Lukas 24:39 - O GIKIMOI AWI JAJI ma BUKU

³⁹ Nianano kasi to Ngohi Ai gia de lo Ai dohu, sababu manena Ngohi masirete bai! Nisipada de nisitailako, sababu o toka ma lake de ma kobo gena ihiwa maro kanaga niakelelo Ngohika.”

Lukas 24:39 Referans Kwoze

Yohanes 20:27

Kagena de o Tomaska asa wotemo, “Hika ani raraga kanena nosipada. Nanano kasi to Ngohi Ai gia. De lo Ai alu ma ngunu ma naboka de ani gia nosipada. Bilasu ngona gena ka nopiricaya de lo nododato kawa.”

1 Yohanes 1:1

Ngini ningodu o Gikimoi ma Ngopa niwipipiricaya. Ngohi o surati moi manena tolefo nginika, ma ngale o Yesus Una ma orasi o bi moi-moi dangodu manena ioho waasi, de Una magena he kanaga wooho wodomaka. De Una magena wooho ka sidutu ikakali de Una magena lo o habari daloloha. Una magena ngomi masirete miwigiiseka de miwikokeleloka de mia gia lo miwisipadaka.

Yohanes 20:20

Dabolo de Una Awi gia de Awi alu ma ngunu ma bi nabo wosikelelo onaka. De ona asa yanali ifoloi poli, sababu igogou Una ma Jou gena ona asa iwikeleloka.

1 Tesalonika 5:23

So ngomi migolo tanu o Gikimoi, o sanangi wonahihikeka, Una masirete gena asa waaka so maro Una Awi sininga komagena lo ngini nia sininga dangodu datetebi. Ena gena, migolo tanu ngini ningodu nia fikiri, de nia dupa, de lo nia manara daasu-asu gena Una asa wojaga, la ma ngale ma orasi nanga Jou Yesus Kristus done asa wahino kali, de nia sala moi lo akuwa wamake.

Ibrani 12:9

De lo o dunia manena nanga baba ngone inadoto, de ngone ona gena pahoromati de pasigise. Nako komagena, igogou ngone bilasu powisigise o Gikimoi de ma boloika, Una gena nanga Baba o sorogaka, la ngone aku pooho ka sidutu ikakali.

Yohanes 20:25

Komagena so ona ma binuka gena wisingangasu unaka itemo, “We! Ngomi gena igogou o Jou miwikeleloka bai!” Duma una wotemo, “Nako magena, ngohi topiricaya toholu bai! Ka cawali nakoso ngohi masirete towikelelo to Una Awi gia ma Nabo, kiaka yapapaku, de kagena ai raraga tosipada de lo ai gia masirete tosipada Awi alu ma ngunu ma naboka.”

Rasul 1:3

De wosone daboloka, ma deka o wange moruha Una masoa-masoa womasimane de womasibicara onaka, igogou o Gikimoi wapareta maro o kolano moi, so de ma sababu magena asa womasinako igogou Una wooho kali.

Lukas 23:46

Dabolo de o Yesus womatoore de wotemo, “Baba! Ai gurumi tosisaraha Ani gia ma sohaka!” Wotemo komagena, de wosoneka.

Lukas 24:38

De Una wotemo onaka, “Dadoohaso ngini nimodo de lo nidodato.

Lukas 24:40

Dabolo de Una Awi gia de Awi dohu ma bi nabo wosikelelo onaka.