Yerusale mangantoʼo, “Mawongko-wongko rayaku ua i Pue, madonde rayaku ua i Pue. Ewa tumpungkoro tuama pai weʼa ndapatakaka parewa ngkadolidi paka magaya, ewancetumo i Pue mampaporengkoka baju ngkatesorepaka pai penangi.
Meruu pai inceʼe da mawongko rayata woʼu kono kapande ndaya mPue Ala anu tongawa ri Pueta i Yesu Kerisitu. Maka mampojaya i Yesu Kerisitu, kita wawaseʼi reʼemo ri pokenta anu meawa pai i Pue Ala.
Ntanoka kitamo yau anu mantarima popasuna anu monco, banya tau seʼe. Kita manyomba ri Pue Ala ua popanini Inosa mPue ngkalio-A, pai tapokawongko ua kita sambaʼa-mbaʼa pai i Kerisitu Yesu. Kita bareʼe mantanje waʼa wawai anu napareʼe ntolino.
Paikanya, peunde tila i mPue Ala, anu bareʼe bali-bali mamponinika kami melinja sangkani-ngkani ri raya mpenangi i ngKerisitu. I Pue Ala mampake kami da naka nuntu kono i Kerisitu tolele ewa pasoa anu mawongi ri sambawo lino.
Mbolimo i Pue Ala, anu mawaika kita kalindo ndaya, da mampapewali komi ewa tau anu monco-monco kojo da tuwu podo tila i mPue Ala. Mbolimo i Pue Ala da majagai komi, madago inosa, tanoana pai koromi, painaka bareʼe da reʼe posarinya ri tempo ngkarata muni mPueta i Yesu Kerisitu.