Lukas 12:19 - O GIKIMOI AWI JAJI ma BUKU

¹⁹ Dabolo de ngohi he tomanara kawa, sababu tadodiahika magena asa foloisi idala, de o taungu muruo naga ma simaka gena ngohi ka toodosi. So ngohi manena aku tobusengi, de ka toodo de toudo, de lo ka torarame bai!’

Lukas 12:19 Referans Kwoze

1 Korintus 15:32

Kanena o Efesus ma kotaka ma moiku de ngohi kanaga o bi nyawa ma dorou tamake, manga edekati gena ngohi ilawangi, maro o haiwani ilalago la kanaga asa igoli. So nakoso ngohi ai oho o dunia manenaka kanaga o sangisara maro komagena tamake de, kodo, magena ma faida asa ihiwa, hitilahi ngohi de ai ngongano la done o soneno asa isioho kali. Duma nakoso idadiwa o nyawa isosone done yasioho kali, igogou foloisi daloha la ngone pooho imatero maro o nyawa itemo komanena, “Hino la o wange manena poodo de poudo la foloi posanangi, sababu nagala ilangi de ngone asa posone.”

Yakobus 5:5

De ngini o orasi manena nioho de nia kaya idalaka de ka o kiasi nionyafusu, so dangodu magena nisitodedeheka. Komagena ngini nimasidailako so done ma orasi ma dodoguka asa nitooma, maro o sapi moi yapiara la dasaki gena done asa yatola.

Filipi 3:19

Ona magena done asa o Gikimoi waumo o narakaku ma bati ka sidutu ikakali. Sababu ona magena o Gikimoi Awi dupa gena yaakawa duma ona manga rohe ma nyafusu gena yodupa yaaka. De o bi moi-moi inasimamade magena ona yaaka de imacaralamo so manga giliri isimane. De lo ona manga siningaka moi-moi imatero de o nyawa o Gikimoi iwihoholu.

Gogelelo 18:7

Maro to ona manga sininga ma nyafusu la manga kaya yamake de foloisi imasihoromatika, ma lamo komagena so hika pasisangisara sidago ona idodora imatogu-toguwa. Sababu ona manga sininga ma rabaka itemo, ‘Ngohi manena maro o kolano o ngopedeka o pareta ma kursika mopopareta moi. Ngohi tobabalowa de done o orasi moi lo ihiwa asa o dodora tajamewa.’

1 Petrus 4:3

Bilasu nimasidailako la ma ngale o Gikimoi Awi dupa niamote so o sangisara niamoku. Sababu maro o nyawa ma somoa ipipiricayawa o bi moi-moi yodupa yaaaka, komagena lo idodomaka ngini lo ma dekano o dorou niaaka. Idodomaka gena ngini o moi-moi o nyafusu ma dorou nidupa, sidago lo nia rohe maro ka o haiwani so o made gena niodupa niaaka, so initobadalu sidago lo nirarame poli, de lo nia suba niatide o bi giki ikokulaika gena foloisi datorou.

2 Timotius 3:4

de ngaroko o kia naga moi manga sininga ma rabaka yafikiri datorou, duma ka yaaka sidago yodupa o nyawa ma somoa yaaniaya de dangodu itemo ka yanako. So o bi nyawa maro komagena manga dupa o Gikimoika gena ihiwa, duma ka yodupa yamote to ona manga nyafusu masirete.

1 Timotius 6:17

Ngona nasulo o bi nyawa ikakaya upa ona imacaralamo, de nadoto upa lo manga kaya magenaka ona imasingongano. Sababu o nyawa lo yahiwa manga kaya ma deka gena aku yanako. Duma manga ngongano gena bilasu o Gikimoika, sababu Una de to Una Awi moi-moi wonahike dangoduka ma ngale ngone inanali.

1 Timotius 5:6

Nakoso mobabalo moi la ami edekati cawali mamote poli ami sininga ma dupa de ami nyafusu masirete, ngaroko igogou muna ami rohe ioho, duma o Gurumi Datetebi mowimote kawa.

Lukas 21:34

“Nimajaga daloha, upa sidago ngini nirame-rame ifoloi de nidalu, eko o orasi isigeto-geto niosininga ka nia oho o duniaka, sidago done Ai wange Ngohi tahino kali gena inisitodokano de ngini nimasidailako waasi.

Lukas 16:19

“Kanaga o nyawa wokakaya moi, una awi baju maro o kolano manga baju, so dangodu foloi ihahali. De awi oho o wange isigeto gena ka irarame.

Lukas 12:18

Eh! Hika taaka komanena! Ai pola gena tabiau de o pola ifoloi ilamo tosigoko, la kagena ma rabaka asa ai tamo de lo ai doro ma sopo dangodu tadiahi.