1 YOHANES 5:20 - WUKE SUSI WATTI'U AL᷊AL᷊USASSA

²⁰ I ite masingkatta manungku Ana'u Ruata suete nirumanta wuṛṛu suete nangonggolu pasasunna si ite, tadea'u i ite maaillal᷊a Ruata apan naṛṛino. I ite mabbiakka uaaukka ringannu Ruata apan naṛṛino wuṛṛu mabbiakka uaaukka ringannu Anang-Nge Yesus Kristus. Ete indi Ruata apan naṛṛino, wuṛṛu ete indi wiakka tutune wuṛṛu saran mal᷊annu-l᷊annu.

1 YOHANES 5:20 Referans Kwoze

YOHANES 17:3

Ete indi wiakka tutune wuṛṛu mal᷊annu-l᷊annu; tadea'u taumata maaillal᷊a Iamangnga, eteudde Ruata tinggassa apan atonna, wuṛṛu maaillal᷊a si Yesus Kristus apan nirolokku Iamangnga.

LUKAS 24:45

Wua'udde Mawu Yesus nanualaga ṛingiṛṛanni mangitou ana see maasunna pandumannu Wuke Susi.

YOHANES 14:9

Arawe Mawu Yesus sinumimbakka, “Mal᷊annute i Ya'u su sambau ringanni yamiu, i yamiu taambe lai naaillal᷊a si Ya'u, Filipus? Taumata apan naasilote si Ya'u, naasilote lai Iamangnga. Ereapa i'o wotongnge mabbisara, ‘Ta'ea'a Iamangnga si yami’?

1 TIMOTIUS 3:16

Taweddu saran sangkatou wotongnge massinaada, aroddi ahewalle addapingu agaman kite: I tou namasilon batanganne sulal᷊ummu lihiddu taumata, wuṛṛu niapaal᷊iatta'u Ghaṛṛahon Duata, see aellehannu manga mala'ekatta. Wattinge niapararingikka su wallatu manga walahanna, wuṛṛu i Tou apangimananna su ahewallu runia wuṛṛu niapaasengkenga su surga.

YESAYA 44:6

Eteindi wisara Mawu Apan Lembontaṛṛino, Ratu mallal᷊u'adda Israel, “I Ya'u Ruata Apan Tinggassa, apan paarorone wuṛṛu panguddusanne.

1 YOHANES 5:1

Taumata apan mangngimanna manungku Yesus udde Ratun Punnu Sal᷊amatta apan pina'iren Duata, taumata udde ana'u Ruata. Taumata apan mandangngu sangkatou Iamangnga, marangngu lai anangnge.

YOHANES 20:28

I Tomas nabbisara Mawu Yesus, “Mawu'u wuṛṛu Ruata'u!”

SONDAPPA 3:7

“Su mala'ekattu jamaatta su Filadelfia, woṛṛetta'a arendi: Ete indi tanata wuassi Tou apan susi wuṛṛu tutune. Ete i Tou uaaggasa a'unsi apan tatahuananni Daud; amungkangu i Tou mamu'a, tawe saran sangkatou wotongnge maaṛṛu'uda, wuṛṛu amungkangu i Tou maṛṛuuda, tawe saran sangkatou wotongnge maawu'a.

1 YOHANES 4:16

I ite sassane masingkata wuṛṛu mangngimanna darangngun Duata si ite. Ruata udde marangngu. Taumata apan wiakke paparentannu darangngu, taumata udde uaaukka ringannu Ruata, wuṛṛu Ruata uaaukka ringanni tou.

ROMA 9:5

Ete i mangitou udde papapulunna wuassu iupungngu al᷊amonan kite. Kristus su olangnge ere sangkatou taumata wuassu walahanni mangitou. I Tou lembon atanggaṛṛanne wuassu sarangkanambone. Paddalote Ruata sarangkal᷊o'engnge! Amin.

YOHANES 10:30

I Ya'u wuṛṛu Iamangnga tumba'u sambau.”

YESAYA 9:6

I Tou mamarenta maola'a sangkatou ratu papulunni Daud, taṛṛinone tumaniten bahewalla. Wanuane sidutu su paddarame wuṛṛu su lal᷊umanna'a; pamamarentane nirapappakka su tita wuṛṛu atatul᷊idda orassa indi maddatingngu mal᷊annu-l᷊annu. Mawu Apan Lembontaṛṛino sarun manuungngu udde.

1 YOHANES 4:2

Ereindi olangnge tadea'u i yamiu maasingkata apa udde Ghaṛṛahon Duata ara'e tawe: Taumata apan mangnga'u Yesus Kristus nirumanta su runia naola'a taumata, taumata udde pia Ghaṛṛaho apan darantane wuassu Ruata.

1 YOHANES 2:6

Isai-sai nabbisara manungku i tou mabbiakka uaaukka ringannu Ruata, i tou ṛinone mabbiakka manantuṛṛutta lempangi Kristus.

IBRANI 1:8

Arawe su Ana'a udde, Ruata nabbisara, “Adderan araratuannu, oh Mawu, sarun ma'oman sara mal᷊annu-l᷊annu! Araratuannu udde araratuanna apan matul᷊ida.

TITUS 2:13

Orassa indi i ite tantal᷊anna uaraṛṛaddo Allo apan aantimanni ite udde; su Allo udde runia sarun maasilo awawantugi Yesus Kristus, eteudde Mawu Ahewal᷊anne wuṛṛu Ratun Punnu Sal᷊amatti ite.

WATTI'U MANGA RASUL 20:28

Ṛinone i yamiu uariaga watangannu wuṛṛu riagai lai anambon jamaatta apan suete tinantillu Ghaṛṛahon Ruata si yamiu iapariaga; ana waugu i yamiu suete nitenega maola'a mandariaga jamaatta udde. Ṛinone i yamiu uariaga jamaattu Ruata udde naal᷊ihidda ere mallal᷊u'adda uariaga dombane, ana waugu Ruata suete na'ola'a jamaatta udde pussaa-Ne sassane sulal᷊ummu papaten Anang-Nge sassane.

YOHANES 17:14

I Ya'u suete namasingkattu wisaran Iamangnga si mangitou, wuṛṛu runia maddantinni mangitou, ana waugu i mangitou wal᷊ine pussa'an dunia, ere i Ya'u lai wal᷊ine tatahuanannu runia.

SONDAPPA 19:11

Wua'udde i ya'u naasilo surga nawu'a, see niasiloanna sambau awal᷊o mawira. Sumasa'e-Ne aranne Matuṛṛuta wuṛṛu Atonna. I Tou matul᷊idda sulal᷊ummu mangema'u ṛuumanna wuṛṛu sulal᷊ummu pangalo apan niolang-Nge.

SONDAPPA 15:3

Wuṛṛu i mangitou mangantari antari Musa, allangngu Ruata, wuṛṛu antarin Ana'u Domba. Arendi tingikke, “Mawu, Ruata Lembon Taṛṛino, tumaniten wahewalla wuṛṛu ma'atiangnga manga inolaan-Nu! Ratun al᷊awo'u walahanna tumaniten matul᷊idda wuṛṛu tawe sal᷊ane manga inolaan-Nu!

SONDAPPA 6:10

I mangitou u'ui ringannu tingikki mangitou apan ma'ikkatta, “Oh Mawu Lembon Taṛṛino, apan susi wuṛṛu naṛṛino! Pirang katempo lai al᷊annune I'o mamarikissa lal᷊oṛṛon runia wuṛṛu maṛṛuumanni mangitou ana waugu suete namate si yami?”

SONDAPPA 3:14

“Su mala'ekattu jamaatta su Laodikia, woṛṛetta'a arendi: Ete indi tanata wuassu Awantuhanne Amin, Mattatiala apan matammuda wuṛṛu naṛṛino, punnu al᷊awo'u sarannapa apan niola'u Ruata.

1 YOHANES 4:14

I yami sassane suete naasilo Ana'u Ruata, wuṛṛu i yami namasingkata manungku i Tou nirolokku Iamangnga maola'a Ratun Punnu Sal᷊amattu runia indi.

FILIPI 3:9

wuṛṛu atonna-tonna uaaukka ringanni Tou. Pasasambau apan mapia ringannu Ruata tate ta'u manaranna sassane, ringannu tuttuṛṛuta titan agama. Orassa indi ya'u pia paa'aukka apan mapia ringannu Ruata, ana waugu i ya'u mangngimanna si Kristus. Nariaddi, paa'aukka apan mapia udde darantane wuassu Ruata, wuṛṛu pinangiannne ana waugu mangngimanna si Yesus Kristus.

2 KORINTUS 4:6

Ruata mabbisara, “Ṛinone wuassu lal᷊ummu ararandumma sumabangnga asasemakka,” Ruata lai apan napaasabangngu semakka wuassu lal᷊ummu naungngi ite, tadea'u ṛingiṛṛanni ite masemakka ipassunna awawantugu Ruata apan lullansiangnga su hatin Kristus.

YOHANES 15:4

Paasidutua'e uaaukka ringang-Ku wuṛṛu i Ya'u lai mangke sidutu ringanni yamiu. Ranna sassane tawe mabua, tabene'e i tou sidutu uaammullu punene. Aroddi lai yamiu tumba'u wotongnge mabua, amungkangngu sidutu su sambau ringang-Ku.

YOHANES 14:23

Mawu Yesus sinumimbakka, “Taumata apan mandangngu si Ya'u, sarun tumuṛṛutta al᷊aṛṛa-U. Iamang-Ku sarun mandangngu si tou. Iamang-Ku wuṛṛu i Ya'u sarun rumanta ringanni tou wuṛṛu matana'a su sampunna ringanni tou.

YOHANES 14:20

Napawe nia'omante allo udde, i yamiu sarun maasingkatta manungku i Ya'u uaaukka ringannu Iamangnga, wuṛṛu i yamiu uaaukka ringang-Ku, wuṛṛu i Ya'u uaaukka ringanni yamiu.

YOHANES 14:6

Mawu Yesus sinumimbakka, “Ete i Ya'u lal᷊anna ipa'illal᷊a Ruata wuṛṛu see maasomba wiakka. Tawe saran sangkatou wotongnge rumanta ringannu Iamangnga, amungkangngu tawe umamatta lumiu si Ya'u.

YOHANES 1:18

Tawe saran sangkatou apan suete naasilo Ruata, tumba'u ana'u Iamangnga tinggassa, apan uasul᷊ungngu Iamangnga wuṛṛu uaaukka atonna ringanni Tou. Ete i Tou apan napaal᷊iatta'u Iamangnga si ite.

LUKAS 21:15

I Ya'u sassane sarun mangonggolu wisara wuṛṛu apande udde, ma'oman tawe saran sangkatou wuassu manga seetti yamiu wotongnge lumawangnga ara'e massinaaddu apa apan suete niapaasingkatti yamiu.

MATIUS 13:11

Mawu Yesus sinumimbakka, “Ana waugu i yamiu suete nionggol᷊annu al᷊amatta ipani'attu addapingnga su ola'u ereapa Ruata mamarenta, arawe i mangitou tawe nionggol᷊anna.

YEREMIA 10:10

Arawe I'o, Mawu, Ruata apan naṛṛino, Ruata mangangonggllu wiakka, ratu sarangkal᷊o'enge. Amungkangngu I'o masa'u, runia umio'a, amungkangngu I'o mamansagga manga walahanna tawe maataṛṛanga. (

YESAYA 54:5

Mandariaddinu naola'a ere awingngu, Ruata na'ukkassu Israel uddewe Mananal᷊amannu. Mawu Apan Lembontaṛṛino, uddewe aran-Ne, i Tou Ruata uataṛṛino ahewallu runia.

1 YOHANES 2:24

Ana waugu udde, watti'a apan suete niaringiṛṛani yamiu ro'en panattaṛṛanne i yamiu mangngimanna, ṛinone rariagganni yamiu mapia-pia sulal᷊ummu naungnga. Amungkangu watti'a udde, tatutuṛṛanni yamiu mapia-pia, i yamiu sarun mabbiakka sidutu uaaukka ringannu Ana'a wuṛṛu Iamangnga.

EFESUS 3:18

I ya'u u'al᷊iomanna doronganna suadio'a ringannu anambon walahannu Ruata, i yamiu wotongnge maasunna aroddi ahewalle wuṛṛu al᷊o'engnge wuṛṛu atanggakke wuṛṛu al᷊al᷊umme darangngun Kristus,

2 KORINTUS 5:17

Taumata apan buatte naaukka ringanni Kristus, maola'a taumata wakku atonna-tonna. Apan tabbe nal᷊iute – sarangkanambone naola'e wakku.

1 KORINTUS 1:30

Ete Ruata sassane apan ma'ola'a si'o naaukka ringanni Kristus Yesus. Sulal᷊ummi Kristus i ite niola'a pande. Wuṛṛu sulal᷊ummi Tou lai Ruata na'ola'a si ite nassangkapia apia ringanni Tou, i ite niola'a al᷊aṛṛanang-Nge apan apianne, wuṛṛu napaal᷊iun kite wuassu alal᷊eo.

YOHANES 17:25

Iamangnga apan matul᷊idda! Runia tawe maaillal᷊a Iamangnga, arawe i Ya'u maaillal᷊a Iamangnga; wuṛṛu manga taumata indi masingkatta manungku ete Iamangnga, apan nandolo-U.

YEREMIA 23:6

Napawe i tou mamarenta, taumatan Yehuda sarun masal᷊amatta, wuṛṛu taumatan Israel sarun mabbiakka ringannu mal᷊angnganna. Ratu udde sarun isaggo ‘Mawu Asasal᷊ammatti Ite’.

YOHANES 8:42

See Mawu Yesus nabbisara si mangitou, “Unnu wisara Ruata udde Iamangngu, i yamiu sarun mandangngu si Ya'u, ana waugu i Ya'u nirumanta wuassu Ruata. I Ya'u tawe nirumanta ringannu apulu-U sassane, arawe ete i Tou apan nanadolo-U.

1 YOHANES 2:23

Taumata apan tawe manga'u Ana'a, atappasanne tawe manengkamma Iamangnga lai. Wuṛṛu taumata apan mangnga'u Ana'a, atappasanne mannengkama lai Iamangnga.

1 YOHANES 5:5

Isai wotongnge maaroappa runia? Tumba'u taumata apan mangngimanna manungku Yesus udde Ana'u Ruata.

1 YOHANES 5:15

Ana waugu i ite masingkata manungku i Tou maddaringikka si ite amungkangu i ite madorongnga si Tou, ne i ite masingkatta lai manungku i Tou nangonggolu apa apan radoronganni ite si Tou.

1 YOHANES 5:18

I ite masingkatta manungku anambon taumata apan suete naola'a al᷊aṛṛana'u Ruata, tawe sidutu ma'ola'a rosa, ana waugu Ana'u Ruata uasirugngnga si tou, wuṛṛu i Lal᷊eo tawe mapa'ola'a apa-apa si tou.