DANIELI 2:47 - Sura Magali Nuntu Ngkatuwu

⁴⁷ Ndatoʼo i datu, “Monco kojo Danieli. Pue Ala puemu setu maʼai ngkabangke ungka ri Pue Ala. Sira anu makuasa ri wawo waʼa datu, pai mampatongawa mpengaya-ngaya rahasia. Inceʼe tongawamo ri pangkotomu mantotoraka posoki rahasia seʼi.”

DANIELI 2:47 Referans Kwoze

DANIELI 2:28

Paikanya ri suruga reʼe Pue Ala anu mampatongawa mpengaya-ngaya rahasia, pai Sira anu roo mantoʼoka komi nunjaa anu da mewali ri reme ripuri. Mewali seʼi-seʼi mbolimo ndiwai tempo ri yaku da mantotoraka pangipi pai pepatongawa anu nditarima ri sindara ngkayoremi setu.

DANIELI 2:22

Sira anu mampatongawa rahasia anu maʼai ngkatesambuni. Sira ndaincani pura-pura anu mewali ri raya mbani. Sira nakulamuti rara anu mangkido.

AMOSI 3:7

I Pue Anu Ndate ri Peawanya bareʼe da mawianaka bara nunjaa-njaa ntano bareʼepa ndatoʼo rencana ri waʼa nabi watuaa.

DANIELI 11:36

Datu ntana utara da mowia gori mpepokono ndayanya. Ri pobangke-bangkenya da natoʼo kasiʼanya anu meruu ngkabangkenya pai lamoa mbeʼi ntano, sako pai Pue Ala Anu Nate ri Peawanya siʼapa anu meruu ngkabangke. Siʼa da nakoto mowia ewanceʼe rantani pura karau ndaya i mPue Ala. Maka nunjaa anu roo ndapakanoto i mPue Ala sangaya-ngaya da tewianaka riunya.

Ulang 10:17

I Pue Ala puemi reʼe ri wawo pura-pura lamoa pai meruu ri mpengaya-ngaya kuasa. Sira Pue Ala anu bangke pai makuasa anu sangaya-ngaya da ndapue. Sira mayoa pai bareʼe woʼu ndapokono mantarima pekanarasi.

Pangkita 19:16

Ri jubanya pai ri paʼanya lau teʼuki toʼo seʼi, “Datu ri waʼa datu, pai Pue ri waʼa ntua.”

Pangkita 17:14

Tau seʼe da moʼiwali maewa i Ana Bimba setu. Paikanya i Ana Bimba setu pai waʼa anagurunya anu todo anu roomo napeboo pai napilisi setu da manganangi waʼa datu setu, maka Siramo Pue nu waʼa mpue, pai Datu nu waʼa datu.”

Pangkita 1:5

pai ungka ri Yesu Kerisitu sabi anu todo pai manoto. Siramo anu riu-riunya ndapatuwu muni ungka ri kapate, pai Siramo anu Makuasa ri wawo waʼa datu ri lino seʼi. I Yesu mampotowe kita, pai ua kapate-A Sira malapasakamo kita ungka ri waʼa ncalaata.

1 Timotius 6:15

Karata-A tepakanoto ri tempo anu ndapakanoto i mPue Ala ngkalio-A. Sira ngkalio-A anu mangkekeni kuasa; Sira meawa, Datu ri wawo waʼa datu, pai Pue ri wawo waʼa anu napue ntau.

DANIELI 2:37

Komi pue datu anu meawa, datu ri waʼa mokole; komimo anu meruu ngkakuasami, i Pue Ala ri suruga mangawaikamo komi kadatu seʼi, kakuasa, karoso pai peawa.

Masmur 136:2

Pontarima kasemo ri Pue Ala Sira sambaʼa-mbaʼa; towe-A bereʼe kapusanya.

Masmur 82:1

Polinga i Asapi. I Pue Ala mantadulakoni gombo mpue ri suruga, nepa ndapareʼe pobotusia:

Masmur 72:11

Pura-puraa mokole mombukotu manyomba ri suaraa, pura-pura banca da mewali anamayununya.

Pomulanya 41:39

Inceʼe painaka natoʼo i datu ri Yusupu, “I Pue Ala anu mangantoʼoka siko, mewali inceʼi katogawanya siko anu meruu ngkataja ponawa-nawamu pai kaloʼemu ungka ri waʼa ntau pura-pura.

DANIELI 4:32

Siko da ndairi ungka ri oyo ntolino, pai da tuwu sangkani-ngkani pai pinatuwu ri pada. Ri raya anu papitu ntaʼu kasaenya siko da mangaande ewo ewa japi. Roo setu nepa da nuʼaku Kaʼi Pue Alanya Anu Ndate ri Peawanya anu makuasa ri wawo ngkamokole ntolino pai kamokole setu da ndawaika isema ntano anu ndapilisi.”

DANIELI 4:17

Incetumo botusi mami, kami waʼa malaʼeka anu tikali pai mainga-inga mpaliu. Tinako ndaya mami inceʼemo da naka waʼa ntau ri mbeʼi ntano kareʼenya da mangaʼaku, i Pue Ala Anu Ndate ri Peawanya, makuasa ri wawo ngkuasa kamokole ntolino pai kamokole setu da ndawaika isema ntano anu ndapilisi, bara ri tau anu bereʼe kojenya ntano!’

DANIELI 2:19

Ri wengi setu seʼe i Pue Ala mangantoʼo rahasia setu ri Danieli ri sangaya pepatongawa. Inceʼe painaka naunde i Danieli i Pue Ala anu ri suruga,

AYUBI 12:19

Ndapetikodi waʼa ntadu mpanyomba pai waʼa ngkabosenya.

Yosua 22:22

“Anu Makuasa inceʼemo i Pue! Anu Makuasa inceʼemo i Pue! Sira maincani wenu painaka kapowia inceʼi! Ane rapanya tinako ndaya mami mampowia inceʼi ua da maewa i Pue bara ua bareʼemo kaaya Sira, mbolimo kami mate iseʼi seʼe!

DANIELI 4:25

Komi da ndairi ungka ri oyo waʼa ntolino pai da tuwu ri oyo waʼa mpinatuwu ri pada. Ri raya anu papitu ntaʼu kasaenya komi da mangaande ewo ewa japi pai da yore ri tongo mpada, painaka da nayoʼosi ndini. Roo setu komi da mangaʼaku kaʼi Pue Alanya Anu Ndate ri Peawanya anu makuasa ri wawo ngkamokole ntolino, pai kamokole setu da ndapepombaika ri sema ntano anu ndapilisi.

1 Korintus 14:25

Pura-pura waʼa anu tesambuni ri rayanya ndapatongawa, painaka mampapaepeka siʼa kasalaanya pai mapakalauka koronya nepa manyomba ri Pue Ala. Tau setu da mangaʼaku kamonconya i Pue Ala lau ri oyomi.

Masmur 136:3

Pontarima kasemo ri Pue Anu Makuasa; towe-A bereʼe kapusanya.

YEHESIKIELI 26:7

I Pue Anu Ndate ri Peawanya mantoʼo, “Yaku da mangangkeni i Datu Nebukanesa ungka ri Babeli da mangaungku siko, ee Tirusi. Datu anu maʼai ngkaroso setu da rata ungka ri utara sangkani pai surodado anu sondo, maria nyara pai waʼa ngkareta mpoʼiwali sangkani pai surodado anu monyara.

DANIELI 2:29

Sindara komi ntongo ngkayore, komi mampangipika kono tempo anu nepa da rata. I Pue Ala anu mampatongawa mpengaya-ngaya rahasia ri komi kono nunjaa anu da mewali.

DANIELI 2:30

Rahasia seʼi ndapatongawamo ri yaku, banya ua kayakunya anu meruu ngkaloʼeku ungka ri waʼa ntau ntaninya, paikanya podo da naka ndiincani peola mpangipimi setu pai mangarata ndaya woʼu bangani ndayami.

DANIELI 3:15

Mewali seʼi-seʼi bara tokamo komi da mombukotu pai manyomba ri turuki ri tempo mpowotu musiki? Ane bareʼe ndipokono, komi liu-liu da ndatendeka ri dampu anu mareka-reka apunya. Pai lamoa mbeʼi anu mangkoto da malapasaka komi ungka ri kuasaku?”

DANIELI 3:28

Nepa mompau i datu ndatoʼo, “Undemo i Pue Ala anu napanyomba i Sadara, i Mesa pai i Abenego. Sira mampokaumo malaʼeka-A mancorepaka watua-A tatogo anu meaya ri Sira. Tau seʼe mangalewamo songkaku moruana mate painaka da manyomba bara da mangaunde lamoa mbeʼi ntano, podo ri Pue Ala pue ntau seʼe panyombanya.

DANIELI 3:29

Inceʼe painaka kupesongkaka ri sambaʼa-sambaʼa tau ungka ri banca, lemba banca bara basa nunjaa ntano, anu mampasowa pau pompetikodi ri Pue Ala anu napanyomba i Sadara, i Mesa pai i Abenego, da ndasasa pai banuanya da ndadungkalaka pai da mewali awu. Maka bereʼe lamoa anu mangkoto da mangawianaka nunjaa anu roo ndawianaka mPue Ala setu.”

DANIELI 5:11

Maka ri raya ngkamokole mpueku reʼe sambaʼa tuama anu buke pai inosa waʼa lamoa anu magali. Sindara mpoparenta mpapa mpueku, tau setu tongawa mampotumpu pangaincani, parata ndaya pai loʼe ndaya, anu ewa kaloʼe waʼa lamoa. Papa mpueku Datu Nebukanesa mangalantimo siʼa mewali tadulako waʼa ntau loʼe montonaa, opo-opo, pai waʼa ntau anu maria pangaincani pai loʼe mampeole betuʼe.

2 RAJA-RAJA 5:15

Roo setu mewalili siʼa sangkani-ngkani pai waʼa ntau anu mayunuki siʼa njoʼu ri banua i Elisa. Rata njairia natoʼo i Naʼama ri Elisa, “Seʼi-seʼi manoto ri rayaku, ri sambawo lino seʼi podo sambaʼaja Pue Ala, inceʼemo Pue Ala anu napanyomba nto Isaraeli, inceʼe painaka kuperapi da mabuya rayami mantarima pombaiku seʼi.”

Masmur 96:4

Maka Bangke i Pue, pai maʼai ngkatetubunaka, sangaya-ngaya da ndapokaeka meruu ungka ri waʼa lamoa.