1 PETRUS 1:13 - WUKE SUSI WATTI'U AL᷊AL᷊USASSA

¹³ Ana waugu udde, ṛinone i yamiu sidutu uariaga. Paatehamma wuṛṛu pangantimpe atonna-tonna su al᷊amatta apan sarun ionggola si yamiu su tempo Mawu Yesus rumanta apia.

1 PETRUS 1:13 Referans Kwoze

1 PETRUS 5:8

Ṛinone i yamiu paatehamma wuṛṛu paariagga! Ana waugu Setanna udde seetti yamiu. I tou ere singa u'amatta mammal᷊intadu runia lapiddu mannuntingikka maddea'a pabbawiakke.

LUKAS 12:35

“Paatehamma sumaruanna al᷊awo'u hatto. I yamiu ṛinone sidutu uasaddia ualluṛṛen laubba wuṛṛu sol᷊onu sidutu rare'omanna,

1 PETRUS 4:7

Sarangkanambone maraniten panginsueanne, ana waugu udde ṛinone i yamiu ua'ul᷊inna apulun wadangnga wuṛṛu uariagga, tadea'u i yamiu wotongnge umal᷊iomanna.

1 PETRUS 3:15

Arawe sulal᷊ummu naungngu, ṛinone i yamiu mangonggolu addatta si Kristus sassane ana waugu i Tou Mawu. Wuṛṛu ṛinone i yamiu siddutu uasaddia sumimbaka anambon taumata apan maiwal᷊o si yamiu su ola'u antimma apan tatahuannanni yamiu.

IBRANI 9:28

Aroddi lai i Kristus tumba'u paassa tinantilla maola'a sasamba ipanubussa rosan anambon taumata. I Tou sarun dumanta apia su aruane, wal᷊ine manginsue hatton paddarosa, arawe manal᷊amatta manga taumata apan uaraṛṛaddo daranta-Ne.

1 YOHANES 3:3

Anambon taumata apan pia antimma indi su saruanni Kristus, mandiagga ririne tadea'u atonna-tonna susi, waresi wuassu rosa ere lai Kristus udde lai susi.

2 TIMOTIUS 4:8

Wuṛṛu orassa indi lal᷊antaku auntunganna uaraṛṛaddo sia'u. Su Allon Kiamatta, Mawu, Mallaṛṛuungnga apan matul᷊idda udde sarun manantillu lal᷊antake udde si ya'u, ana waugu i ya'u mabbiakka uaaukka ringannu Ruata. Wuṛṛu wal᷊ine tumba'u i ya'u sassane apan manengkamma lal᷊antake udde, arawe lai anambon taumata apan uaraṛṛaddo darantan Mawu ringannu ahewallu naungnga.

EFESUS 6:14

Ṛinone i yamiu mangke uatehamma. Paata'e tatuṛṛuta su Ruata maola'a aiitta lawassa, wuṛṛu atatul᷊idda maola'a laungngu wuassu atta'a.

1 KORINTUS 1:7

na'oman sara i yamiu tawe atalannu al᷊amatta, tantal᷊anna i yamiu uaraṛṛado Mawun kite Yesus Kristus rumanta wuṛṛu ellehannu anambon taumata.

LUKAS 17:30

Aroddi lai olangnge su allon Ana'u Taumata iapaal᷊iatta'a.

IBRANI 10:35

Ana waugu udde, arie naungnga maadio'a, ana waugu amungkangu i yamiu sidutu mangngimanna, ne pia lal᷊antakke apan bahewalla su inolaannu udde!

IBRANI 6:19

Antimmi ite udde ere wal᷊ango apan ual᷊abinga mal᷊al᷊umma wuṛṛu maola'a sambau pangangal᷊eanna apan matohassa wuṛṛu tawe singkal᷊one su pabbiaṛṛani ite. Antimma udde nallapasa su lal᷊indumu Wabbo'a Lembon Susi su Wal᷊e Mawu su surga.

IBRANI 3:6

Arawe i Kristus matuṛṛuta ere sangkatou Ana'a apan uariaga Wal᷊en Ruata. Wuṛṛu ete i ite indi Wal᷊en Ruata, amungkangu i ite sidutu maṛṛimadda wuṛṛu sidutu mangngimanna maasomba apa apan aantimanni ite.

2 TIMOTIUS 4:5

Salaiwe aroddi, i'o ṛinone uaparenta watangannu sulal᷊ummu al᷊awo'a apan mariaddi. Paasabare sulal᷊ummu asasusa, ola'e manaranu mabatti'u Watti'u Al᷊aluassa udde wuṛṛu amata'e ringannu mapia-pia manaranu ere sangkatou mangangimbe Ruata.

1 KORINTUS 13:13

Nariaddi, su orassa indi pia tatallu inolaanna apan sidutu a'olaanni ite: pangangimanna, pangangantimma wuṛṛu uararangngu. Ahunanne wuassu tatallu udde eteudde mandangngu taumata waine.

ROMA 13:13

I ite ṛinone ma'ola'a inolaanna apan aaddatanna ere su inanaramanne a'olaannu taumata su tempo allo; imbaṛṛangnga maddamea tumaniten manampal᷊iu, ara'e mabbu'anna. Imbaṛṛangnga sumandaga, ara'e pia pallal᷊agu tawe addane. Imbaṛṛangnga mabbawul᷊o, ara'e mangune.

AYUB 40:7

Ana see Mawu nabbisara si Ayub, “Saruante si Ya'u ere sangkatou esakka, wuṛṛu simbakke manga aiwal᷊o-U indi.

2 TESALONIKA 1:7

Wuṛṛu si yamiu apan orassa indi uatataṛṛanga – aroddi lai si yami – Ruata sarun mangonggolu al᷊al᷊uassa su allo Mawu Yesus sumossokka wuassu surga wuṛṛu mamasilom batangan-Ne ringannu manga mala'ekatta apan matohassa,

YEREMIA 1:17

Pandiahite, Yeremia! Roote wuṛṛu pasingkata'a si mangitou, sarangkanambone apan Ta'u nirolokka si'o. Arie mata'utti mangitou, tadea'u i'o tawe Ta'u olaanna lembon matta'utta lai sumaruanna si mangitou.

YESAYA 11:5

I tou mammanara ringannu matul᷊idda wuṛṛu satia sulal᷊ummu al᷊awo'a.

1 MARARATU 18:46

Orassa udde i Elia naasomba atatohassa wuassu Mawu. I tou nangal᷊aissa jubane ire'e wuṛṛu niwa'issa su lawassa ana see tinumal᷊angnga nalliuṛṛoro si Ahab su al᷊o'engngu lal᷊anna naddatingngu ngaran passalangannu soan Yizreel.

SASABANGNGA 12:11

Su tempo umanna i yamiu uapeddete peddetu amatanna, ringannu silope su ledda wuṛṛu ta'inna su lima. I yamiu rinone paasaṛṛawutta umanna. Eteudde ramean Paskah ipangadatta si Ya'u, Mawu.

AYUB 38:3

Orassa indi, saruante si Ya'u ere sangkatou esakka, wuṛṛu simbaṛṛete manga aiwal᷊o indi.

2 MARARATU 4:29

I Elisa nanaile si Gehazi ana see nabbisara, “Paal᷊ihakka! Anute ta'ingku wuṛṛu inaite asal᷊a su wal᷊en Inanga indi. Arie pattaala mattabea sisai-sai apan massombanu su lal᷊anna. Amungkangu taumata mattabea si'o, paal᷊ihakka mabbal᷊issa tabbeane. Napawe na'omate, pasaṛawutta mangaddon ta'ingku indi su wadangu ana'a udde.”

LUKAS 17:8

Asinungka tawe! Ewe'e i tou mabbisara mangangimbene, ‘Saddiae anna i ya'u. Palluṛṛeten laubba waresi wuṛṛu riagaite i ya'u umanna wuṛṛu ma'inumma, wua'udde wotongngete i'o umanna!’

ROMA 8:19

Ahewallu pati'uppu runia uaraṛṛado ringannu ṛintulu tempone Ruata mapaal᷊iatta'u al᷊aṛṛanang-Nge.

KOLOSE 3:4

Ne, punnu wiakku apan tutune eteudde Kristus wuṛṛu napawe i Tou asiloanna, ne i yamiu lai sarun rumanta suadio'a ringanni Tou sulal᷊ummu atatulide!

1 PETRUS 1:10

Asasal᷊amatta indi apan a'inunuanna wuṛṛu sassaṛṛasirannu manga nabi, wuṛṛu i mangitou ma'innau al᷊amatta apan ionggolu Ruata si yamiu.

1 PETRUS 5:12

Sura'u apan maautta indi ta'u niwoṛṛeta si yamiu ringannu sasumbalan Silas, apan aantimangku sangkatou tuṛṛangnga Saṛṛani apan matuṛṛuta. I ya'u maapulu mangonggolu sasasa si yamiu, wuṛṛu manohassa pangangimanni yamiu manungku apa apan ta'u niwoṛṛeta indi watti'a atonna su ola'u darangngun Duata. Ṛinone i yamiu mangke uaantimma su darangngu udde.

MATIUS 20:4

Ne nabbisarate i tou si mangitou, ‘Roote yamiu pammanara su waillu anggore'u. I Ya'u sarun mamaekka si yamiu ringannu lal᷊antakke su ṛinone.’