Lukas 20:17 - O GIKIMOI AWI JAJI ma BUKU

¹⁷ Magena de o Yesus wakeri-keri onaka de wotemo, “Nako komagena, de niawosaka o gimina manena o Gikimoi Awi Jaji ma Buku ma rabaka, ‘O teto o tukang yahoholu de yapapakewa magena done asa isiaka de idadi o tahu ma sosode ma teto ma nonoma.’

Lukas 20:17 Referans Kwoze

Rasul 4:11

Ma ngale o Yesus niwihoholu gena o Gikimoi Awi Jaji ma Buku ma gimina moika asa itemo komanena, ‘O teto o tukang yahoholu de yapapakewa magena done asa isiaka de idadi o tahu ma sosode ma teto ma nonoma.’

Matius 21:42

De Una watemo onaka, “Icala! Ngini ningodu lo niabaca dabolo de niawosaka o gimina manena o Gikimoi Awi Jaji ma Buku ma rabaka, ‘O teto o tukang yahoholu de yapapakewa magena done asa isiaka de idadi o tahu ma sosode ma teto ma nonoma. Magena o Jou Gikimoi Awi manara igogou de ka daloha poli.’ ”

Markus 12:10

Ngini ningodu lo niabaca dabolo de niawosaka o gimina manena o Gikimoi Awi Jaji ma Buku ma rabaka, ‘O teto o tukang yahoholu de yapapakewa magena done asa isiaka de idadi o tahu ma sosode ma teto ma nonoma.

Lukas 22:37

Sababu kanaga isilelefo o Gikimoi Awi Jaji ma Buku ma rabaka itemo, ‘Asa o Salamati ma Kolano wieto maro o nyawa ma dorou moi.’ De o kia naga isilelefo gena bilasu idadi Ngohika, sababu o kia naga ma ngale Ngohi manena isingangasu idomaka isilelefo o Gikimoi Awi Jaji ma Buku ma rabaka, magena o orasi manena he idadi.”

Yohanes 15:25

Duma ona yaaaka magena ka imatero maro o kia o Musa wosilelefoka o Gikimoi Awi Jaji ma Buku ma rabaka gena, kanaga to ona masirete manga bobita o Gikimoino itemo, ‘Ona Ngohi iduhudu, ngaroko Ai sala ihiwa, sidago Ngohi iaka komagena.’

Lukas 24:44

Dabolo de Una wotemo onaka, “Manena o kia naga tinisingangasu nginika, ma orasi idomaka de Ngohi kanaga dede nginisi. O bi moi-moi ma ngale Ngohi, kiaka o Jou Awi bobita o Musa de lo o bi nabi ma somoa isilelefo ma Buku ma rabaka de lo o Mazmur ma Bukuka gena, dangodu bilasu isiganapu.”

Lukas 22:61

de o Jou womabulutu de winano o Petruska. De o Petrus gena womasininga igogou ma nonomasi o Jou asa wisitemo dabolo unaka, “O toko isore waasi, de ngona he nomanosu nosipara ma saange.”

Markus 10:23

La o Yesus womaginano Awi muri-murika, de wotemo onaka, “Igogou! Isusa icarawa o nyawa ikakaya o Gikimoi iwisigise la iwosa Awi pareta ma rabaka.”

Markus 3:5

Ma ngale manga sininga datogoi gena Una Awi sininga isusa. So kagena de Una womaginano ona de Awi doosaka, de wotemo o nyawa awi gia ma sononga isosoneka gena, “Ani gia natoano.” De una awi gia watoa, de o orasi magena dabolo awi gia gena dalohaka.

Lukas 19:41

Ma orasi o Yesus he womasidiado o Yerusalemka, so o doku magena aku wakelelo, de Una asa wogari.

Efesus 2:20

Nako ngone popipiricaya, ngone pomatero maro o tahu moi o Gikimoi wosigogoko. De o Jou Yesus Awi sosulo-sosulo de lo o Gikimoi Awi nabi-nabi ona magena imatero maro o tahu magena ma sosode. Nako o Jou Yesus Awi sosulo-sosulo de lo o Gikimoi Awi nabi-nabi, ona magena imatero maro o tahu ma sosode. De ngone popipiricaya, ngone pomatero maro o tahu moi o Gikimoi wosigogoko ma sosode ma dokuka. De o Yesus Kristus Una magena womasitero maro ma sosode gena o teto ilalamo moi, de ngone gena pomasitero maro o tahu kiaka o Gikimoi wosigoko o sosode magena ma dokuka.

1 Petrus 2:6

Ma ngale ma Kristus wisitetero maro o teto moi o Gikimoi wahihirika, gena igogou, sababu idomaka o Gikimoi Awi demo so ma nabi Yesaya awi buku ma rabaka wosilefo itemo, “He! Kagena o Sionka Una towisulo wokahuku maro o teto ilalamo de ihahali moi, magena tahirika so tahadoku idadi o tahu ma sosode ma teto ilalamo. So o nyawa nagoona nakoso iwipiricaya Unaka, igogou ma moi lo ihiwa manga sininga isitura.”