1 KORINTUS 4:20 - WUKE SUSI WATTI'U AL᷊AL᷊USASSA

²⁰ Ana waugu amungkangngu Ruata mamarenta pabbiaṛṛannu sangkatou taumata, olangnge udde aatialanna wuassu atatohassu pabbiaṛṛannu taumata udde, wal᷊ine ana waugu manga wisarane.

1 KORINTUS 4:20 Referans Kwoze

1 KORINTUS 2:4

Watti'a apan ta'u niapaasingkata si yamiu tawe ta'u niwatti'a ringannu al᷊awo'u wisara apan ipammono'a tumuṛṛutta apanden taumata. I ya'u mabbatti'a udde ringannu lal᷊anna apan mappatiala manungku Ghaṛṛahon Duata uataṛṛino.

1 TESALONIKA 1:5

Ana waugu i yami namasingkatu Watti'u Al᷊al᷊uassa si yamiu wal᷊ine tumba'u ringannu wisara, arawe lai ringannu taṛṛino wuṛṛu Ghaṛṛahon Duata. Wuṛṛu i yami mangngimanna atonna atatul᷊iddu Watti'u Al᷊al᷊uassa udde. I yamiu masingkata ereapa i yami mabbiakka ana waugu i yamiu su tempo i yami uatana'a su pattanganni yamiu.

ROMA 14:17

Ana waugu amungkangngu Ruata mangatokku pabbawiakku sangkatou, apa apan wotongnge annananni tou ara'e inumanne, tawe tumanin mahuna. Ahunanne eteudde manungku taumata udde tuttuṛṛutta apulun Ruata, maapendamma al᷊al᷊uassu naungnga wuṛṛu mannengkamma al᷊al᷊uassa apan nionggolu Ghaṛṛahon Ruata.

ROMA 1:16

I ya'u mangngimanna atonna Watti'u Al᷊al᷊uassa udde, ana waugu Watti'a udde atatohassu Ruata ipanal᷊amatta anambon taumata apan mangngimanna; paarorone taumatan Yahudi, wuṛṛu walahanna waine lai.

ROMA 15:19

wuṛṛu manga al᷊aṛṛindu'a wuṛṛu manga inolaanna apan wahewalla; sarangkanambone udde wuassu taṛṛinon Ghaṛṛahon Ruata. Watti'u Al᷊al᷊uassa su ola'u Mawu Yesus suete ta'u niapaasingkatta su anambon taumata, nanattaka wuassu Yerusalem na'oman sara watukku Ilirikum.

1 KORINTUS 1:24

Arawe su taumata apan buatte niwagoannu Ruata – mawae ete taumatan Yahudi ara'e wal᷊ine Yahudi – watti'a udde maola'a lal᷊annu Ruata mapaal᷊iatta'u taṛṛino wuṛṛu apande-Ne.

2 KORINTUS 10:8

I ya'u tawe masili amungkangngu i ya'u mannamboanna mamarabungan taṛṛino apan buatte nionggolu Mawu si yami, ana waugu taṛṛino udde nionggola ipangapia si yamiu, wal᷊inewe ipandal᷊eo.