1 TAWARIKH 25:1 - WUKE SUSI WATTI'U AL᷊AL᷊USASSA

¹ Su ipamiaṛṛa'u manga lal᷊aghu patataṛṛamawu, i Ratu Daud wuṛṛu manga piaṛṛa'u taumatan Lewi namile manga ṛuanganni Lewi manansunna indi: i Asaf, i Heman wuṛṛu i Yedutun. I mangitou manarane mammasingkattu tanatan Duata ringannu musikku kecapi, gambus wuṛṛu simbal. Su ipamiaṛṛa'u patataṛṛamawu ringannu lal᷊aghune sambau-sambau, nipile ammul᷊annu taumata manansunna indi:

1 TAWARIKH 25:1 Referans Kwoze

1 TAWARIKH 6:33

Akkittu sinossoṛannu manga taumata apan manarane udde eteudde: Wuassu ṛuanganni Kehat: Heman ana'i Yoel. I tou uapiaṛṛa'u mangangantari apan paarorone. Akkittu sinossoṛanne wua doso naddatingngi Yakub eteudde: i Heman, i Yoel, i Samuel,

2 MARARATU 3:15

Orassa indi apira'e inawarendi sangkatou mananalanga kecapi.” Tantal᷊anna taumata udde mannal᷊anga kecapine, i Elisa niintaṛoannu Ghaṛṛahon Mawu,

1 SAMUEL 10:5

Wua'udde i'o ṛinone inai watukku wuiddu Ruata su Gibea, tampa paddasanannu taumatan Filistin. Su ngara suttanna su soa, i'o sarun massomban sangkammul᷊annu nabi apan sinumossokke wuassu wuidda pangangonggol᷊annu sasamba. I mangitou massal᷊aingnga wuṛṛu mangngintul᷊i, mannalangnga gambus, rebana, wansi wuṛṛu kecapi.

1 TAWARIKH 6:39

I Asaf eteudde piaṛṛa'u mangangantari aruane. Akkittu sinossoṛanne wua bowa ire'e naddatingngi Lewi eteudde: i Asaf, i Berekhya, i Simea,

NEHEMIA 12:27

Sutempo darandungngu soa Yerusalem nilaghu, manga taumatan Lewi niwaggoanna wuassu al᷊awo'u tampa tatanaanni mangitou, tadea'u isudde lai maddamean arariaddianna udde ringannu manga aantari aadiangkamanna, wuṛṛu ringannu musikku gambus wuṛṛu kecapi.

2 TAWARIKH 34:12

Manga taumata apan mammanara mangngapia wal᷊en udde atonna-tonna tawe mamahia. I mangitou ipappiaṛṛa'u siri appatta taumatan Lewi: Yahat wuṛṛu Obaja wuassu ṛuanganni Merari, see i Zakharia wuṛṛu Mesulam wuassu ṛuanganni Kehat. Manga taumatan Lewi sarangkanambone apan masingkatta mannalangnga musikka,

2 TAWARIKH 23:13

I tou naasilo ratu apan wakku udde uarisikka su ngara suttannu Wal᷊en Mawu, suapa i tou nitenega, papal᷊iwutannu manga tembonannu tantara wuṛṛu mananiuppa trompeta. Tumana'u soa sarangkanambone mangngintul᷊i lullala'a lapiddu manniuppa trompeta, wuṛṛu manga mananal᷊angnga musikka su Wal᷊en Mawu nilumala'u ramea udde ringannu anambon musikki mangitou. Ringannu naungnga lal᷊eo i Atalya nanggesa'a laubba wuṛṛu nangintul᷊i, “Mandal᷊al᷊eo! Mandal᷊al᷊eo!”

1 TAWARIKH 25:3

Siri annumma esakka ana'i Yedutun: i Gedalya, i Zeri, i Yesaya, i Simei, i Hasabya wuṛṛu i Matica. Su al᷊ungngu piaṛṛa'i iamangngi mangitou, i mangitou mammasingkattu tanatan Duata ringannu musikka kecapi wuṛṛu i mangitou lai mangngantari aantarin daralo see lai aadiangkamanna su Mawu.

DARALO 81:2

Pangantariten daralo su Mawu, atatohassi ite, paggiote ringannu lulluassa su Ruatan Yakub.

NEHEMIA 12:24

Su al᷊ungngu piaṛṛa'u Hasabya, Serebya, Yesua, Binui wuṛṛu Kadmiel, manga taumatan Lewi nitahia sulal᷊ummu manga wageangnge. Suapan paassa pia darua wageangnge apan mammanara maddalo Mawu wuṛṛu mangngonggollu aadiangkamanna si Tou uawawal᷊issa, uasul᷊ungngu atoranni Ratu Daud, allangngu Ruata udde.

2 TAWARIKH 31:2

I Ratu Hizkia nangatokku apia manga ammul᷊annu manga imam wuṛṛu taumatan Lewi tumuṛṛuttu tahia manaran mangitou. Manga manara eteudde: mangonggolu sasamba itattambunna wuṛṛu sasamban paddarame, mangangimben lal᷊aghu patataṛṛamawu su Mawu su al᷊awo'u tampa su Wal᷊en Mawu.

2 TAWARIKH 23:9

Su manga tembonannu tantara udde i Yoyada nattahia wangkau wuṛṛu allungnga pussa'an Ratu Daud apan sasahipunanna su Wal᷊en Mawu.

2 TAWARIKH 23:1

Su tonna appitune Imam Yoyada nakkawessa mapapangalo. I tou nanggol᷊agu paaire ringannu siri lima piaṛṛa'u tantara, eteudde, Azarya ana'i Yeroham, Ismail ana'i Yohanan, Azarya ana'i Obed, Maaseya ana'i Adaya, wuṛṛu Elisafat ana'i Zikhri.

1 TAWARIKH 23:2

I Ratu Daud nangammullu anambon piaṛṛa'u Israel, manga imam wuṛṛu taumatan Lewi,

1 TAWARIKH 6:44

I Etan eteudde piaṛṛa'u mangangantari atallune; i tou wuassu amonanni Merari. Akkittu sinossoṛanne wua bowa iree maddatingngi Lewi eteudde: i Etan, i Kisi, i Abdi, i Malukh,

1 TAWARIKH 9:33

Sambageanganna taumatan Lewi waine manarane mangngantari su Wal᷊en Mawu. Manga tembonannu amonanni mangitou uatana'a su manga pira sabbua su Wal᷊en Mawu. I mangitou tawe nionggol᷊annu manara waine, ana waugu i mangitou mammanara allo wuṛṛu ṛabbi.

1 TAWARIKH 25:2

Siri appatta esakka ana'i Asaf: i Zakur, i Yusuf, i Netanya wuṛṛu i Asarela. Piaṛṛa'i mangitou eteudde i Asaf, apan mammasingkattu tanatan Duata, napawe i mangitou iapamanaran ratu.

2 TAWARIKH 8:14

Uasul᷊ungngu lai ere atoranni Daud Iamangnge, Salomo nangatokku manga manara miallo-miallo su manga imam wuṛṛu su taumatan Lewi apan ṛinone mangngantari manga daralo su Mawu wuṛṛu massumbala manga imam sulal᷊ummu mallaghu patataṛṛamawu. See lai manga mandariaga Wal᷊en Mawu nitahia lai piran kawageanganna su al᷊awo'u ngara mal᷊oangnga, ere lai buatte nitantiron Daud allangngu Ruata.

2 TAWARIKH 23:18

Ana see i Yoyada nandolokku manga imam wuṛṛu taumatan Lewi iapaatokku manara su Wal᷊en Mawu tumuṛṛuttu tahian manara apan buatte niatokki Ratu Daud. I mangitou ṛinone mangonggolu sasamba itattambunna su Mawu – uasul᷊ungngu manga titan Musa – ringannu ramea wuṛṛu manga aantari ere buatte niatokki Daud.

2 TAWARIKH 35:15

Manga panden mananalangnga musikka wuassu ṛuanganni Asaf sulal᷊ummu ṛuanganni Lewi uarisikka isudde su tampa pammanaranna apan buatte niatokki Ratu Daud si mangitou. Eteindi manga aranni mangitou: Asaf, Heman, wuṛṛu Yedutun, sangkatou nabi apan mammanara ringannu ratu. Manga mandariaga ngara mal᷊oangnga imbaṛṛangnga manantangngu tampan mangitou, ana waugu i mangitou wotongnge mallaghu ramean Paskah sutampa pammanaranni mangitou ringannu lal᷊imannu taumatan Lewi waine.

YEHEZKIEL 40:44

Wua'udde esakka udde nangapi'u watukku rallakku lal᷊umme. Isudde pia darua sabbua, sambau su sandiṛṛannu sasuttanna su sawannakka, wuṛṛu sambau lai su sansidaṛṛannu sasuttanna samba'a timukka wuṛṛu uasaruanna watukku sawannakka.

1 MARARATU 10:12

Alu udde nipaatti Salomo ipa'ola'a manga tarali su Wal᷊en Mawu wuṛṛu wal᷊e atatanaannu ratu; wuṛṛu lai niola'a kecapi wuṛṛu gambus hunan ingana'a mangangantari. Manga alu udde eteudde alu cendana apianne apan buatte niapidda watukku Israel; tate saran paassa taumata maasilo alu apianne ereudde.)

1 TAWARIKH 6:16

I Lewi pia siri tallu ana'a esakka, eteudde i Gerson, i Kehat wuṛṛu Merari.

1 TAWARIKH 13:8

arawe i Daud wuṛṛu anambon walahannu Israel massal᷊aingnga wuṛṛu mangngantari ringannu lulluassa tadea'u ipangaddatta Ruata, lapiddu tingikku kecapi, rebana, simbal wuṛṛu trompeta.

1 TAWARIKH 15:28

Anambon taumatan Israel inaite tinumantalongnga Wantallu Paaire naddatingngu Yerusalem ringannu aintul᷊i lullala'a, tingikku trompeta, nafiri, simbal wuṛṛu kecapi.

1 TAWARIKH 25:9

Siri 288 su atoune udde nitahia sulal᷊ummu wageangnge tumuṛṛuttu amonannu sambau-sambau. Suapan wageangnge taumatane 12 su atoune ipappiaṛṛa'u sangkatou. Eteindi aranni mangitou tumuṛṛuttu buatte niundi: 1. i Yusuf wuassu papapulunni Asaf 13. i Subael 2. i Gedalya 14. i Matica 3. i Zakur 15. i Yeremot 4. i Yizri 16. i Hananya 5. i Netanya 17. i Yosbekasa 6. i Bukia 18. i Hanani 7. i Yesarela 19. i Maloti 8. i Yesaya 20. i Eliata 9. i Matanya 21. i Hotir 10. i Simei 22. i Gidalti 11. i Azareel 23. i Mahaziot 12. i Hasabya 24. i Romamti-Ezer

EZRA 6:18

Wua'udde su pangangimbe su Wal᷊en Mawu i mangitou nangatokku tahia su manga imam see manga taumatan Lewi tumuṛṛuttu atoranna apan uawoṛṛetta sulal᷊ummu buken Musa.

DARALO 81:3

Tengkelle rebana, wuṛṛu pangantarite, tengkelle gambus wuṛṛu kecapi ringannu mapia.