TITUS 2:14 - PERJANJIAN BARU NALCA YUBA

¹⁴ Nuk malya unaʾ nidyaʾ ak ab blebsununaʾ aboka, al nong anyek nunsamba leboka elegosuk. Anadya wera alja mab ok nenewoka, malya unaʾ mekaʾ unggom nimi neniyiwoka, perobnya nenyek, yeng ganya boboka ulunokaʾ aboka, ubsuk.

TITUS 2:14 Referans Kwoze

IBRANI 9:14

hyak nauba ara Kristus eneng ara, nauba so unulusil. Kristus ara, hyak sobaʾ ulumla Geisinya pik uboka, alja nong enyek Imik Neyung ak, mekaʾ diligaʾ orok pam enesoʾ anyek, beibdok. Anedya, Kristus alja eneng edya, nunja ganya salyaʾ hwam ununaʾ ak ab, Imik Neyung embengaʾ ululanya bek giboka welenokaʾ aboka, geisa nenelesil.

EPESUS 2:10

Nu nong ak dara, Imik Neyung adya uyiwousukaʾ ara, Yesus Kristus pik uboka nu meewoka, alja orowek yokaʾ-yokaʾ perobnya nenyek unulumnemak senewoka gegewoka beibsuk nim ek ulumab.

1 PETRUS 2:9

Bok ugun nim enyek dara, seleb orowek Imik Neyung adya weboka dobsuk nim ek ululum. Yuba lenaʾ gak nim ek uboka, geisa sokok nim ek ululum. Imik Neyung amba ok uboka, Imik Neyung alja mabo silibaʾ ululum. Imik Neyung adya ugunuk weboka doboka, gunaʾ lomok abaʾ ara, alja dilinaʾ ak sam yoululum aboka youbusukaʾ ara, alja senenggom ununaʾ enyek ugunja hyak nauba yok nim ek lero yibilulumaʾ aboka anara ubsuk.

1 PETRUS 1:18

Ugunjaʾ neyung yabo youmaʾ ulumek nang edya salyaʾ lelem ulumekaʾ ara, ugunuk lobonggeisikaʾ anyek, loboka blebnesukaʾ amba dara, alja dara hekaʾ adya ugunsamba deksukaʾ ara, ugunda ella ululumaʾ anyaʾ. Alja deksukaʾ ara dangman meilika joboka dengalamlaʾ anasoʾ ak deknenggubsuk,

TITUS 3:8

Ban lebna yub era hyak dib yuba. Nadya senelamnaʾ ara, ban seleb wenyhenya nenyek, yok nimi seleb Imik Neyung ak dib senelemak nimi nidyaʾ ara, perob wa nong enyek hyak duboka yeiriwoka welenokaʾ aboka, hyak nauba so pe neklemnesilim. Ban anaso unaʾ era, nimi nidyaʾ ak dara, perobaʾ ab perobnya neb danyek ulusil.

WAHYU 5:9

Anya sikda wenyok yok ber enyek an wenyaro seblemekaʾ ara, ”Anda seleb objeekanya, an anja eneng edya, anda sik yok-yok nimi yilaʾ ulumakaʾ ak ab, sik yok-yok yuba salamak nim ek ab, sikja nimigumaʾ yok-yok unulumak nim ek ab, sik yok-yok mok soko ulumak nim ek ab dara, Imik Neyung amba dekoka doblum anasa, al anak danyek ban buku kerobaʾ en dobnelamakanya, alja beknaʾ denenaʾ danera, or anja baknelam.

GALATIA 3:13

Imik Neyung yub ek ara, ”Gal ikoka oboka dibeknya bera, weil malyaʾ glokeknya bek ulumla,” aro momnya dobok. Bok wenyek dara, Kristus adya nunsamba weil malyaʾ glokeknya dangasukaʾ adya, nunda unuwanalum an yub ek ab weil malyaʾ gloksukaʾ ak ab, hweboka blebsuk.

GALATIA 2:20

Dara, nadyaʾ youmaʾ ulusenya nek dara, anam embengaʾ unggulumna bok, Kristus anyek nadyaʾ nong lomok wen ulunel. Wera nadya wen embengaʾ ulumna nong enera, Imik Neyung bedya me nek dib senenaʾ adya embengaʾ ulumna. Alda nak wanaʾ uboka, al nonga nasamba somoganyoknya bek dib senewoka embengaʾ ulumna.

1 PETRUS 1:22

Ugunda Imik Neyung yub anyek dib senelelumaʾ adya, ugun nong ara seleb geisa nenebdangoka, neik yuba dololum nim ek ara pe wanaʾ ulusulum. Anasa leboka, ugun moumen pe ganya goluwoka wanaʾ uldalalulum.

RASUL 9:36

Dara onoʾ Yope heikek ara gel hnon, alja si nera Tabita gek ulumok. Dara, alda Yesus ak dib senewoka domok gel ulumok. (Alja si nera Yunani yub adya dara, Dorkas alamek, nera nunja yub era bei busaʾ pam alamab.) Dara, gel gera perobnya nok unuwoka, bonaʾ garan ulumna nim ek arawoka ulusuk.

WAHYU 1:5

Anya Yesus Kristus yuba bojam laga lelesilnya bedya ugunuk ban nidyaʾ elegoka ulusulul. Yesus nong anyek, alak men nimi somoknaʾ ak ab suboka embengaʾ bukiyimoknya uboka, onoʾ al nong anyek nidyaʾ soko dub nang ulumakaʾ sikenek wenewoka bo usinaʾ dubnya ulumla. Dara alak, al Yesus ara nuk wanaʾ uboka, alja eneng edya, nunjaʾ malya unaʾ ak sam ab, blebsuknya bek,

1 YOHANES 3:2

Nadya wanaʾ ulusin hemyabo nim o, nunda wenera Imik Neyung mab ulumab bok, eimik ek dara, hekaʾ huboka ulumnemabaʾ ara, okoka laga danganggulumla. Bok Kristus anyek eimik yanamla dara, alja nong yokaʾ nong ak eibnamabaʾ anasa, nunda also danamab anyek hnonok, ella ulumab.

1 PETRUS 3:18

Anasa leboka, Kristus ara lika hnonok ugunja malya unaʾ amba aboka, malya unggulumoknya benyek malya unaʾ nim emba aboka somogok. Kristus adya ban unuwoknya nera, anadya ugun nong anyek doboka Imik Neyung ak bo busununaʾ aboka ubok. Alda nong bokaʾ ak salyaʾ obek bok, subokaʾ ak dara, ganya ak suboka bukok.

1 PETRUS 2:12

Ugunja nong unaʾ era nimi yuba donggulumak nimi gangganek ara, hyak pe ulululum. Anadya sikja ugunuk ara malya aboka wabnesak bok, ugunja pe ulumunaʾ anyek eibija dara, sikbabya anyek eiyiwoka, Imik Neyung yanamla sum era, Imik Neyung ak gibnemak.

GALATIA 1:4

Nunja malya unaʾ enesa leboka, wen malya unaʾ sokok an ulumabaʾ ak anyeb, blebsununaʾ aboka, nunja Wenelesilnya Yesus Kristus, al nong elekdok. Ban unuwokaʾ ara, nunja neyung Imik Neyung bedya seinimokaʾ sunuwoka unuwok.

IBRANI 10:24

Nunda yok nim ek pe wanaʾ ulunobaʾ aboka wenebdangoka, onoʾ perob unaʾ anyek nauba unubgiga balanobaʾ aboka, nunda pe kemero uldalamnamab.

TITUS 2:7

Anda yokaʾ-yokaʾ nidyaʾ unulumenaʾ ak ara, yok nang edya diliwagenokaʾ aboka, perob ok unululom. Anda yuba neklesimenaʾ ak ara dib nong ok anyek, laga angawoka neklesilom.

1 TIMOTIUS 6:18

Sik dub nim ek, anja dara, perob unaʾ anyek yok nim ek unub elegoka, perobnya nenyek ok nauba unubmoruwoka, ganya lowelelek aboka, heknaʾ hwam ok uboka, yok nim ek eleklesinya ganya bolonokaʾ aboka, wenewoka lelelom.

EPESUS 5:2

Kristus nonga somogokaʾ ara so meklaʾ song anasoʾ ak, Imik Neyung ganya hek elegoka, al nong ara nusamba beibdangoka somogosuk sok, ugunda wanaʾ ganya boboka unura yabalelulum.

YAKOBUS 4:8

Ugunda Imik Neyung berem bumun dara, alda ugun berem yanasil. Ugunda malya unaʾ nim o, ugunja soruk era pe mek elekdolulum! Ugunda ganya penya-penya ululum nim o, ugunja ganya enyek geisa nenebdolulum!

1 TIMOTIUS 2:10

Bok alda saawoka gweidyaʾ dibaʾ subnamlaʾ ara, Imik Neyung ak giboka, alja mabo dangamna nim edya ulumaknya nenyek, ana diligaʾ doboka unulumnemak.

1 TIMOTIUS 2:6

Alda nimi nidyaʾ amba leboka sikja malya unaʾ ak blebsunun badya aboka, alja nong enyek leb elekdonunaʾ aboka, elegesuk. Dara nera, sum enyek unuweisinya senewoka orowek seinimok sum era, yenewoka laga dok dara, al nong elekdok.

1 TIMOTIUS 1:15

Ban yuba nong enyek, hyak dib nong anasa, doboka dib senewanamakaʾ ara ban: ”Yesus Kristus sokok an yeilimokaʾ ara, malya unaʾ nim enyek blebsununaʾ aboka yeilimok.” Dara sik unulumakaʾ gangganek ara, na nong anyek hyak okoka yu hwam malya unaʾanya bek ulumna.

RASUL 15:14

Simon bedya wen nuk lesilaʾ ara, Imik Neyung adya men youboka Yahudi gom nim eneba nadya mabo silibaʾ danok aboka sik gangganek ab hnon seleb domok adya, sikenek diri ulusuk anyek laga amasuknya nenesa lesil.

RASUL 15:9

Imik Neyung ara nub sikeneb weboka boknenggusuk. Alda Imik Neyung ak dib senemekaʾ adya sikja ganya mek elegeiyisuk.

YOHANES 6:51

Imik heikek ab embengaʾ unaʾ gwaneng yinggyukaʾ ara, na nong ulumna. Anasa, heknedya ban gwanenga delenya bera, hyak sob-sobaʾ or ulmoublumnamla. Ban gwaneng era nadya nong ek lemna. Nadya nong ek, ban soko nim emba, nim embengaʾ ulunokaʾ aboka, eleganamnaʾ ak lemna,” hyok.

MATIUS 3:12

Alja gandum hamaʾ webnaʾ anasa aboka seb yaramdenaʾ ara alja soruk ok seleb ulumla. Gandum nong ak dara, denaʾ beilin ek mamagoka beibnamla bok, hamaʾ ak dara, hyak mekaʾ sarangnaʾ orok uk ek sam dabnamla,” hyok.

MATIUS 1:21

Maria gera eimik nengma ak beibnamla. Ban me nenedya alja nimi sikja malya unaʾ ak ab blebnesilaʾ anasa, alja si nera Yesus ak aboka sibnelam,” hyok.

RASUL 20:28

Anasa wera ugun dam nang pe diri bo uldalamunukanya, onoʾ Imik Neyung Geisinya adya ugunuk diri bo ulusinok aboka elegesuk Imik Neyung yuba donaʾ nimi nidyaʾ ak pe diri bo ulululum. Imik Neyung adya, alja me somogok pik uboka, yuba dolomak nang era, Imik Neyung adya alja domba pam dibaʾ dangiyisuk nang anyek, ugunja bo uboka diri ulululum.

EPESUS 1:11

Imik Neyung ara yok-yok wa nidyaʾ welemlaʾ ara, unuwanamna wenyananya nok sunuwoka unulamla. Dara wera, Imik Neyung adya, hyak youmaʾ nong enyek nuk orowek weboka dobsuk. Anadya, Kristus pik uboka nunda Imik Neyung misaʾ seleb domouba.

IBRANI 1:3

Imik Neyung adyaʾ hyak imik senenggom dilinaʾ era, me al nong ulumla. Imik Neyung nonga laga unaʾ dibaʾ ara, Yesus adya unaʾ pik an ulumla. Wera sokok sam ab imik sam hnon nidyaʾ ulumlaʾ amba dara, alda migib yub adya akwaʾ doboka bo ulumla. Yesus ara soko nim emba malya unaʾ ak ab seleb perobaʾ nenebgogowok dara, Imik Neyung hyak imik ululanya beb neikaʾ imik heikek sam nimi wenewoka bo usin ekla bunaʾ ak sam bukok.

1 YOHANES 1:7

Bok Imik Neyung anaba alda dilinaʾ lomok ulumla sok, wera numbabya neikik dilinaʾ ak ulumeibya dara, wera nunda ganya kwebdangoka ulumabakanya, alja me Yesus Kristus adya eneng edya nunja yok-yok malya unaʾ nidyaʾ ara mek elegellilisil.

1 YOHANES 1:9

Nunja malya unaʾ laga lelemeibya dara, Imik Neyung ara bojam uboka, hyak meknenggululanya anasa, alda nunja malya unaʾ meewanasilikanya, nuk malya unaʾ nidyaʾ ak ab geisa neniyiwanesil.