1 KORINTUS 14:3 - WUKE SUSI WATTI'U AL᷊AL᷊USASSA

³ Mawal᷊i'a, taumata apan mammasingkatu watti'a wuassu Ruata, namasingkattu watti'a udde lai su taumata; ipannohassa pangangimanni mangitou, ipangonggolu sasasa si mangitou wuṛṛu ipallimbata naungngi mangitou.

1 KORINTUS 14:3 Referans Kwoze

1 KORINTUS 14:12

Su ola'i yamiu sassane, i ya'u masingkata manungku i yamiu maapulu atonna-tonna maasomba al᷊amatta wuassu Ghaṛṛahon Duata. Arawe lembon apianne, ṛinone i yamiu madea'a mappaattu apandenu mantul᷊ungngu jamaatta ana see aatambanna apiane.

1 TIMOTIUS 4:13

Tantal᷊anna udde, ma'oman sara i ya'u rumanta, i'o ṛinone paaṛṛimadda mabbasan Wuke Susi su saruannu manga taumata, wuṛṛu mannasa si mangitou wuṛṛu mangngaṛṛa'a si mangitou.

YUDAS 1:20

Arawe i yamiu manga tuṛṛangku, paddul᷊ianete siddutu wiakku sulal᷊ummu pangangimannu si Yesus Kristus. Pangangimannu udde lembon susi. Tantal᷊anna udde aal᷊iomante ringannu Taṛṛinon Ghaṛṛahon Duata,

TITUS 1:9

I tou ṛinone uaaggasa atonna al᷊aṛṛa'a apan wotongnge apangimananna, ere lai suete niaṛṛa'a si tou. Ringannu aroddi i tou wotongnge manantiro taumata ringannu al᷊aṛṛa'a su ṛinone, wuṛṛu mapaal᷊iatta'u pasasal᷊a manga taumata apan lullawangnga si Tou.

EFESUS 6:22

Ana waugu udde i ya'u nandolokki tou ringanni yamiu mamasingkatu ola'i ami si yamiu sarangkanambone, tadea'u naungngu mal᷊uassa.

2 TIMOTIUS 4:2

Ṛinone i'o mamasingkatu watti'a wuassu Ruata udde, wuṛṛu sidutu mammata'a tadea'u taumata maddaringikka, apa i mangitou maapulu ara'e maddiri. Ṛinone i'o mapaangimannu taumata, manta'en pasasal᷊a, wuṛṛu mangonggolu sasasa si mangitou. Aṛṛa'ete taumata ringannu anambon asasabbare.

TITUS 2:6

Aroddi lai, tantiroi lai manga al᷊aṛṛana'a umbasana tadea'u i mangitou lai masiṛṛungnga.

1 KORINTUS 14:31

Ringannu atokke aroddi, manga tuṛṛangnga sarangkanambone, sangkatou ringannu sangkatou wotongnge mapaasingkatu Watti'u Ruata; tadea'u sarangkanambone wotongnge manengkamma al᷊aṛṛa'a wuṛṛu maola'a lembon mangngimanna.

1 KORINTUS 14:26

Nariaddi, manga tuṛṛangnga, apa atappasanne sarangkanambone udde? Amungkangngu yamiu maammula massubba Mawu piaddu mangngantari, piaddu mangngaṛṛa'a, piaddu lai mammasingkatu pandumannu Ruata, piaddu mabbisara sulal᷊ummu sasinaukka apan maaṛṛindu'a, wuṛṛu piaddu mannal᷊a'a apa apan iwabbisara udde. Arawe sarangkanambone udde ṛinone olaanna ipangaṛṛa'a wuṛṛu ipangngapia sarangkanambone.

ROMA 14:19

Ana waugu udde pandumanni ite ṛinone sidutu su manga inolaanna apan mandantan paddarame wuṛṛu uatatul᷊ungnga.

WATTI'U MANGA RASUL 13:15

Napawe Wuke Musa wuṛṛu Wuke Manga Nabi niwasate, manga piaṛṛa'u wal᷊em pattataṛṛamawuanna udde nandolokku taumata iapaiwal᷊o si Paulus wuṛṛu manga hawene, “Manga tuṛṛangnga, amungkangngu tuṛṛangnga pia sambau al᷊aṛṛa'a su manga taumata indi, wal᷊oa'e al᷊aṛṛa'a udde.”

TITUS 2:9

Manga allangnga ṛinone masallunga mawune, wuṛṛu maal᷊uassa naungnge sulal᷊ummu al᷊awo'u inolaanna. I mangitou tawe wotongnge manompolla,

1 TESALONIKA 2:3

Yami nangahe si yamiu wal᷊ine sambau inolaanna apan niumal᷊iwu; wuṛṛu lai wal᷊ine ringannu pandumma apan wengkola wuṛṛu ipangngawusu.

1 KORINTUS 10:23

Unnu taumata, “I ite wotongnge ma'ola'a al᷊awo'u apa ipaapulun kite.” Atonna! Arawe tawe anambon apa ipaapulun kite udde pia gunane. “I ite wotongnge ma'ola'a walate naungngi ite” – arawe tawe sarangkanambone ipaapulun kite udde maatamba pabbiaṛṛani ite.

1 PETRUS 5:12

Sura'u apan maautta indi ta'u niwoṛṛeta si yamiu ringannu sasumbalan Silas, apan aantimangku sangkatou tuṛṛangnga Saṛṛani apan matuṛṛuta. I ya'u maapulu mangonggolu sasasa si yamiu, wuṛṛu manohassa pangangimanni yamiu manungku apa apan ta'u niwoṛṛeta indi watti'a atonna su ola'u darangngun Duata. Ṛinone i yamiu mangke uaantimma su darangngu udde.

IBRANI 13:22

I ya'u sumal᷊ande tadea'u i yamiu tumuṛṛutta manga tatantiro'u indi ringannu masabare, ana waugu sura'u indi tawe tumaniten mal᷊o'e.

IBRANI 10:25

Ṛinone i ite sidutu ma'ammula suadio'a, wuṛṛu imbaṛṛanga wolo'a ere taumata waine. I ite ṛinone lembon satia wuṛṛu uatatohassa, ana waugu i ite masingkata manungku tate mal᷊annu lai Mawu sarun dumanta.

TITUS 2:15

Tantiroa'e sarangkanambone udde, wuṛṛu aṛṛa'ete see tagguete manga maddararingikka si'o ringannu saṛṛaungnga. Arie mapaawalan saran sangkatou mangaddio'a si'o.

1 TIMOTIUS 6:2

Manga allangnga apan mawune taumatan Saṛṛani, tawe wotongnge mangngaddio'a mawune ana waugu i mangitou labbisa taumatan Saṛṛani. Ewe'e ṛinone i mangitou mangimbe mawu mangitou udde ringannu lembon apiane lai, ana waugu mawu apan a'imbeanna ringannu mapia, eteudde sambau taumata mangngimanna apan arangnguanna. Sarangkanambone indi ṛinone iaṛṛa'a wuṛṛu itantironu.

1 TIMOTIUS 1:4

Wal᷊oa'a si mangitou tadea'u ariete lai maddaringikka manga wa'e wuṛṛu manga watti'u arariaddiannu walahanna apan tawe panginsueanne. Sarangkanambone udde tumba'u mandantan pabbawawul᷊o, wuṛṛu tawe mappaamattu pandumannu Ruata apan tumba'u wotongnge aillal᷊anna sulal᷊ummu pangangimanna si Tou.

2 TESALONIKA 3:12

Wuassu taṛṛino Mawu Yesus Kristus i yami nandolokku manga taumata udde wuṛṛu niapaanaungnga, tadea'u i mangitou mammanara ringannu matammuda wuṛṛu maddea'a wiakki mangitou sassane.

1 TESALONIKA 4:18

Ana waugu udde, ṛinone i yamiu uatatohassa naungnga ringannu mappaamattu manga wisara indi.

1 TESALONIKA 4:1

Panginsueanne manga tuṛṛangnga, i yami suete nanul᷊ada si yamiu su ola'u ereapa i yamiu ṛinone mabbiakka malluassa naungngu Ruata. Atonna i yamiu suete nabbiakka ereudde. Arawe orassa indi sulal᷊ummu taṛṛinon Mawu Yesus, i yami sumal᷊ande si yamiu wuṛṛu mamata'i yamiu tadea'u i yamiu lembon maddea'a lai olangnge udde!

1 TESALONIKA 3:2

tantal᷊anna i yami nandolokku tuṛṛangi ite Timotius. I tou sangkatou mamamanara Duata apan mammanara suadio'a ringanni ami mammasingkatu Watti'u Al᷊al᷊uassa su ola'i Kristus. I yami nandolokki Timotius ringanni yamiu tadea'u i tou mannohassa si yamiu wuṛṛu mangonggolu sasasa si yamiu ana see lembon mangngimanna lai si Kristus.

1 TESALONIKA 2:11

I yamiu masingkata manungku i yami ma'ola'a si yamiu sambau-sambau ere sangkatou iamangnga mammadul᷊i al᷊aṛṛanangnge.

KOLOSE 4:8

I ya'u nandolokki tou ringanni yamiu pandumanne tadea'u i yamiu maasingkata ola'i ami wuṛṛu i yamiu iapaal᷊uassa.

EFESUS 4:29

Amungkangu i yamiu maggahatto, arie mappaattu wisara lal᷊eo. Pappaatten manga wisara apan mannantiro wuṛṛu mantul᷊ungnu taumata waine. Manga wisara ereudde sarun mapaarantan apapia su manga taumata apan naddaringikka.

2 KORINTUS 2:7

Orassa indi yamiu ṛinone mangampunga si tou wuṛṛu mangonggolu sasasa lai si tou tadea'u i tou tawe tumaniten masusa naungnge ma'oman sara tate antimma saran kadio'a.

2 KORINTUS 1:4

I Tou mannohassa naungngi yami sulal᷊ummu asasusa apan aapendamanni ami, tadea'u ringannu atatohassa apan nisengkammi yami wuassu Ruata udde, i yami lai wotongnge manohassa naungngu taumata nambo sulal᷊ummu asasusa.

1 KORINTUS 14:17

Salaiwe aal᷊iomanna aadiangkamanna su Mawu udde lembon mapia, arawe aal᷊iomannu udde mangke tawe gunane saran kadio'a su taumata waine.

1 KORINTUS 8:1

Orassa indi su ola'u anna apan nionggola maola'a sasamba su paal᷊uanna. Atonna ere unnu wisaran taumata, “I ite sarangkanambone pandete.” Arawe apapande ma'ola'a taumata mabbal᷊i mawunga, arawe paa'akkana mangngapia taumata.

ROMA 15:2

Arawe i ite sambau-sambau ṛinone malluassa naungngu tuṛṛangngi ite su apapiane, tadea'u pangngangimanne aatambanna atohanne.

ROMA 12:8

Taumata apan pia asingkatta mangngonggolu sasasa su taumata waine, ṛinone atonna-tonna mangonggolu sasasa su taumata waine, taumata apan pia al᷊amatta mantul᷊ungngu taumata waine ringannu darotongnge, ṛinone ma'ola'a udde ringannu naungnga mawawo wuṛṛu mal᷊uassa. Taumata apan pia asingkatta mammiaṛṛa'a, ṛinone atonna-tonna mammiaṛṛa'a. Taumata apan pia al᷊amatta mamasilon darangngune su taumata waine, ṛinone ma'ola'a ringannu naungnga mal᷊uassa.

WATTI'U MANGA RASUL 15:32

I Yudas wuṛṛu i Silas, apan nabi lai, mal᷊annu uahahatto manga tuṛṛangnga apan mangngimanna su Antiokhia udde wuṛṛu nangonggolu sasasa wuṛṛu awawaṛṛani si mangitou.

WATTI'U MANGA RASUL 14:22

Su manga soa udde i mangitou mannohassa naungngu mallal᷊aṛṛenggennu Mawu Yesus wuṛṛu mannantiro mallal᷊aṛṛenggenna udde tadea'u sidutu mangngimanna Mawu Yesus. “I ite ṛinone matataṛṛangnga rorone, wakkute udde i ite wotongnge mamendamma al᷊al᷊uassa su Runian Wakku Ruata,” aroddi manga rasul udde mangngaṛṛa'a manga mallal᷊aṛṛenggennu Mawu Yesus su soa udde.

WATTI'U MANGA RASUL 9:31

Ne jamaatta su ahewallu Yudea, Galilea, wuṛṛu Samaria nadamete. Ringannu pammamanaran Ghaṛṛahon Ruata, wuṛṛu matta'uttu Mawu, manga jamaatta udde lembo natohassa wuṛṛu a'atambanna anambone.

LUKAS 3:18

Ete aroddi i Yohanes mannantiro taumata ringannu al᷊awo'u al᷊aṛṛa'a su tempo i tou mabatti'u Watti'u Al᷊al᷊uassa.

IBRANI 3:13

Nariaddi, tadea'u tawe saran sangkatou wuassu wallatti yamiu apan awono'annu rosa na'oman sara lumawangke Ruata, ṛinone i yamiu uatataggu su miallo-miallo tantal᷊anna i ite ta'e mabbiakka su tempo apan isassago “Allo Indi” sulal᷊ummu Wuke Susi.

WATTI'U MANGA RASUL 4:36

Aroddi lai i Yusuf. I tou lai nabal᷊u'u leta'a, see roinne niapiddi tou wuṛṛu tinantilla su manga rasul. I Yusuf indi sangkatou wuassu papapulunni Lewi wuassu Siprus; manga rasul mammago si tou lai i Barnabas (atappasanne Mallal᷊uassa).