma'oman sara i mangitou mabbiakka tawe gunane.

IBRANI 10:24

Wuṛṛu ṛinone i ite ua'aellega sandingananna, tadea'u i ite wotongnge uasasasa mandangngu sansul᷊ungnga wuṛṛu ma'ola'a manga inolaanna apan mapia.

TITUS 3:8

Wisara indi atonna-tonna. I ya'u maapulu i'o mangaṛṛa'u olangnge indi, tadea'u manga taumata apan mangngimanna Ruata atonna-tonna maddea'a ma'ola'a manga manara apan mapia wuṛṛu mahuna su anambon taumata.

KOLOSE 3:10

I yamiu orassa indi suete nionggol᷊annu wiakka wakku. I yamiu taumatate wakku, apan sidutu lallimbakuannu mandiriaddine eteudde Ruata, tumuṛṛuttu pahudde sassane. Pandumanne eteudde tadea'u i yamiu maaillal᷊a Ruata ringannu mapia-pia.

TITUS 2:7

Su al᷊awo'u inolaanna ṛinone i'o maola'a tul᷊adan pallal᷊agu apan mapia. Amungkangu i'o mangaṛṛa'a, ṛinone i'o tawe mamahia wuṛṛu atonna-tonna.

1 KORINTUS 3:9

Ete i yami udde manga taumata apan mammanara suadio'a manaran Duata; wuṛṛu eteudde i yamiu waillu Ruata. Manga tuṛṛangnga naola'a lai Wal᷊e Ruata.

1 PETRUS 2:12

Pallal᷊agunu su wallatu taumata apan tawe maaillal᷊a Mawu ṛinone lembon mapia, na'oman sara napawe i mangitou mangngadio'a si yamiu ere taumata lal᷊eo, i mangitou lai sarun manga'u inolaannu apan mapia na'oman sara i mangitou sarun maddalo Ruata su allo daranta-Ne.

TITUS 3:1

Paanaunga'a su manga lal᷊oṛṛon jamaatta tadea'u i mangitou matuṛṛuta manga piaṛṛange wuṛṛu tembonannu araratuanna, see matuṛṛuta wuṛṛu maapulu ma'ola'a manga inolaanna apan mapia.

1 YOHANES 2:6

Isai-sai nabbisara manungku i tou mabbiakka uaaukka ringannu Ruata, i tou ṛinone mabbiakka manantuṛṛutta lempangi Kristus.

DARALO 138:8

I'o sarun manipussa paaire-Nu si ya'u; ariewe mangillol᷊o mangaṛa'a al᷊aṛṛanang-Ngu.

YESAYA 29:23

Ana waugu napawe i yamiu naasilo manga anangngu apan Ta'u nionggolla si'o, ne i yamiu sarun manga'u manungku ete i Ya'u Ruata na'ukkassu Israel. I yamiu sarun mangaddatta si Ya'u wuṛṛu mata'u-U.

MATIUS 5:16

Aroddi lai asasemakku ṛinone lai lumansiangnga su saruannu taumata, tadea'u i mangitou maasilo al᷊awo'u pallal᷊agunu apan mapia, wua'udde padalote Ruata su surga.”

YOHANES 3:21

Arawe taumata apan tuttuṛṛutta apulun Ruata, nirumanta ringannu asasemakka tadea'u lumiatta'a manungku al᷊awo'u inolaanne udde tumuṛṛutta apulun Ruata.

DARALO 51:10

Wala'ewe i ya'u maddaringikka watti'u al᷊al᷊uassa, tadea'u naungnga apan niṛṛimunsang-Ngu indi lumala'a apia.

ROMA 8:29

I mangitou lai suete nipilen Duata, wuṛṛu buatte nitantuna lai wuassu paarorone maola'a massul᷊ungngu Anang-Nge, eteudde Yesus Kristus. Ringannu aroddi Anang-Nge naola'a paarorone su wallattu anambon manga tuṛṛangnga.

WATTI'U MANGA RASUL 9:31

Ne jamaatta su ahewallu Yudea, Galilea, wuṛṛu Samaria nadamete. Ringannu pammamanaran Ghaṛṛahon Ruata, wuṛṛu matta'uttu Mawu, manga jamaatta udde lembo natohassa wuṛṛu a'atambanna anambone.

YEREMIA 31:33

Eteindi pa'aire wakku apan Ta'u niola'a ringannu umattu Israel: Manga tita-U sarun Ta'u iaddo sulal᷊ummu naungngi mangitou, wuṛṛu Ta'u iwoṛṛetta sulal᷊ummu ate mangitou. I Ya'u sarun maola'a Ruatan mangitou, wuṛṛu i mangitou sarun maola'a uma-U.

YESAYA 60:21

Tumana'u soanu mammanara ringannu ṛinone, i mangitou sarun manahuanna wanua saran mal᷊annu-l᷊annu. I mangitou naal᷊ihidda ranna cangkokka apan nisuang-Ku sassane, tadea'u mapal᷊iatta'u awawantu-U.

2 KORINTUS 5:5

Apan mannaddia si ite su olangnge udde, eteudde Ruata sassane, wuṛṛu i Tou nangonggolu Ghaṛṛaho-Ne si ite maola'a sambau wataṛṛu.

YESAYA 44:21

Mawu nabbisara, “Naungete sarangkanambone indi, ei Israel, ana waugu ete i'o allang-Ku. I Ya'u nandiaddi si'o, wuṛṛu i'o allang-Ku, Israel, i Ya'u sarun tawe maabbul᷊inu!

1 TIMOTIUS 5:25

Aroddi lai manga inolaanna mapia lapiddu asiloanna. Wuṛṛu apan masahadda asiloanna, tawe sidutu mangke uawuni.

1 TIMOTIUS 2:10

Arawe ṛinone wawine mallogaka watanganne ringannu manga pallal᷊agu apan mapia su ereapa udde ṛinone olaannu wawine apan massubba Ruata.

TAHIUL᷊E 5:33

Ola'e sarangkanambone apan nititan Mawu Ruatanu si yamiu tadea'u i yamiu su lal᷊umanna'a wuṛṛu sidutu mattatana'a su wanua apan sarun atanaanni yamiu.”

1 TIMOTIUS 5:10

tinumelennga ere sangkatou wawine apan ma'ola'a apapia, ereindi: i tou suete namadul᷊i manga al᷊aṛṛanangnge ringannu mapia, naungnge mal᷊uassa mangimbe raho matana'a su wal᷊ene, mangimbe manga taumata mangngimanna, massumbala manga taumata susa, wuṛṛu mammanara atonna-tonna al᷊awo'u manara apan mapia.

1 YOHANES 1:7

Arawe amungkangu i ite mabbiakka sulal᷊ummu asasemakka ere lai Ruata sulal᷊ummu asasemakka, ne i ite mabbiakka uaaukka atonna, uasangkapia sangkatou ringannu waine, wuṛṛu ṛaṛṛan Mawu Yesus, Anang-Nge, namaresi si ite wuassu al᷊awo'u rosa.

WATTI'U MANGA RASUL 9:36

Su Yope pia sangkatou wawine aranne i Tabita. I tou sangkatou apan mangngimanna Mawu Yesus. (Aranne sulal᷊ummu wisaran Yunani eteudde i Dorkas atappasanne rusa.) Inolaanni tou sidutu mapia wuṛṛu mantul᷊ungngu taumata asiangnga.

YESAYA 61:3

hunan ipangonggollu al᷊al᷊uassa wuṛṛu lal᷊ala'a su taumata apan massusa wuṛṛu lullal᷊o; hunan ipamal᷊u asasusan mangitou maola'a aantarin daralo. I mangitou sarun maola'a ere alu apan nisuannu Mawu sassane. I mangitou sarun pia pallal᷊aghu mapia wuṛṛu naṛṛino, na'oman sara Mawu sarun bantuhanna.

YESAYA 19:25

Mawu Apan Lembontaṛṛino sarun mangal᷊amatta si mangitou wuṛṛu mabbisara, “i Ya'u mangal᷊amatta si yamiu, ei Mesir uma-U, Asyur niriaddi-U, wuṛṛu Israel umatta apan nipile-U.”

DARALO 119:3

Lal᷊umanna'a su taumata apan mabbiakka tuttuṛṛutta apulun Mawu. wuṛṛu tawe ma'ola'a al᷊al᷊eo.

DARALO 81:13

Ana waugu udde i mangitou niwala'u tawe maddaringikka; wala'e i mangitou mappaamattu apulun naungnge sassane.

GALATIA 6:15

Nisunatta ara'e tawe nisunatta udde tawe maola'a hatto. Apianne eteudde maola'a taumata wakku.

ROMA 8:1

Orassa indi tate lai ṛuumanna si mangitou apan mabbiakka su sambau ringannu Mawu Yesus.

TAHIUL᷊E 32:6

Ete aroddi yamiu mabbal᷊issa apapian Mawu, ei manga taumata longonna wuṛṛu tawe ṛingiranne? Wal᷊inewe i Tou Iamangngu, Mandariadinu, apan na'ola'a si yamiu sambau walahanna?

EFESUS 2:2

Su tempo udde yamiu tuttuṛṛuta al᷊awo'u apulun dunia indi; eteudde i yamiu matuṛṛutta su tembonannu winalanganna, eteudde ghaṛṛaho apan marosa indi uaintaṛṛo sulal᷊ummu naungngu manga taumata apan maddiri tumuṛṛutta Ruata.

YESAYA 43:7

Ana waugu i mangitou sarangkanambone buatte niwagoannu ringannu arang-Ku, i mangitou Ta'u niriaddi iapawantuga si Ya'u.”

EFESUS 1:1

Al᷊aṛṛana'u Ruata su Efesus, apan matuṛṛutta Mawu Yesus Kristus!

EFESUS 2:6

Ana waugu i ite uaaukka ringanni Kristus Yesus, Ruata napaawiakki ite apia su sambau ringanni Tou, tadea'u i ite mamarenta lai suadio'a ringanni Tou sulal᷊ummu surga.

EFESUS 2:13

Arawe orassa indi, ana waugu i yamiu suete naaukka ringanni Kristus Yesus, i yamiu apan dorone marau, buatte niapaarani ana waugu papaten Kristus.

EFESUS 2:15

Titan agama Yahudi ringannu manga parenta wuṛṛu manga atoranne buatte nipappasi Kristus tadea'u walahanna darua udde maola'a sambau walahannu taumata wakku, apan uaaukka ringanni Tou. Ringannu olangnge udde Kristus nangapiddu paddarame.