Yakobus 4:11 - O GIKIMOI AWI JAJI ma BUKU

¹¹ So, ai dodiao nipipiricaya, ngini gena moi de moika bilasu upa nimatekesibicara datorou. Sababu nakoso ngini nia dodiaoka niasibicara datorou de lo niasisala gena, igogou ngini lo asa o Gikimoi Awi bobita nisibicara datorou de lo nisisala. De nakoso Awi bobita nisisala gena, ngini lo asa Awi demo magena niaakawa so niahiri Awi bobita kiaka gena isala.

Yakobus 4:11 Referans Kwoze

1 Petrus 2:1

So ngini o oho ka sidutu ikakali niamamakeka. Komagena so bilasu nia dorou moi-moi gena dangodu niapalako. Ena gena, bilasu ngini upa de nia edekati datotorou o nyawaka, de upa nitodamato, de upa nia lade isago de nitemo nia sala ihiwa, komagena lo upa o nyawa niaduhudu de upa niogaka o nyawa manga ronga ma dorou.

Roma 2:1

Ngini ai dodiao o Yahudika ma nyawa, upa lo nia siningaka nitemo o nyawa ma dorou maro ona magegena bilasu yasisala de manga dorou ma fanggali yamake. Nako komagena, de ngini nitemoli bilasu ngini masirete lo nisisala de nia dorou lo o Gikimoi wafanggali de o dorou. Sababu maro to ona lo de manga sala komagena lo ngini, so akuwa niasitemo, “Ngohi ai dorou moi lo ihiwa.” Maro komagena upa bai!

Yakobus 5:9

De lo ngini gena upa nimaridemo, upa sidago o Gikimoi winisisala de to ngini nia dorou ma sopo gena wafanggali. He! Kanaga o loha de o dorou ma sopo dangodu wafafanggali de Una magena dabolo Awi orasi he idumuka.

Lukas 6:37

“Upa o nyawa niasisala, la ma ngale ngini masirete lo o Gikimoi asa upa winisisala kali. Upa lo nitemo o nyawa o sala yaaaka, so ona magena bilasu yasangisara, la ma ngale ngini masirete lo o Gikimoi asa upa winisangisara kali. O nyawa manga sala gena bilasu niasiapongu, la ma ngale ngini masirete lo o Gikimoi asa winisiapongu kali.

1 Korintus 4:5

So nako komagena, de ngini bilasu upa nimajai-jai o nyawa manga manara ma sopo niatailako. Bilasu niwidamaha o Jou Yesus wahino kali. Sababu Una magena done asa o nyawa manga sininga ma raba de lo ma edekati gena moi-moi wasikelelo. De o orasi magenaka o Gikimoi masirete asa wosimane o nyawamoi-nyawamoi manga giliri itotiai.

Efesus 4:31

So nia sininga ma rabaka ma siri moi-moi bilasu niasisa, ena gena o duhudu, o doosa, de o gangamo. Upa lo nimatekedotoore moi de moika de o ronga ma dorou nimatekekagaka. De lo upa o dorou o kia bato o nyawa niagaka.

2 Korintus 12:20

Ngohi totemo komagena, sababu ngohi tohawateri upa sidago, nakoso ngohi done tahika nginika la ngini tinimake, de kagena nginika maro o kia ngohi tongongano gena ihiwa, de ngohi lo ai sininga nginika gena asa maro ngini niongongano gena ihiwa. Upa sidago ma orasi ngini tinimake, de ngini gena nimatekekangamo, eko nimatekedoosa, eko nimatekeduhudu de nimatekesikoholu. Upa sidago ma orasi ngini tinimake, de ngini gena nia ronga ma dorou nimatekekagaka, eko lo nimacaralamo de nimatekeruwahe.

2 Timotius 3:3

komagena lo o siboso de o dame gena ihiwa manga gianongoruka eko manga dodiaoka, de o nyawa ma somoa manga ronga yoaka datorou, de to ona manga sininga masirete yaparetawa, de ona yatobadoosa de lo o loha yahoholu,

1 Timotius 3:11

Komagena lo manga pedeka bilasu o moi-moi yaaka maro o nyawa aku yahoromati. So upa o nyawa ma somoa yasibicara datorou, duma ona bilasu manga sininga de manga rohe ma nyafusu yapareta daloha, la o nyawa lo aku ona yapiricaya.

Roma 7:7

Nagala o nyawa kanaga itemo, “Nako ani demo magena de ma ngale o bobita o Gikimoino gena nanga dupa inasikelelo sidago o dupa datotorou isigaro la o dorou paaka, so o bobita gena asa datorouka.” De ngohi tosango, komagenawa bai! Duma nako ngohi gena tanakowa igogou asa o dorou taakaka, ka cawali o bobita o Gikimoino ngohi idotoka. Ena gena, ngohi asa tanako igogou nakoso todesere de magena o dorou taaka, ka cawali o bobita o Gikimoino o Musa walelefo itemo, “Upa ngini nitesere.”

Yakobus 1:25

So o Gikimoi Awi dodoto itotiai gena o nyawa manga dorouno yapalako de yasiputuru la aku Unaka iwisigise. De nakoso magena ngone pasikelelo igogou de ngone pomadoto pomatoguwa de lo upa ka poiseka de gila-gila pawosaka, duma o moi-moi dangodu magena la paaka pokaeli, de igogou o moi-moi paaaka magena ma rabaka o Gikimoi Awi laha asa wonasidumu ngoneka.

Titus 2:3

Komagena lo o bi dodihimo o ngopedeka nadoto bilasu manga sininga de o bi moi-moi yaaka itiai de daloha maro o Gikimoi wodudupa, so upa o nyawa ma somoa manga ronga ma dorou yogaka de upa yatobadalu. De bilasu ona yodupa yadoto o bi moi-moi daloloha o ngopedeka ma somoaka.

Yakobus 1:16

So, ai dodiao nipipiricaya de tinidododara, upa sidago ngini lo inikulai. O Gikimoi de o nyawa o dorou wasibaja gena pamakewa.

Yakobus 1:19

He! Ngini ai dodiao nipipiricaya de tinidododara, o moi-moi idomaka o surati manena ma rabaka talefo gena bilasu ngini niosininga. So ngini ningodu o orasi isigeto-geto upasi jai-jai nitoosa, duma bilasu nia dodiao niasigise daloha de lo upasi jai-jai nibicara, duma bilasu idoma nimasosininga kasi.

Yakobus 2:8

De o Gikimoi Awi dodoto ifoloi ilamo gena maro Awi Jaji ma Buku ma rabaka itemo, “Maro ngini nia rohe masirete niadodara, komagena nia dodiaoka lo bilasu niadodara.” De nakoso igogou ngini o demo ilamo magegena la niaaka, de ngini asa niaaka o moi-moi daloloha de itotiai.

Yakobus 5:7

So ngini ai dodiao nipipiricaya, bilasu nia sabari ilamo, ngaroko o sangisara ma rabaka, sidago o Jou done wahino kali de asa niamake o oho ka sidutu ikakali. Hika niakelelo o nyawa itotoro gena asa de manga sabarika, ona yodamaha manga doro done asa ma sopo yautu de yatolomuka, sababu o ino magegena ma faida ilamo. Ona yodamaha sidago o muura ma orasika asa yodato de sidago lo o muura ma orasika asa isopo de magena asa dabolo dangoduka.

Yakobus 5:10

Sababu ngini bilasu niososininga de niamote o Jou Gikimoi Awi nabi idodoma, ona magena lo asa o sangisara ma rabaka de manga sabari ilamo.