2 KORINTUS 10:18 - WUKE SUSI WATTI'U AL᷊AL᷊USASSA

¹⁸ Ana waugu taumata apan raddaloanna eteudde taumata apan raddaloannu Mawu, wal᷊ine taumata maddalo watanganne sassane.

2 KORINTUS 10:18 Referans Kwoze

LUKAS 16:15

Arawe Mawu Yesus nabbisara si mangitou, “Ete i yamiu taumata apan su saruannu taumata waine ellehanna mapia, arawe Ruata masingkattu lal᷊oṛṛo naungngu. Ana waugu apa apan sassunnannu taumata matanggakka, su aellegu Ruata udde mawawo.

AMSAL 21:2

Suapan inolaannu taumata asinungka mapia sulal᷊ummu aellege sassane, arawe tumba'u Mawu apan masingkattu naungnge.

1 KORINTUS 4:5

Ana waugu udde, amungkangu taambe tempone, arie i yamiu mal᷊iha-l᷊ihakka manantunna manungku sangkatou nassal᷊a ara'e tawe. Paṛṛadote Ruata rumanta. Ete i Tou sarun mamu'a al᷊awo'u addapingnga apan uawuni sulal᷊ummu ararandumma. Ete i Tou apan mamongkakku anambon pandumanna apan uawuni sulal᷊ummu naungngu taumata. Su tempo udde suapan taumata wakkute udde maasengkamma daralo wuassu Ruata apan wotongnge sengkamanni tou.

ROMA 2:29

Arawe sangkatou Yahudi apan tutune eteudde taumata apan naungnge naungngu Yahudi; wuṛṛu sunatta apan tutune eteudde sunatta su naungnga apan mammanarannu Ghaṛṛahon Duata, wal᷊inewe niwoṛṛetta sulal᷊ummu wuke. Taumata ereudde, mannengkamma daralo wuassu Ruata, wal᷊ine wuassu taumata.

2 KORINTUS 10:12

I yami tawe lai waṛṛani manumandinga ara'e manul᷊ungngu watanganni yami massul᷊ungngu manga taumata apan uapendama watanganne matanggakka. Tumaniten woddo i mangitou! I mangitou ma'ola'a aul᷊aanne sassane wuṛṛu mannanda watanganni mangitou sassane ringannu aul᷊aanne udde.

YOHANES 12:43

I mangitou lembo maapulu maasomba daralon taumata wuassu daralon Ruata.

AMSAL 27:2

Imbaṛṛangnga maddalo watangannu sassane; tanasa'e taumata waine apan ma'ola'a olangnge udde, ewe'e lai iapa awaganannu.

1 PETRUS 1:7

Tuddane eteudde mattiala manungku tanne atonna-tonna i yamiu mangngimanna Mawu ara'e tawe. Wul᷊awanna lai apan wotonge mahohakka, iannamma su putungnga. Ne pangangimanni yamiu maareganne wuassu wul᷊awanna, nariaddi ṛinone lai iannama tadea'u maola'a matohassa. Wuṛṛu ringannu aroddi yamiu sarun raloanna wuṛṛu addatanna lapiddu iruitta su allo Mawu Yesus Kristus rumanta apia.

2 KORINTUS 13:7

I yami u'al᷊iomanna su Ruata antimanna i Tou mantul᷊ungngi yamiu ana see tawe ma'ola'a pasasal᷊a. Wal᷊inewe mapaal᷊iatta'a manungku i yami indi pande mammanara, arawe tadea'u i yamiu tuttuṛṛutta apulun Duata – salaiwe aellehanna i yami tawe tumuṛṛutta, udde tawe apane!

2 KORINTUS 6:4

Arawe sulal᷊ummu al᷊awo'u inolaanna i yami mapaal᷊iatta'a manungku ete i yami allangngu Ruata. Ana waugu al᷊awo'u hatin asasusa buatte niapendamanni yami ringannu sabare;

ROMA 14:18

Taumata apan mangngimbe Kristus olangnge aroddi, taumata udde maal᷊uassa naungngu Ruata, wuṛṛu aadatannu taumata waine.

2 TIMOTIUS 2:15

Ṛinone i'o mammanara atonna-tonna tadea'u i'o a'uannu Ruata mola'a sangkatou taumata apan wotongnge mangimbe si Tou. Pappandumpe tadea'u i'o tawe masili su ola'u manaranu, ewe'e mangngaṛṛa'u al᷊aṛṛa'a apan su ṛinone wuassu Ruata.

2 KORINTUS 5:12

Ringannu indi yami tawe madorongnga tadea'u i yamiu maddalo wadangngi yami. I yami tumba'u mangonggolu sambau pinangiananne apan mapia si yamiu tadea'u i yamiu mal᷊uassa si yami, tadea'u i yamiu masingkata ereapa i yamiu sumimbakka manga taumata apan tumba'u ma'ellega pahuddu taumata wal᷊ine ma'ellega pallal᷊agune.

2 KORINTUS 3:1

Apa indi aasiloanna ere ola'u i yami maddalo watanganni yami lai? Ara'e wotongnge mariaddi yami mappandumma surattu daralo si yamiu, ara'e wuassi yamiu, ere lai raddeaannu taumata waine?

1 KORINTUS 11:19

Naṛṛinote amungkangu pia patatiakka su wallatti yamiu, tadea'u sarun asiloanna isai-sai taumatan Saṛṛani tutune.

ROMA 16:10

Tabea'u si Apeles. Tatuṛṛunne si Kristus niatialante. Tabea lai su lal᷊oṛṛon bal᷊e Aristobulus,

WATTI'U MANGA RASUL 2:22

Manga tuṛṛangnga taumatan Israel! Padaringikka wisara'u indi: Mawu Yesus taumata Nazaret udde suete nionggol᷊annu Ruata manara hunang kamiu. Udde natualaga su manga al᷊aṛṛindu'a wuṛṛu inolaanna apan wahewalla apan niola'u Ruata su pattangngani yamiu sulal᷊ummu Mawu Yesus udde. Sarangkanambone udde tuṛṛangnga sassane masingkatta.

AMSAL 12:8

Taumata raddaloanna ana waugu apapandene; taumata aal᷊uandahanna ana waugu awawoddone.