1 KORINTUS 5:1 - WUKE SUSI WATTI'U AL᷊AL᷊USASSA

¹ I ya'u atonna buatte naaringikka alae manungku su wallatti yamiu pia pallal᷊agu sussandaga apan nipangillembo; Piaddu su wallatti yamiu apan sinumandaga ringannu uatangnge. Manga taumata apan wagga ma'illal᷊a Mawu lai maddiri ma'ola'a pallal᷊agu udde!

1 KORINTUS 5:1 Referans Kwoze

SONDAPPA 21:8

Arawe taumata matal᷊o, taumata mandalal᷊eo, taumata mawunga, taṛṛa pate, taumata masandaga, taumata apan mappaattu wal᷊i'i mata, massubba paal᷊uanna, wuṛṛu taṛṛa wahia, sarun iramme sulal᷊ummu tahal᷊oangngu putungnga wuṛṛu belerangnga apan lukkenggama, eteudde papate aruane.”

SONDAPPA 2:21

Suete Ta'u nionggol᷊annu tempone i tou mawal᷊u wuassu manga rosane, arawe i tou maddiri mamallosu inolaanne sussandaga udde.

KOLOSE 3:5

Ana waugu udde, tantanga'e paa'apulun dunia apan maawinasa ririnu, ere sandaga, manga inolaanna apan tawe matataṛṛino, apulu naungnga, tawe masabare, apulu apan lal᷊eo, wuṛṛu awawal᷊iu (ana waugu awawal᷊iu udde nassul᷊ungngu massubba paal᷊uanna).

EFESUS 5:3

Ete i yamiu udde al᷊aṛṛana'u Ruata. Ana waugu udde, manga inolaanna sussandaga wuṛṛu ipaaddirin Mawu, ara'e awawal᷊iu tawe ṛinone olaanna su wallatti yamiu. Arie ma'oman sara taumata waine pia sasimbakka ipabbisara manungku i yamiu ma'ola'a inolaanna ereudde lai.

IMAMATTA 18:8

Imbaṛṛangnga mallobbosa iamangngu ringannu matatamba sangkatou suwallatu awingnge waine.

GALATIA 5:19

Apulun pallal᷊agun taumata nilumiatta'a sulal᷊ummu manga inolaanna apan lal᷊eo, nallal᷊uhuranna, wuṛṛu tawe su ṛinone;

1 TESALONIKA 4:7

Ruata mammaggo si ite, wal᷊ine tadea'u see i ite mabbiakka sussandaga, ewe'e tadea'u i ite mabbiakka maal᷊uassa naungngu Ruata.

2 KORINTUS 12:21

I ya'u mata'utta amungkangngu su tempo i ya'u rumanta Ruata sarun mapaawawo'u su saruanni yamiu wuṛṛu i ya'u sarun lumuai ana waugu manambo su wallatti yamiu dorone marosa, tawe mawal᷊u, wuṛṛu tawe mangillol᷊o ma'ola'a manga inolaanni mangitou apan sussandaga, nagal᷊imutanna wuṛṛu tawe su ṛinone.

1 KORINTUS 6:18

Pangindaute manga inolaanna sussandaga. Ana waugu anambon dosa waine apan niola'u taumata, nariaddi su liuddu wadangngu taumata udde. Arawe taumata apan sussandaga, udde mangal᷊ene ma'ola'a rosa lai su wadangnge sassane.

1 KORINTUS 6:13

Piaddu lai mabbisara manungku anna tumba'u hunane su tianna, wuṛṛu tianna nissaddia pangadoannu anna. Arawe itarua udde tawe ipaattu Ruata. Wadangngu taumata tawe wotongnge ipaatta ipa'ola'a sandaga, ewe'e tumba'u hunane ipamantuga Ruata. Wuṛṛu Mawu sarun mappadul᷊i wadangnga udde.

1 KORINTUS 6:9

Massingkate i yamiu manungku manga taumata apan tawe tumuṛṛutta apulun Duata, tawe maola'a al᷊aṛṛana'u Ruata? Arie aawusuanna! Manga taumata apan sussandaga, manga taumata apan massubba paal᷊uanna, apan mannalangnga wawine, apan ma'ola'a inolaanna apan maasili su sansul᷊ungnge,

1 KORINTUS 5:11

Pandumangku eteudde, manungku i yamiu arie paggawen taumata apan mangnga'u watanganne taumatan Saṛṛani, arawe taumata udde masandaga, ara'e wal᷊iu, ara'e massubba paal᷊uanna, ara'e taṛṛa umbilangngu taumata waine, ara'e taṛṛa wu'anna, ara'e taṛṛa ta'o. Uma'ianna umanna ringannu taumata udde arie lai!

WATTI'U MANGA RASUL 15:29

imbaṛṛangnga umanna anna apan suete pinassubba paal᷊uanna; imbaṛṛangnga ma'inumma ṛaṛṛa, imbaṛṛangnga uminassa ṛemessu winatangnga nate niattongnga, wuṛṛu paaraun inolaanna apan lal᷊eo. Amungkangngu i yamiu mangindaun watanganni yamiu wuassu manga inolaanna udde, i yamiu suete na'ola'a apapia. Na'omate isindi, tabea!”

WATTI'U MANGA RASUL 15:20

Arawe i ite ṛinone mamoṛṛettu suratta si mangitou tadea'u i mangitou tawe umanna anna lal᷊eo apan suete pinassubba paal᷊uanna, ara'e inassa wuassu ṛemessu winatangnga apan nate niattongnga, ara'e ma'inumma ṛaṛṛa. Wuṛṛu lai tadea'u i mangitou mapaaraun batanganne wuassu manga inolaanna apan lal᷊eo.

YEREMIA 2:33

I yamiu pande atonna mangatokku a'alla ipamol᷊engnga naungngu manga arangnguannu. Wawine masandaga al᷊eoanne lai ta'e wotongnge mabbalajare wuassi'o!

2 KORINTUS 7:12

Nariaddi, salaiwe i ya'u suete namoṛṛettu suratta udde, i ya'u namoṛṛetta, wal᷊ine ana waugu taumata nassal᷊a udde. Wal᷊ine lai ana waugu taumata apan uatataṛṛanga pasasal᷊a udde. I ya'u namoṛṛettu suratta udde tadea'u su saruannu Ruata i yamiu maatutukka sassane aroddi ahewalle naungngi ami si yamiu.

1 KORINTUS 1:11

Ana waugu, manga taumata wuassu amonanni Kloë nangalae si ya'u manungku pia pattatiakka su wallatti yamiu.

AMOS 2:7

I mangitou mangngallangnga taumata lome wuṛṛu tawe maal᷊ore, wuṛṛu nallinbuakka taumata asiangnga. Iamangnga wuṛṛu ana'a natatamban allangnga wawine apan uasul᷊ungnga, na'oman sara nandal᷊eo arang-Ku, apan susi.

YEHEZKIEL 16:47

Nawusatewe i'o uatantuṛṛutta ual᷊aṛṛeggenna lempangngi mangitou wuṛṛu mangaṛṛussa pallal᷊agu mangitou apan ma'arantinna udde? Taambe! Tate mal᷊annu lai i'o ewe'e a'atambannu al᷊al᷊eone wuassi mangitou.

TAHIUL᷊E 27:20

‘Niawontohante taumata apan mangadio'a hagurangnge ana waugu nassawa suwallatu sangkatou awingngu iamangnge.’ ‘Amin!’

TAHIUL᷊E 22:30

Tawe saran sangkatou apan botongnge mangal᷊uandaga hagurangnge ringannu matiilla suwallatu sangkatou awingngu hagurangnge.”

YEHEZKIEL 22:10

Piaddu mammono'a wuṛṛu mattiilla ringannu inangnga uatangne, wawine apan a'amatannu radda'u wawine,

1 TAWARIKH 5:1

I Ruben eteudde ana'i Yakub pahul᷊une. Arawe ana waugu i Ruben buatte nandal᷊eo arannu sangkatou awingngu iamangnge waine, ne pussa'ane sangkatou ana'a pahul᷊u niul᷊eanna wuṛṛu nionggola si Yusuf. Salaiwe aroddi atohassanne wuassu wallattu papapulunni Yakub wal᷊inewe ruanganni Yusuf ewe'e ruanganni Yehuda. Ewe'e lai dorone naola'a ratu su ahewallu Israel eteudde wuassu ruanganni Yehuda udde.

2 SAMUEL 20:3

Napawe i Daud na'omate su wal᷊en araratuanne su Yerusalem, siri mapul᷊o nia'i apan nitantangnge iapariaga wal᷊en araratuanna, niapatana'i tou su wal᷊en apan lal᷊u'arannu mandariaga. Hausanni mangitou mangke nisuungnganna, arawe tawe saran paassa i Daud natiilla ringanni mangitou. Nariaddi i mangitou udde niṛṛambatta wuṛṛu i mangitou mabbiakka ere wawine wal᷊u ma'oman sara mate.

2 SAMUEL 16:22

Nariaddi, i Absalom niolaanna rasanna su wowon atuppu wal᷊en araratuanna apan maratakka udde. Ana see ringannu wawialannu anambon taumata i Absalom sinumutta sulal᷊ummu rasanna udde wuṛṛu natiilla ringannu manga nia'in iamangnge.

1 SAMUEL 2:24

Ariete pa'ola'a aroddi ana'u. Tumaniten dal᷊eo atonna inolaanna apan ipagahatton walahannu Mawu su ola'i yamiu!

IMAMATTA 20:11

Sangkatou esakka apan natatamba ringannu sangkatou awingngu iamangnge, nangaṛṛo pussa'an hakku iamangnge. Esakka wuṛṛu wawine udde ṛinone iṛṛuumanna pateanna. Itarua nate ana waugu pasasalan tarua sassane.

PANDARIADDI 49:4

I'o hampa umio'a naal᷊ihidda ua'e, na'oman sara wal᷊inewe paarorone; ana waugu i'o natiilla ringannu awingku waine, i'o na'ola'a angngo su tatiil᷊annu iamangngu.

PANDARIADDI 37:2

wuṛṛu ete indi watti'u amonanni Yakub. Su tempo i Yusuf, ana'i Yakub uukke mapul᷊o pitu su tonnane, i tou uapadul᷊i ammul᷊annu ambinga domba suadio'a ringannu manga iaangnge, eteudde ana'i Bilha wuṛṛu i Zilpha, ruan katou awingngu iamangnge waine. I tou nangalae su iamangnge inolaanna lal᷊eo apan niola'u manga iaangnge.

PANDARIADDI 35:22

Tantal᷊anna i mangitou uatana'a su tampa udde i Ruben natiilla ringanni Bilha, awingngu iamangnge su liudde. Olangnge udde niasingkatanni Yakub, wuṛṛu i tou nasa'u atonna. I Yakub uatahuanna siri mapul᷊o dua ana'a esakka.

2 KORINTUS 2:5

Amungkangngu pia taumata apan nallaṛṛa'u asasusa, ne olangnge udde niola'i tou wal᷊ine tuddane si ya'u, ewe'e su tuṛṛangnga sarangkanambone ara'e asinungka sangkadoanna wuassu tuṛṛangnga. I ya'u maddiri tumaniten maṛṛagissa si tou.