1 KORINTUS 15:45 - WUKE SUSI WATTI'U AL᷊AL᷊USASSA

⁴⁵ Sulal᷊ummu Wuke Susi uawoṛṛetta arendi, “Taumata paarorone eteudde Adam, naola'a riadianna apan wiakka,” arawe Adam panginsueanne eteudde Ghaṛṛaho apan mangngonggolu wiakka.

1 KORINTUS 15:45 Referans Kwoze

YOHANES 5:21

Iamangnga udde mapaawangunnu taumata nate, wuṛṛu mangngonggolu wiakka tutune wuṛṛu mal᷊annu-l᷊annu; aroddi lai Ana'a mangngonggolu wiakka tawe panginsueanne su taumata apan maapulu onggol᷊annu wiakka.

PANDARIADDI 2:7

Wua'udde Ruata nanganu leta'a sangkompenga, niola'a nabbal᷊i sangkatou taumata, ana see napaasabangu singangu apan mangngonggollu wiakka sulal᷊ummu loṛṛangu ngirunne; ne nabbiakke taumata udde.

ROMA 8:2

Ana waugu titan Ghaṛṛahon Duata apan na'ola'a si ite mabbiakka su sambau ringannu Mawu Yesus Kristus apan suete napaal᷊iu'u wuassu tita apan maarosa wuṛṛu maa'ate.

YOHANES 6:63

Apan maawiakka taumata eteudde Ghaṛṛahon Ruata. Atatohassu taumata tawe gunane. Manga wisara apan niwisara-U si yamiu indi eteudde wisara Ghaṛṛahon Ruata wuṛṛu manga wisara apan mangngonggolu wiakka.

YOHANES 14:6

Mawu Yesus sinumimbakka, “Ete i Ya'u lal᷊anna ipa'illal᷊a Ruata wuṛṛu see maasomba wiakka. Tawe saran sangkatou wotongnge rumanta ringannu Iamangnga, amungkangngu tawe umamatta lumiu si Ya'u.

YOHANES 6:57

Iamangnga apan wiakka udde, nandolo-U wuṛṛu i Ya'u lai mabbiakka sulal᷊ummu Iamangnga. Aroddi lai taumata apan umanna ṛeme-U sarun mabbiakka wuassia-U.

YOHANES 6:33

Ana waugu roti apan nionggolu Ruata eteudde i Tou apan nirumanta wuassu surga wuṛṛu nangonggolu wiakku taumata su runia.”

YOHANES 6:54

Taumata apan umanna ṛeme-U wuṛṛu ma'inumma raṛṛa-U maatahuanna wiakka tutune wuṛṛu saran mal᷊annu-l᷊annu wuṛṛu i Ya'u sarun mapaawiakki tou apia su Allong Kiamatta.

SONDAPPA 22:17

Ghaṛṛahon Ruata wuṛṛu Ma'a'awingnga Wawine nabbisara, “Wette!” Suapan taumata apan naaringikka indi ṛinone lai mabbisara, “Wette!” Isai apan marou, ṛinone i tou rumanta! Wuṛṛu isai apan maapulu, ṛinone i tou manganu ua'e apan mangonggolu wiakka udde ringannu tawe bawaekke.

SONDAPPA 22:1

Mala'ekatta udde namantingida si ya'u sal᷊ukka apan ua'ene mangngonggolu wiakka. Sal᷊ukka udde sussal᷊endapa naal᷊ihidda kristal wuṛṛu mangngelekka wuassu adderan araratuannu Ruata wuṛṛu Ana'u Domba udde,

SONDAPPA 21:6

See i Tou nabbisara, “Nasuete! Ete i Ya'u paarorone wuṛṛu pangudusanne; ete i Ya'u Mawu apan wuassu Panattaṛṛanne ma'omam Panginsueanne. Suapan taumata marou, Ta'u iapa'inumma ringannu tawe bawaekke, wuassu al᷊imatan ua'e apan mangngonggolu wiakka.

KOLOSE 3:4

Ne, punnu wiakku apan tutune eteudde Kristus wuṛṛu napawe i Tou asiloanna, ne i yamiu lai sarun rumanta suadio'a ringanni Tou sulal᷊ummu atatulide!

FILIPI 3:21

Wadangngi ite apan lome wuṛṛu wotongnge maṛṛenessa indi, sarun wal᷊uanni Kristus maola'a ere wadang-Nge sassane apan mawantuga. I Tou wotongnge ma'ola'a udde ana waugu I Tou uatahuanna taṛṛino mapassuṛṛubawan sarangkanambone.

ROMA 5:21

Ne, i ite ṛinone mate ana waugu i ite ma'ola'a rosa. Arawe Ruata mandangngu si ite wuṛṛu nangonggolu lal᷊anne si ite mabelengnga apia ringanni Tou. Wuṛṛu ana waugu paa'aukki ite ringannu Ruata naola'e mapia, i Tou nangonggola apia wiakka tutune wuṛṛu saran mal᷊annu-l᷊annu si ite sulal᷊ummu Yesus Kristus Mawun kite.

ROMA 5:17

Ana waugu pasasal᷊an sangkatou, papate nangeṛṛon taumata nambo wuassu taumata sangkatou udde. Lembon ahewal᷊anne lai wawal᷊issu apa apan niola'u sangkatou taumata waine lai, eteudde Yesus Kristus. Sulal᷊ummu Mawu Yesus Kristus, Ruata buatte nangal᷊amatta anambon taumata, wuṛṛu ringannu tawe bawal᷊inne madea'a i mangitou masasangkapia apia ringannu Ruata; i mangitou sarun mamarenta su runia indi sulal᷊ummi Kristus.

WATTI'U MANGA RASUL 3:15

Manga tuṛṛangnga namate si Tou, sumbal᷊i ete i Tou punnu wiakku taumata nambo. Wuṛṛu Ruata suete napaawiakki Tou apia wuassu papate. Wuṛṛu i yami suete naasilo sassane olangnge udde.

YOHANES 14:19

Tate mal᷊annu runia maasilo si Ya'u. Arawe i yamiu sarun maasilo si Ya'u. Wuṛṛu ana waugu i Ya'u wiakka, i yamiu lai sarun mabbiakka.

YOHANES 10:28

I Ya'u mangngonggolu wiakka tutune wuṛṛu saran mal᷊annu-l᷊annu si mangitou, wuṛṛu sarangkal᷊o'engnge i mangitou tawe mate. Tawe saran sangkatou apan botongnge mangaṛṛo si mangitou wuassu lima-U.

YOHANES 10:10

Taṛṛa ta'o rumanta tumba'u manna'o, mamate, wuṛṛu manggohakka. Arawe i Ya'u nirumanta tadea'u taumata maasomba wiakka – wiakka apan tawe masue.

YOHANES 6:68

“Mawu,” wisaran Simon Petrus si Tou, “ringanni sai yami sarun inai? Wisara Mawu mangngonggolu wiakka tutune wuṛṛu saran mal᷊annu-l᷊annu.

YOHANES 4:14

“arawe taumata apan ma'inumma ua'e apan Ta'u ionggolla, i tou tawe marou saran mal᷊annu-l᷊annu. Ana waugu ua'e apan sarun Ta'u ionggolla udde maola'a al᷊imatang kua'e sulal᷊ummu wadangnge apan sumabangnga su liudde wuṛṛu mangonggolla si tou wiakka tutune wuṛṛu sara mal᷊annu-l᷊annu.”

YOHANES 4:10

Mawu Yesus sinumimbakka, “Unnu wisara i'o masingkattu aonggolu Ruata wuṛṛu isai madorongnga ma'inumma ringannu, i'o sassane lai sarun madorongnga si Tou ma'inumma, wuṛṛu i Tou sarun mangonggola si'o ua'e apan wiakka.”

YOHANES 1:4

Ṛengetanna udde punnu wiakka, wuṛṛu wiakka udde mannemakka taumata.

SONDAPPA 16:3

Napawe wua'udde mala'ekatta aruane nallal᷊innu lal᷊oṛṛon cawanne su tahal᷊oangnga. Ne ua'en tahal᷊oangnga nabbal᷊i ere ṛaṛṛan taumata nate, wuṛṛu natete manga riadianna apan mabbiakka sulal᷊ummu tahal᷊oangnga.

1 KORINTUS 15:46

Apan nirumanta paarorone eteudde ola'u wadangnga, wal᷊ine ola'u ghaṛṛaho. Ghaṛṛaho nirumanta sal᷊immurine.

IBRANI 9:14

nangilembote lai ṛaṛṛan Kristus! Sulal᷊ummu Ghaṛṛaho awasa, i Kristus nanantillu watangan-Ne sassane su Ruata maola'a sambau sassamba apan nasuungnga. Ṛaṛṛa-Ne mammaresi lal᷊ummu naungngi ite wuassu lal᷊aghun agama apan tawe gunane, tadea'u i ite wotongnge maapangimbe Ruata apan biakka.