1 TAWARIKH 12:18 - WUKE SUSI WATTI'U AL᷊AL᷊USASSA

¹⁸ Sangkatou suwallatti mangitou, eteudde i Amasai, apan sal᷊immurine nabbal᷊i piaṛṛa'u ammul᷊anna apan isassago “Tridasawira,” nitaṛṛinoannu Ghaṛṛahon Duata ana see nabbisara, “I Daud, ana'i Isai! Yami massumbala si'o! Antimanna i'o wuṛṛu i mangitou apan massumbala si'o mangke maauntungnga. Ruata uasamba'a si'o!” Ne i Daud nanal᷊oho si mangitou wuṛṛu nanenegi mangitou nabbal᷊i tembonannu tantara sulal᷊ummu tantaran pangalone.

1 TAWARIKH 12:18 Referans Kwoze

MAL᷊AṚṚUUNGNGA 6:34

Arawe i Gideon niintaṛoannu Ghaṛaho Mawu, na'oman sara i tou nattiuppa trompetta pinamago taumata ṛuanganni Abiezer tadea'u rumanta maammuli tou.

MAL᷊AṚṚUUNGNGA 3:10

Ghaṛaho Mawu uataṛino si Otniel na'oman sara i tou naola'a piaṛa'u walahannu Israel. I tou inaite napapangalo, ana see Mawu napaauntungngi tou su ratun Mesopotamia udde.

2 SAMUEL 17:25

I Absalom buatte nanenegi Amasa naola'a tembonannu tantara nallol᷊ossa si Yoab. I Amasa ana'i Yitra taumatan Ismael; inangngene aranne i Abigail ana'i Nahas, eteudde tuṛṛangngi Zeruya wawine, inangngi Yoab.)

RUT 1:16

Arawe i Rut sinumimbakka, “Mama, ariete i Mama mandolo'u iapa'apul᷊e wuṛṛu manatangngi Mama! I ya'u maapulu tumantalongnga si Mama. Watukku apa i Mama inai, isudde lai ya'u inai. Suapan tampa i Mama matana'a, isudde lai ya'u maapulu matana'a. Walahanni Mama, udde lai walahangku. Ruata apan sassubbanni Mama, udde lai sarun subbangku.

GALATIA 6:16

Su taumata apan mabbiakka ringannu ṛingidda udde, aroddi lai su anambon al᷊aṛṛana'u Ruata, i ya'u mangngantima Ruata sarun mangonggolu paddarame wuṛṛu al᷊aman-Ne.

MATIUS 12:30

Taumata apan tawe manamba'a si Ya'u atonna-tonna i tou lullawangnga si Ya'u. Wuṛṛu taumata apan tawe mallal᷊ima si Ya'u atonna-tonna i tou manggohakku manara-U!

YESAYA 59:17

I tou nappaattu atatul᷊idda wuṛṛu asasal᷊amatta ere laubba atta'a wuṛṛu araposa waja. I tou mappulu mangapia olangnge udde wuṛṛu mabbal᷊issa apan tawe su atatul᷊idda.

1 TAWARIKH 2:17

I Abigail naawingngi Yeter papapulunni Ismael. Itarua naasomba sangkatou ana'a esakka aranne i Amasa.

2 MARARATU 10:5

Ana waugu udde tembonannu wal᷊en araratuanna wuṛṛu tembonannu soa suadio'a ringannu manga matatimmadu soa wuṛṛu manga mabawuwunna ana'i Ahab udde nangirimmu watti'a indi si Yehu, “Yami uasuṛṛubbawa si Tuanga wuṛṛu walate i Tuanga mandolokki yami. Yami tawe mamile sisai-sai maola'a ratu. Ola'e apa apan mapia tumuṛuttu aellegi Tuanga.”

2 MARARATU 9:32

I Yehu naningngara watukku aui sungketa, wuṛṛu nabbisara, “Isai uasamba'a si ya'u?” Naaringikka udde, darua ara'e tatallu mamanaran araratuanna nangintanno lai.

1 MARARATU 9:22

Taumatan Israel tawe niola'i Salomo allangnga; i mangitou niapamanara maola'a tantara, piaṛṛa'u tantara, tembonannu tantara, piaṛṛa'u keretan pangalo, wuṛṛu tantara uasa'e awal᷊o.

ZAKARIA 8:23

Su manga allo udde siri mapul᷊o taumata raho sarun dumanta ringannu sangkatou taumatan Yahudi wuṛṛu mabbisara, ‘I yami mappulu maauntunnga ere i yamiu; ana waugu i yami naaringikka manungku Ruata nangal᷊amatta si yamiu.’ ” Mawu Apan Lembontaṛṛino buatte nabbisara.

2 SAMUEL 19:13

I Daud nandolokki mangitou lai niapawal᷊o si Amasa arendi, “Wal᷊inewe i'o hawe'u? Manattakka orassa indi ya'u mamile si'o maola'a tembonannu tantara ipallol᷊ossa si Yoab. Antimanna Mawu mamate si ya'u amungkangu olangnge indi tawe niola'u!”

2 SAMUEL 15:21

Arawe i Itai sinumimbakka, “Apan Awantuhanne, ringannu arannu Mawu apan wiakka wuṛṛu ringannu niawan Tuangku, su al᷊awo'u tampa rantanni Tuangnga, allangngu lai tumantalongnga, salaiwe ete uasaruanna papate.”

2 SAMUEL 5:2

Ro'en dorone, ewe'e lai sutempo i Saul ta'e uaparenta si yami, masokka lai i Tuangnga mamiaṛṛa'u tantaran Israel napawe inaite mapapangalo, see lai Mawu buatte naddiandi si Tuangnga manungku ete i Tuangnga apan mamiaṛṛa'u al᷊aṛṛanang-Nge wuṛṛu maola'a ratun mangitou.”

1 SAMUEL 22:7

i tou nabbisara su manga tembonannu tantarane udde, “Paddaringikka, ei manga taumatan Benyamin! Apa i Daud udde sarun mangonggollu wawail᷊anna wuṛṛu waillu anggore si yamiu? Apa i yamiu sarangkanambone sarun pileanna maola'a tembonanne sulal᷊ummu tantarane?

1 SAMUEL 8:12

Sambageanganna nipilene maola'a piaṛṛa'u saṛṛiwu su atoune, wuṛṛu ingana'a waine su lima ṛasutta su atoune. Ratu udde sarun mamata'u manga anangngu mammasolla wawil᷊anne, mangammullu hessin pangitinganna, mallanginnu manga lutangnga wuṛṛu manga aola'u keretan pangalone.

MAL᷊AṚṚUUNGNGA 13:25

wuṛṛu napawe i tou uatana'e su paddasanannu ruanganni Dan, apan addone suwallatu Zora wuṛṛu Esytaol, Ghaṛṛahon Mawu mannattake mangngonggolu atatohassa si tou.

1 SAMUEL 16:4

I Samuel tinumuṛṛutte wisaran Mawu. Napawe i tou na'omate su Betlehem, manga piaṛṛa'u soa nanal᷊oho ringannu niṛṛumindu'a wuṛṛu naiwal᷊o, “Darantan Papa ini uaapiddu al᷊amatta?”

1 TAWARIKH 11:11

Piaṛṛa'u tantara apan paarorone eteudde i Yasobam taumatan Hakhmoni, i tou piaṛṛa'u “Triwira”. Su paassa sulal᷊ummu sambau pangalo i tou nando'appa 300 su atoune wuṛṛu namate si mangitou ringannu wangkaone.

1 TAWARIKH 12:17

I Daud naisasomban mangitou wuṛṛu nabbisara, “Amungkangu i yamiu rumanta maola'a hawe ana see mantul᷊ungku, wette pa'ammul᷊a'e ringanni yami. Yami manal᷊oho si yamiu ringannu naungnga mal᷊uassa. Arawe amungkangu i yamiu pia pandumma mandal᷊eo si ya'u su seetta, salaiwe i ya'u tawe na'ola'a al᷊al᷊eo si yamiu, Ruata apan sassubbannu al᷊amonan kite udde masingkatta, ne i Tou sarun makkuumanni yamiu.”

1 SAMUEL 16:5

I Samuel sinumimbakka, “Ore, atonna. I ya'u nirumanta mangonggollu sasamba su Mawu. Ne paawaresite watanganni yamiu tadea'u wotongnge maaranta su darohan sasamba udde.” Isai wuṛṛu manga anangnge lai nirolokka niapawaresi watanganne sambau-sambau wuṛṛu niaparanta su daroha udde.

1 SAMUEL 24:12

Pa'ellege, Iamangku! Pa'ellege piṛṛissu juban Tuangnga niponggo'a apan aagasannu allangngu indi! Allangngu wotongnge mamate si Tuangnga, arawe allangngu tumba'u namonggo'a addio'a pentakku juban Tuangnga. Nariaddi nasemakke manungku alangngu tawe pandumma lal᷊eo ara'e mamate. I Tuangnga mangngenggenna mamate allangngu, salaiwe allangngu tawe sal᷊ane saran kadio'a su saruanni Tuangnga.

1 SAMUEL 24:13

Antimanna ete Mawu apan makkawessa isai suwallatti addua apan nassal᷊a! Ete Mawu antimanna apan mabbal᷊issa inolanni Tuangnga su saruannu allangngu, arawe saran kadio'a allangngu tawe nanaddu'a naungngi Tuangnga.

1 SAMUEL 24:16

Mawu sarun maola'a mallaṛṛuungnga suwallatti Tuangnga wuṛṛu allangngu. Antimanna i Tou mamarikissa hatto indi, wuṛṛu manamba'a allangngu see lai manal᷊amatta allangngu wuassi Tuangnga.”

2 MARARATU 10:15

I Yehu nanassukku amatanne. Su tangngan dal᷊anna, i tou sinal᷊ohoanni Yonadab ana'i Rekhab. I Yehu nattabea wuṛṛu nabbisara, “Wal᷊inewe i ite naungnga sambua? I'o maapuluwe mallal᷊ima si ya'u?” “Ore,” sasimbakki Yonadab. “Amungkangu aroddi, wette iaddua ma'a'agasse lima,” sasimbakki Yehu. Ne itarua na'a'agasse lima, wuṛṛu i Yehu nantul᷊ungi Yonadab sinuma'e sulal᷊ummu keretane,