1 TESALONIKA 2:2 - WUKE SUSI WATTI'U AL᷊AL᷊USASSA

² I yamiu masingkata manungku ro'en i yami taambe nirumanta ringanni yamiu su Tesalonika, i yami suete niapaasusa wuṛṛu nial᷊uandahanna su Filipi. Arawe salaiwe manambo taumata mandooppa si yami, Mawu Ruatan kite suete nangonggolu awawaṛṛani si yami ipabbatti'u Watti'u Al᷊al᷊uassa si yamiu apan darantane wuassi Tou.

1 TESALONIKA 2:2 Referans Kwoze

WATTI'U MANGA RASUL 4:13

Manga wageangngu ammul᷊annu Mamamarikissa udde naherangnga naasilo awawaṛṛanin Petrus wuṛṛu i Yohanes, see lai i mangitou masingkatta manungku rasul darua udde taumata wiasa apan tawe si'ol᷊ane. See i mangitou naatutukke manungku rasul darua eteudde manga taumata apan uatantalongnga Mawu Yesus.

2 TIMOTIUS 1:12

Ana waugu udde i ya'u natataṛṛangu sarangkanambone indi, arawe i ya'u sidutu mangngimanna, ana waugu i ya'u masingkata atonna, isai apan pangimanangku. I ya'u mangantimma manungku apa apan suete nitantilli Tou si ya'u, i Tou lai wotongnge maariaga udde saran Allon Kiamatta.

WATTI'U MANGA RASUL 16:37

Arawe i Paulus nabbisara su manga polisi udde, “I yami tumana'u Roma. Taambe niparikisanna i yami suete nipuulla su saruannu awada'alla wuṛṛu tinaṛṛo sulal᷊ummu tuttupanna. Wuṛṛu orassa indi i mangitou mandolokki yami mapul᷊e ringannu mal᷊anna-l᷊annaba? I yami maddiri! Dol᷊oṛṛa'a manga piaṛṛa'u pamarenta udde rumanta sassane isindi mamallosi yami.”

1 TESALONIKA 1:5

Ana waugu i yami namasingkatu Watti'u Al᷊al᷊uassa si yamiu wal᷊ine tumba'u ringannu wisara, arawe lai ringannu taṛṛino wuṛṛu Ghaṛṛahon Duata. Wuṛṛu i yami mangngimanna atonna atatul᷊iddu Watti'u Al᷊al᷊uassa udde. I yamiu masingkata ereapa i yami mabbiakka ana waugu i yamiu su tempo i yami uatana'a su pattanganni yamiu.

KOLOSE 2:1

I ya'u maapulu i yamiu maasingkata ereapa ahewalle i ya'u mammanara hunan kamiu, wuṛṛu hunan mangitou su Laodikia see anambon taumata apan tawe maaillal᷊a si'u sassane.

WATTI'U MANGA RASUL 17:17

Ana waugu udde su wal᷊em pattataṛṛamawuanna, i Paulus uaa'al᷊iun ṛingidda ringannu manga taumatan Yahudi wuṛṛu manga taumata waine apan massubba Ruata isudde. Aroddi lai su manga pasakka, miallo-miallo i tou uaa'al᷊iun ṛingidda ringannu manga taumata isudde.

WATTI'U MANGA RASUL 14:3

Ana waugu udde i Paulus wuṛṛu i Barnabas natana'a mal᷊annu isudde. Wuṛṛu ringannu waṛṛani i mangitou mabatti'u wisara Mawu. Ne Mawu lai napaal᷊iatta'a manungku watti'i mangitou su ola'u darangngu-Ne udde atonna; i Tou nangonggolu taṛṛino si mangitou ma'ola'a al᷊aṛṛindu'a wuṛṛu inolaanna waine.

WATTI'U MANGA RASUL 5:41

Manga rasul udde nanantangngu Mallaṛṛuungngu Agama ringannu lulluassa ana waugu Ruata suete na'ola'a si mangitou naasomba aal᷊uandaga ana waugu Mawu Yesus.

WATTI'U MANGA RASUL 4:31

Napawe i mangitou suete inumal᷊iomanna, tampa i mangitou uaammulla udde inumio'a. I mangitou sarangkanambone naasomba taṛṛinon Ghaṛṛahon Ruata, wuṛṛu nanattakke mabbisara ringannu waṛṛani atonna, su ola'u watti'u Ruata.

WATTI'U MANGA RASUL 4:20

Ana waugu i yami tawe maaillol᷊o mabbisara su ola'u apa apan suete niasiloanni yami wuṛṛu niaringiṛṛanni yami sassane.”

YUDAS 1:3

Manga tuṛṛangnga apan arangnguanna! I ya'u atonna-tonna pia pandumanna mamoṛṛettu suratta si yamiu su ola'u asasal᷊amatta apan suete niapendamanni ite suaddio'a. Arawe orassa indi ya'u pia pandumma mangaṛṛa'a si yamiu ringannu suratta indi tadea'u i yamiu siddutu mammanara maddea'a pangangimanna apan paassate nionggolu Ruata ma'oman sara mal᷊annu-l᷊annu su al᷊aṛṛanang-Nge.

WATTI'U MANGA RASUL 19:8

Tallu wul᷊anna al᷊annune, i Paulus sidutu mabbisara ringannu waṛṛani su manga taumata su wal᷊em pattataṛṛamawuanna wuṛṛu uasasimbakki mangitou tadea'u i mangitou mangngimanna su ola'u ereapa Ruata mamarenta ere sangkatou Ratu.

WATTI'U MANGA RASUL 16:12

Wua'isudde i yami watukku Filipi, sambau soa paarorone su leta'u Makedonia. Filipi udde paparentannu araratuannu Roma. Poiaroddi yami natana'a manga pira allo.

WATTI'U MANGA RASUL 14:5

See manga taumatan Yahudi wuṛṛu manga piaṛṛangnge su sampunna ringannu manga taumata wal᷊ine Yahudi na'ire manansara wuṛṛu manuntungngu watu su manga rasul udde.

WATTI'U MANGA RASUL 16:19

Napawe manga mawune naatutukka manungku tempo mangitou maasomba roitta udde nawul᷊ite, i mangitou nanametta si Paulus wuṛṛu si Silas, see itarua niwol᷊engnga watukku tampam pangillol᷊oanna iapaasaruanna pamarenta.

WATTI'U MANGA RASUL 17:1

I Paulus wuṛṛu Silas nanassukku amatanni tarua sinumabbi Amfipolis wuṛṛu Apolonia see na'omate su Tesalonika. Poiaroddi pia wal᷊em pattataṛṛamawuannu taumatan Yahudi.

ROMA 1:1

Manga tuṛṛangnga sarangkanambone su Roma apan arangnguannu Ruata wuṛṛu apan buatte niwagoannu Ruata maola'a al᷊aṛṛanang-Nge. Ruata buatte namile wuṛṛu i ya'u sassane niapaatenega mammasingkattu Watti'u Al᷊al᷊uassa wuassu Ruata.

2 KORINTUS 3:12

Ana waugu i yami uatahuanna antimma ereudde, ne i yami waṛṛani mabbisara aroddi.