2 TIMOTIUS 4:8 - WUKE SUSI WATTI'U AL᷊AL᷊USASSA

⁸ Wuṛṛu orassa indi lal᷊antaku auntunganna uaraṛṛaddo sia'u. Su Allon Kiamatta, Mawu, Mallaṛṛuungnga apan matul᷊idda udde sarun manantillu lal᷊antake udde si ya'u, ana waugu i ya'u mabbiakka uaaukka ringannu Ruata. Wuṛṛu wal᷊ine tumba'u i ya'u sassane apan manengkamma lal᷊antake udde, arawe lai anambon taumata apan uaraṛṛaddo darantan Mawu ringannu ahewallu naungnga.

2 TIMOTIUS 4:8 Referans Kwoze

YAKOBUS 1:12

Lal᷊umanna'a su taumata apan masabare su tempo i tou naasomba wawono'a. Ana waugu napawe i tou naataṛṛanga wawono'a udde, i tou sarun manengkamma lal᷊antake, eteudde wiakka apan suete pina'iren Duata su manga taumata apan mandangngu Ruata.

SONDAPPA 2:10

Arie matta'uttu asasusa apan tate mal᷊annu lai apendamanni yamiu. Paanaunge, Setanna sarun mantaṛṛon sangkawageanganna wuassi yamiu sulal᷊ummu tuttupanna, ana waugu ipamono'a si yamiu. I yamiu sarun matataṛṛanga mapul᷊o allo al᷊annune. Ṛinone i yamiu matuṛṛuta si Ya'u ma'oman sara mate, ne i Ya'u sarun mangonggola si yamiu wiakka tutune wuṛṛu saran mal᷊annu-l᷊annu apan maola'a sambau lal᷊antaku naauntunga.

1 PETRUS 5:4

Wuṛṛu su tempo Mallal᷊u'adda Mawantuga udde rumanta apia, i yamiu sarun manengkamma mahkota apan mal᷊endapa wuṛṛu tawe mawulle sal᷊endamme.

1 PETRUS 1:4

I ite mangngantimma maatahuanna manga al᷊amatta apan suete nisaddian Duata su al᷊aṛṛanang-Nge, eteudde manga al᷊amatta apan niadone su surga, na'oman sara tawe mal᷊al᷊eo, ara'e mawukku'a ara'e mawulle.

2 TIMOTIUS 1:12

Ana waugu udde i ya'u natataṛṛangu sarangkanambone indi, arawe i ya'u sidutu mangngimanna, ana waugu i ya'u masingkata atonna, isai apan pangimanangku. I ya'u mangantimma manungku apa apan suete nitantilli Tou si ya'u, i Tou lai wotongnge maariaga udde saran Allon Kiamatta.

1 KORINTUS 9:25

Suapan taumata apan sulal᷊ummu latihanna, uatataṛṛanga al᷊awo'u apulu. I tou na'ola'a udde ana waugu i tou maapulu eleannu wunga tatiala na'untungnga, eteudde wunga apan mal᷊ihakka tumolangnga. Arawe i ite indi uatataṛṛanga sulal᷊ummu al᷊awo'u apulu, ana waugu i ite maapulu eleannu wunga apan tawe tumolangnga.

KOLOSE 1:5

I yamiu mangngimanna wuṛṛu i yamiu marangngu, ana waugu mangngantimma apa apan suete nissaddian Duata su surga hunan kamiu. I yamiu suete naaringikka su olangnge udde, su tempo Watti'u Al᷊al᷊uassa udde niapaasingkata si yamiu.

DARALO 31:19

Sappingete moṛṛongngu taṛṛa wahia apan ringannu mawunga mallobbossa taumata matul᷊idda.

SONDAPPA 1:7

Pa'ellega i Tou rumanta sulal᷊ummu winabbawa! Anambon taumata sarun ma'ellega si Tou, nasutta i mangitou lai apan nangusu'a si Tou. Anambon walahanna su runia sarun lumal᷊on Tou. Ore, Atonna! Amin!

TITUS 2:13

Orassa indi i ite tantal᷊anna uaraṛṛaddo Allo apan aantimanni ite udde; su Allo udde runia sarun maasilo awawantugi Yesus Kristus, eteudde Mawu Ahewal᷊anne wuṛṛu Ratun Punnu Sal᷊amatti ite.

SONDAPPA 19:11

Wua'udde i ya'u naasilo surga nawu'a, see niasiloanna sambau awal᷊o mawira. Sumasa'e-Ne aranne Matuṛṛuta wuṛṛu Atonna. I Tou matul᷊idda sulal᷊ummu mangema'u ṛuumanna wuṛṛu sulal᷊ummu pangalo apan niolang-Nge.

2 TIMOTIUS 2:5

Sangkatou mattandinganna tawe maauntunga sulal᷊ummu sambau tandinganna, amungkangu i tou tawe tumuṛṛutta manga atoranne.

2 TIMOTIUS 4:1

Kristus Yesus sarun rumanta apia su runia indi mamarikissa manga taumata apan wiakka wuṛṛu nate; wuṛṛu i Tou sarun rumanta mamarenta ere sangkatou Ratu. Ana waugu udde i ya'u sumal᷊ande si yamiu su saruannu Ruata wuṛṛu Kristus Yesus;

1 TIMOTIUS 6:19

Ringannu aroddi i mangitou mangngammulu paa'ala apan maola'a sambau roitta uaraddo apan mapia su tempo addantane. Wuṛṛu ringannu udde i mangitou sarun maasomba wiakka ma'oman sara mal᷊annu-l᷊annu, eteudde wiakka apan tutune.

1 KORINTUS 2:9

Arawe olangnge udde ere uawoṛṛetta sulal᷊ummu Wuke Susi, “Apa apan taambe saran paassa niasiloanna ara'e niaringiṛṛannu taumata, wuṛṛu tawe lai saran paassa nilumatto sulal᷊ummu ṛingiṛṛannu taumata, eteudde apan nisaddian Duata su manga taumata apan mandangngu si Tou.”

MALEAKHI 3:17

Mawu Apan Lembontaṛṛino nabbisara, “I mangitou sarun mabbal᷊i uma-U. Su allo udde i Ya'u mammanara, i mangitou sarun maola'a pussa'a arangnguang-Ku. I Ya'u sarun umakkanni mangitou, ere sangkatou iamangnga u'akkannu anangnge apan matuṛṛutta si tou.

SONDAPPA 22:20

I Tou apan namasingkatu anambon watti'a indi nabbisara, “Atonna, i Ya'u mal᷊ihakke rumanta!” Amin! Rantate, o Mawu Yesus!

SONDAPPA 4:10

sire ruam pul᷊o appata piaṛṛange udde uaaruutta su saruannu taumata apan ua'ianna su adderan araratuanna udde, see massubba si Tou apan wiakka saran mal᷊annu-l᷊annu. Wua'udde i mangitou nanuntungngu manga araposan araratuanni mangitou su saruannu adderan araratuanna udde lapiddu nabbisara,

SONDAPPA 4:4

Sulal᷊ummu atokke mal᷊imbulunna apan uapal᷊iwutta adderan araratuanna udde, pia ruam pul᷊o appata adderan araratuanna waine. Isudde ua'ianna ruam pul᷊o appata piaṛṛange apan uapedettu mawira, wuṛṛu ual᷊uṛṛen araposa wul᷊awanna.

IBRANI 9:28

Aroddi lai i Kristus tumba'u paassa tinantilla maola'a sasamba ipanubussa rosan anambon taumata. I Tou sarun dumanta apia su aruane, wal᷊ine manginsue hatton paddarosa, arawe manal᷊amatta manga taumata apan uaraṛṛaddo daranta-Ne.

2 TIMOTIUS 1:18

Wuṛṛu i'o masingkatta manungku su Efesus i tou masokka mantul᷊ungku. Doronganna Mawu mapaal᷊iatta'u darangngu-Ne si tou su allo Mawu mamarikissa anambon walahannu taumata.

1 TESALONIKA 1:10

I mangitou uahahatto lai su ola'u ereapa i yamiu mangngantimma darantan Ana'u Ruata wuassu surga, eteudde Mawu Yesus, apan suete niapaawiakku Ruata wuassu papate. Ete Mawu Yesus udde lai apan manal᷊amatta si ite wuassu asasa'un Duata apan sarun rumanta.

ROMA 8:23

Wuṛṛu wal᷊ine tumba'u pati'uppu runia sassane sussal᷊ande; i ite sassane lai sussal᷊ande sulal᷊ummu naungngi ite. I ite buatte nanengkamma Ghaṛṛahon Duata, aonggolu Ruata apan paarorone, arawe i ite lai ta'e uaraṛṛado Ruata mapaal᷊iun kite wuassu sarangkanambone, wuṛṛu manga'u si ite maola'a al᷊aṛṛanang-Nge.

ROMA 2:5

Arawe puan kamiu maattika wuṛṛu maddiri mawal᷊u. Ana waugu udde ete i yamiu sassane apan ma'ola'a ṛuumannu aatambanna awakkane su Allon Kiamatta, napawe Ruata mapaal᷊iatta'u asasa'u-Ne ringannu ṛuumanna apan su ṛinone.

MATIUS 24:36

“Tawedu masingkatta allone wuṛṛu oranne, manga mala'ekattu Mawu su surga lai wagga, Ana'u Ruata lai wagga, tumba'u Iamangnga sassane masingkatta.

MATIUS 7:22

Su Allong Kiamatta manambo taumata sarun mabbisara si Ya'u, ‘Mawu, Mawu, wal᷊inewe ringannu arannu i yami suete nabbal᷊on tanata Ruata? Wuṛṛu wal᷊inewe ringannu arannu Mawu lai yami suete nallimbuakka manga ghaṛṛaho lal᷊eo see na'ola'a anambon al᷊aṛṛindu'a?’

AMSAL 4:9

I tou sarun mangonggollu wantin bunga apan maṛṛansangnga si'o tadea'u maola'a mahkotanu.

DARALO 7:11

Pattillumangku eteudde Ruata apan nanal᷊amatta taumata naunge matul᷊idda.

1 TESALONIKA 5:4

Arawe i yamiu wal᷊inewe taumata apan mabbiakka sulal᷊ummu araranduma, na'oman sara allo udde naaṛṛindu'a si yamiu ere darantan sangkatou taṛṛa ta'o.

2 KORINTUS 5:2

Sulal᷊ummu wal᷊e su orassa indi, i ite sussal᷊iomanna, ana waugu i ite maapulute atonna matana'a su wal᷊e su surga udde.

LUKAS 10:12

Paananunge, su Allong Kiamatta, taumatan Sodom malluasanna ampungannu Ruata wuassu taumata su soa udde!”

PANDARIADDI 18:25

Ariewe manga taumata apan tawe sal᷊ane udde pateanna suadio'a ringannu taumata pia sal᷊ane. Arie Mawu! Ana waugu amungkangngu udde olaannu Mawu, taumata apan tawe sal᷊ane sarun iṛṛuumanna suadio'a ringannu taumata nassal᷊a. Tawe mariaddi mallaruungngu ul᷊ilin pati'uppa makkungnga tawe su atatul᷊idda!”

1 KORINTUS 3:13

Manaran sangkatou-sangkatou sarun asiloanna su tempo Kristus rumanta apia. Ana waugu su allo udde putungnga sarun manemakka manaran sangkatou-sangkatou see asiloanna. Putungnga sarun manal᷊u'atta wuṛṛu manantunnu apapian manara udde.

FILIPI 3:11

Wuṛṛu i ya'u mangantimma manungku i ya'u sassane sarun iapaawiakka apia wuassu papate.

2 TESALONIKA 2:8

wakkute udde asiloante Taumata Lal᷊eo udde. Napawe Mawu Yesus rumantate, i Tou sarun mamate Taumata Lal᷊eo udde ringannu singangu wuassu moṛṛo-Nge, wuṛṛu mamate si tou ringannu asasemakku daranta-Ne.

2 TIMOTIUS 1:10

Wuṛṛu orassa indi, Ruata napaal᷊iatta'u al᷊amanlle si ite ringannu darantan Ratun Punnu Sal᷊amatti ite Kristus Yesus. Mawu Yesus napassuṛṛubawan taṛṛinon papate wuṛṛu nangapiddu wiakka sarangkal᷊o'enge sulal᷊ummu Watti'u Al᷊al᷊uassa udde.

IBRANI 12:11

Atonna su tempo i ite a'aṛṛaanna, ṛuumanna udde tawe ma'al᷊uassa naungngi ite, ewe'e tumba'u maasusa. Arawe mal᷊iu wua isudde, si ite apan suete niaṛṛa'anna, ṛuumanna udde ma'ola'a si ite mabbiakka tuttuṛṛuta apulu Ruata, wuṛṛu mangngonggolu apendamu paddarame si ite.