Yohanes 19:4 - O GIKIMOI AWI JAJI ma BUKU

⁴ Ma moili ma gubernur wosupu o Yahudika manga roririka wotemo kali, “He! Nianano! Nakoso Una magegena, ngohi towisisupu ma ngale gena tinidedemo nginika, igogou Una manena Awi sala moi lo ngohi tamakewa.”

Yohanes 19:4 Referans Kwoze

Yohanes 19:6

Ato o imamka ma bi sahe de manga nyawa yojojajaga iwikelelo, de ona yangodu ka moiye imatoore itemo, “Powisidasangahadi! Powisidasangahadi!” Duma ma gubernur wotemo, “Asitagala! Nako komagena, de ngini Awi nyawa masirete gena niwingaho la niwisidasangahadi. Nakoso maro ngohi to Una Awi sala moi lo tamakewa.”

Yohanes 18:38

De ma gubernur wotemo, “Kanaga itotiai gena o kia.” Dabolo de wosupu so wahika kali o bi Yahudi manga roririka, de wotemo onaka, “Igogou de itero, ma ngale Una magena Awi sala moi lo ngohi tamakewa.

Lukas 23:4

So kagena de o Pilatus o imamka ma bi sahe de lo o bi nyawa yadadala magenaka wotemo, “O nyawa manena Awi sala ka moi lo tamakewa la bilasu wifanggali de o sangisara.”

Lukas 23:47

O prajurit-prajurit manga kapita moi o kia naga idadadi magena wakelelo, de una o Gikimoi wigiliri, de wotemo, “We! O nyawa Una manena igogou Awi sala ihiwa!”

1 Yohanes 3:5

De ngini nianakoka ma Kristus wahinoka la ma ngale o bi dorou moi-moi dangodu gena wasisaka, de lo nako Una gena Awi sininga ma rabaka o dorou moi lo ihiwa.

1 Petrus 3:18

Komagena igogou sababu ma Kristus Una magena, ngaroko Awi dorou moi lo ihiwa, duma wisangisara de wosone ka ma moi ma ngale o nyawa manga dorou dangodu. Una magena wotiai so wodadi o nyawa manga dorou ma dagali moi, la ma ngale ona magena dede o Gikimoi aku imatekekomote. Ma Kristus Awi rohe gena yatoomaka, duma de o Gikimoi Awi Gurumi ma kuasa Una wisioho kali.

1 Petrus 2:22

Una Awi sangisara wamoku, maro kanaga o Gikimoi Awi Jaji ma Buku ma rabaka isilefoka itemo, “Una gena o dorou moi lo waakawa, de o damato moi lo wapetowa.”

1 Petrus 1:19

Duma ma ija gena kanaga o kia naga moi foloisi ihahali, ena gena ma Kristus Awi au masirete. Ma Kristus gena ngaroko Awi sala moi lo ihiwa, duma witooma ma ngale nia dagali moi. Una maro o duba ma goho moi de ma sala eko ma kurangi moi lo ihiwa, la o Yahudika yatola de isisuba o Gikimoika ma ngale manga rohe ma dagali moi la o apongu yamake.

2 Korintus 5:21

Ma Kristus Una gena o dorou moi lo waakawa, duma maro to ngone nanga dagali Una magena o Gikimoi asa wisieto koloko o nyawa ma dorou moi. O Gikimoi waaka komagena, la ma ngale ngone, nakoso ngone de ma Kristus pomarimoika, de o Gikimoi aku wonaeto maro to Una Awi nyawa la manga sininga itiai Awi simaka.

Lukas 23:41

O sangisara ngone inasinoto gena, igogou kanaga inadahe de to ngone nanga manara. Duma Una gena Awi sala lo ihiwa.”

Matius 27:54

Ma kapita moi dede awi prajurit-prajurit o Yesus wijojajaga gena o osu de lo o kia naga idadadi magena yakelelo, de ona yamodo imasidotirineku, de yotemo, “We! O nyawa Una manena igogou o Gikimoi ma Ngopa!”

Matius 27:24

Ma dodoguka o Pilatus womanako una waaku kawa de ma ngeko lo he wosimake kawa, sababu yadadala gena manga galala idogo-dogo de o gangamo he isigoko. So una o ake wadehe de yadadala manga simaka awi gia watiodo de wotemo, “Ai gia tatiodo! La ngini nikelelo ngohi ai sala ihiwa ma ngale o nyawa Una manena niwitooma bai! So ka to ngini nia sala.”

Matius 27:19

So o Pilatus ka wogoge kusi kagena o hakim ma kursika, de ma pedeka ami sosulo imasidiado la mowidedemo unaka, “O nyawa Una Awi sala ihiwa, so upa nowisangisara bai! Sababu ma ngale Una magena so ka putuka o gogiolo ma rabaka de togoruga de ngohi ai sininga foloi isangisara.”

Matius 27:4

Una wotemo, “Awadede! Ngohi o dorou taakaka. O nyawa moi Awi sala ihihiwa gena towisiija sidago Una bilasu wisangisara de iwitooma!” Duma ona iwisango, “Ngomi gena miomaha-mahawa bai! Magena ani sala masirete!”

Ibrani 7:26

So o Yesus gena ma Imam Wilalamo moi ngoneka. Komagena Una gena o Gikimoi ka wisisanangi, de lo Awi sala eko Awi dorou gena moi lo ihiwa. De Una de o nyawa ma dorou imakitingaka, de witide o riho moika kiaka foloisi ikukuruye so foloisi ikuru de o bi moi-moi o kia naga o dipaka, ena gena o sorogaka.

Yohanes 18:33

Dabolo de ma gubernur una magena o kadatoka wowosa de woaso ma ngale o Yesus wingaho de wisirisima unaka, de wotemo, “So igogou Ngona manena o Yahudika manga kolano?”