Yohanes 8:12 - O GIKIMOI AWI JAJI ma BUKU

¹² De kagena o Yesus wobicara kali o nyawa yadadalaka wotemo, “Ngohi manena maro o nita moi o dunia ma bi nyawaka. So nakoso o nyawa la imote Ngohi, de ona magena asa o bubutu ma rabaka igoge kawa, duma asa yamake o oho ma duhutu de o nita magena foloisi yadisiwa so igogou aku o Gikimoi winako itiai.”

Yohanes 8:12 Referans Kwoze

Yohanes 12:46

Ngohi manena o nita o dunia ma bi nyawaka, la ma ngale ona magena nakoso Ngohi ipiricayaka, de upa he o bubutu ma rabaka igoge.

Yohanes 9:5

Ma orasi Ngohi kanagasi o dunia ma dokuka, de Ngohi manena todadi maro o nita moi o dunia ma bi nyawaka.”

Yohanes 12:35

So Una asa wotemo onaka, “O nita manena asa igoge iteka kawa dede ngini. So o orasi manena naga bilasu ngini nigoge o nita ma rabaka, nakoso kanena nagasi nginika. Upa sidago o bubutu ngini inisitura, sababu o nyawa nakoso o bubutu ma rabaka igoge gena ona yanakowa kiaka asa ikahika.

Matius 5:14

Ngini manena o bi moi-moi itotiai niasikelelo maro o nita moi yadisiwa o dunia ma bi nyawaka. De imatero lo o doku moi la yahado o tala ma dokuka, gena o nyawa yangodu ka yakelelo.

Yohanes 3:19

Ona yasisala so bilasu dede o Gikimoi imakitingaka, sababu o nita ma duhutu moi o Gikimoino yahino dabolo o duniaka, ma ngale o Gikimoi wasimane o nyawaka. Duma nakoso o nita de o bubutu, la kanaga o bubutu gena o nyawa asa foloi yodupa, sababu ona magena yodupa o dorou yaaka.

2 Petrus 2:4

O bi malaikat ma dorou lo idomaka o Gikimoi wasisa, ena gena waumo de wabui kagena o naraka gena o busune iluluku-luku de dapopuputuka, ma ngale gena itamaha sidago ma wange yaado done asa manga dorou ma sopo wafanggali de o dorou.

Rasul 13:47

Sababu o Gikimoi womisulo ngomi gena komanena, ‘Ngohi tonisitatapu ngona la nodadi maro o nita moi o bi nyawa ma somoaka ngaroko ona magena o Yahudika yasowo, la ma ngale ngona o nyawa yangodu o dunia ma dokuka aku isisalamati.’ ”

Rasul 26:23

ena gena, o Salamati ma Kolano asa iwisangisara gena, Una maro o nyawa moi ma nonomaka wosone duma wooho kali, so komagena o Yahudika ma nyawa de lo o bi nyawa o Yahudika yasowo lo Una wosihabari daboloka, la ona aku yanako itotiai igogou o Gikimoi asa o nyawa wasisalamati.”

Yohanes 14:6

So Una wasingangasu wotemo, “Ngohi manena tomadadi o ngeko o Gikimoika, de o dodoto itotiai gena tadoto la o nyawa aku iwinako itiai, de Ngohi lo o oho ma hutu. Mutuwade kanaga o nyawa nagoona lo yaakuwa yotagi Ai Babaka nakoso ona yoholu Ngohi tangaho, sababu Ngohi gena o ngeko ikokahika Unaka.

Yohanes 7:17

De ngini aku nianako igogou to Ngohi Ai dodoto gena ma sihino o Gikimoino. Sababu nagoona bato, nakoso ona magena yodupa o Gikimoi Awi dupa yamote, de ona magena aku yoise o kia naga Ngohi tadodoto gena asa yanako igogou magena o Gikimoino, so upa itemo Ngohino.

Gogelelo 21:24

De o kota magena maro o nita yadisiwa o bi moi-moi dangoduka, so o bi nyawa yangodu o bi moi-moi itotiai gena aku yaaka. De lo o bi kolano yangodu asa yahino la iwosa, to ona manga horomati de manga kaya masirete magena yaaho de yatide isuba o Gikimoika de lo o Duba ma Gohoka.

Lukas 2:32

O Salamati Una magena maro o nita moi yadisiwa o nyawa manga siningaka kiaka o Israel awi ngopa de awi danoka yasowo. De Una lo womisihoromati ngomi Ani nyawa o Israel to una magena awi ngopa de awi danoku.”

Yudas 1:13

Ona manga manara lo yasimade-madeka, maro o moku-moku dasosihilo irama o teoka so o geko de o reremo yaaho. De ona lo o nyawa yakulai so o Gikimoi lo wimote kawa, maro o bi ngoma so ma dodagi lo itiaiwa. So ma ngale ona magena manga riho kanaga o Gikimoi wosidailako lo daboloka, ena gena o naraka dapopuputuka.

2 Petrus 2:17

O guru ikokulai ona magena ngaroko itemo manga dodoto yadoto ma ngale o nyawa gena yanako idodooha aku ipiricaya de lo yaaka itiai maro o Gikimoi wodudupa, duma igogou komagenawa. Kanaga maro o bi ake ma jobubu, duma ma ake lo ihiwa, de lo maro o bi lobi dataroka, duma o paro dasosihilo yaahoka so imuurawa. We! Imaakaka maro komagena, so ma ngale ona magena manga riho kanaga o Gikimoi wosidailako lo daboloka, ena gena o naraka dapopuputuka.

Yudas 1:6

Bilasu niososiningali o bi malaikat lo idomaka kanaga o sorogaka, ma binuka yamote kawa manga kuasa ma manara o Gikimoino de manga goge o sorogaka lo yodongosaka. O bi malaikat magegena Una wabui o riho dapopuputuka de o rate wasipilikuka so imasose lo yaaku kawa. Kagena wacohono, de itamaha sidago ma wange yaado done asa manga dorou ma sopo wafanggali de o dorou.

Yohanes 12:36

So nakoso Ngohi kanena nagasi gena maro o nita nginika, so bilasu ngini nipiricaya Ngohika la ma ngale ngini asa nidadi maro Ngohi, ena gena aku nianako ma ngale o bi moi-moi itotiai gena o Gikimoika.” Una wobicara dabolo de wotagi womajobo de womamingihuka, so Una ona he wikelelo kawa.

1 Yohanes 1:6

So nakoso ngone la kanaga nanga sininga ma rabaka o Gikimoi powinakowa so o dorou podupa paakasi, upa sidago ngone lo potemo, “Ngohi dede o Gikimoi gena mimarimoika.” Nako komagena, de ngone ka powisihaga de lo paakawa Una Awi dodoto itotiai. Gena imatero bato o bubutu ma rabaka pogogesi.