Matius 1:1 - O GIKIMOI AWI JAJI ma BUKU

¹ Manena gena o Yesus Kristus Awi sihino yalefo la aku ngone panako, ena gena Yesus Awi topora gena o Daud de o Daud awi topora gena o Abraham.

Matius 1:1 Referans Kwoze

Dodadi 22:18

Sababu ngona noisigise Ngohika, so ma ngale ngona, de ani ngopa, de lo ani danoku so o bi bangsa dangodu o duniaka done asa Ai laha yamake.’ ”

Galatia 3:16

So komagena lo ma orasi o Gikimoi wojaji o Abrahamka, de wosingangasu done asa o bi moi-moi idala wahike unaka de lo Una o Abraham awi ngopa de awi dano moiku. Duma ma ngale ona yadala o Gikimoi wotemowa, cawali wotemo, “ani ngopa de ani dano moiku,” gena ka ma ngale o nyawa womatetengo Una magegena ma Kristus.

Roma 1:3

O habari daloloha gena ma ngale to Una Awi Ngopa, Una magena o Yesus Kristus nanga Jou. De ma ngale Una magena wodadi maro o nyawa moi de Awi rohe gena, Awi sihino kanaga o Daud awi ngopa de awi danoku. Duma ma ngale Una Awi siningaka Awi gogoho o Gikimoino gena, kanaga o Gikimoi wonasinako igogou Una magena o Gikimoi ma Ngopa de Awi kuasa dapoputuru. Komagena wosinako ma orasi Una o sone ma rabano wisioho kali.

Gogelelo 22:16

Ngohi manena, Yesus, la to Ngohi Ai malaikat towisulo una wotagi o bi moi-moi dangodu magena winisingangasu o bi gogobu ningoduka. Ngohi manena o Daud awi ngopa de awi dano, de lo maro o ngoma o koru ngaroko ma orasi o wange ibaoka de kanaga o ngoma magena ka isiwasi.”

Yohanes 7:42

Kanaga ngini nianakowa o Gikimoi Awi Jaji ma Buku ma rabaka isilefo o Salamati ma Kolano gena ma kolano Daud awi ngopa de awi danoku moi. De lo he niawosaka o Daud awi doku gena o Betlehemno. Mutuwade o Salamati ma Kolano gena bilasu o Betlehemka ma nyawa.”

Dodadi 12:3

Nako o nyawa yaaka o loha ngonaka done Ngohi lo Ai laha onaka tasidumu. Nako o nyawa o dorou yaaka ngonaka done Ngohi lo onaka takutuku. Ma ngale ngona so igogou o nyawa o bi doku dangodu yamake Ai laha.”

Rasul 2:30

Mutuwade ma orasi o Daud ka woohosi, una magena o nabi moi de wanako o Gikimoi wojaji sidago lo wosasi o Daudka gena, igogou una awi ngopa de awi dano moiku asa o Gikimoi witide la Una wokolano maro ka o Daud wokolano.

Matius 1:18

O Yesus Kristus Awi sibuo ma jarita gena komanena: Ma awa muna magena ami ronga ongo Maria, muna de o Yusuf gena imabobaika. Duma ona yasinoto ikawi waasi so ona imakiidu waasi, de ongo Maria he moroheka. Ngaroko komagena imaaka, o Yusuf gena igogou-gogou wanakowa ma bobai ongo Maria moroheka gena de o Gurumi Datetebi ma kuasa.

Roma 9:5

De lo to ona manga ete de manga topora gena o nyawa yalalago, ena gena o Abraham, o Ishak, de lo o Yakub. De ma boboloi lo ma Kristus maro o nyawa moi Awi aheli imaketero de ona. Ngaroko komagena, ona iwipiricayawa. Una gena o bi moi-moi dangodu wakolano, ena gena o Gikimoi, so tanu Una magegena powigiliri de Awi ronga posilamo ka sidutu ikakali. Amin.

Roma 4:13

Hika ngini idodomaka niosiningali o Gikimoi wojaji o dunia ma bi doku dangoduka gena o Abraham wihike de lo awi ngopa de awi danoku. Upa sababu o Abraham o Gikimoi Awi bobita o Musa walelefo gena wamote, duma una o Gikimoi wipiricaya so o Gikimoi awi sininga waaka itiai Unaka.

Matius 15:22

De kanaga o ngopedeka moi muna magena o Kanaan ma daerano, so ngaroko o Yahudika ma nyawa misowo. Muna magena mahika Unaka, de momatoore, “Ya Jou, o Daud awi ngopa de awi dano moiku, kodo! Noigalusiri ngohi. To ngohi ai ngopa moi o toka mingosa so mitogosaka.”

Matius 9:27

Kagena de o Yesus womajobo so wahika o ngeko ma soaka, o nyawa manga lako ipipilo yasinoto iwinihi, de ona imatoore, “Ya Yesus, o Daud awi ngopa de awi dano moiku, kodo! Nomigalusiri ngomi.”

Dodadi 2:4

O dipa de o dunia ma sidadi gena komanena: Ma solano de o Jou Gikimoi magena o dipa de o dunia wosidadika

Matius 3:16

Ma orasi o Yesus wiosi dabolo so o Yordan ma Seleraye asa ka wodolaye, de imatodoka o dipa ipelenga de yakelelo o Gikimoi Awi Gurumi iuti imatero maro o namo dara de itangi Unaku.

Dodadi 5:1

Manena gena o lefo o Adam awi ngopa de awi danoku. Gena ma orasi o Gikimoi o nyawa wasidadi de o nyawa magena imatero de to Una Awi jamani.

Matius 1:2

Ma nonomaka o Abraham ma ngopa yanau gena o Ishak, o Ishak ma ngopa yanau o Yakub, de o Yakub ma ngopa yanau gena o Yehuda de lo awi gianongoru.

Lukas 1:33

Una asa wokolano o Yakub awi ngopa de awi danoku wapareta ka ikakali, de Awi pareta gena ma bati lo ihiwa.”

1 Timotius 2:5

Sababu o nyawa yangodu gena manga Gikimoi ka womatengo, de ka cawali o nyawa womatengo wodadi Awi dagali ma ngale o nyawa yangodu, Una magena o Yesus Kristus de Una masirete lo o nyawa moi.

2 Timotius 2:8

Bilasu ngona nosininga o Yesus Kristus, Una magena ma Kolano Daud awi ngopa de awi danoku, wosoneka de o Gikimoi wisioho kali. De o habari magegena tosingongangasu dabolo o nyawaka. Nakoso ani sininga komagena done ngona aku niputuru de nosabari o sangisara namoku.