Kolose 3:8 - O GIKIMOI AWI JAJI ma BUKU

⁸ Duma o orasi manena hika ngini niaholu de nisigise kawa to ngini nia dupa datotorou moi-moi magena so niaaka kawa: ena gena, o dorou maro o nyawa niangamo de niadoosa, de o nyawaka nia edekati datotorou niasipake, de komagena lo o ronga ma dorou o nyawa niagaka eko o nyawa niadodoa.

Kolose 3:8 Referans Kwoze

Efesus 4:29

Nakoso ngini nibicara gena, upa sidago o demo datotorou nia uruno isupu. Duma nako nibicara gena bilasu o demo itotiai, kiaka o loha niaaaka o nyawaka, la manga sininga aku nisiputuru.

Efesus 4:22

Ena gena, ngini inidotoka la ngini bilasu niholu de nisigise kawa to ngini nia dupa datotorou de lo o manara moi-moi idodoma niaaakaka, magena he niaaka kawa de niaumoka. Nia dupa idodoma niamomoteka gena ka inisitura o ngeko isasalaku de nia gogoho isitorou.

Efesus 5:4

Komagena lo itiaiwa nakoso ngini o nyawa niadodoa, eko niatemo ifufuma, eko lo o demo datotorou la o nyawa niasimade. Duma foloi daloha la ngini kanaga nia uruno isupu nia sukuru ma demo niatide o Gikimoika.

Kolose 3:5

So bilasu ngini o bi dorou moi-moi upa niaaka, maro o nyawa kanaga wosoneka. Ena gena, niholu niaaka o dupa datotorou de o nyafusu ma dorou dangodu, de lo niholu o arata niodesere. Nakoso magena niodesere gena, imatero de o Gikimoika nisubawa so ka o serika niasuba.

Efesus 4:26

Nakoso o nyawa niadoosaka, upa sidago nia doosa gena o dorouku inisitura. Nia doosa gena upa niadiahi ma bati o wange itumu,

Ibrani 12:1

So nako ngone gena, kanaga inasigilolino ona yadalali idodomaka isingangasu igogou o Gikimoi wipiricayaka. So komagena lo ngone nanga piricaya posiputuru o Gikimoika, imatero maro o goguule ma rabaka de o bi moi-moi o kia naga inafafati gena dangodu ngone paumo la pomagogora. So hino la o dorou lo paumo, upa sidago ngone jai-jai bato inasabatolo. De o ngeko kiaka o Gikimoi wositatapu nanga simaka gena, ngone lo bilasu nanga sininga posiputuru la pomagogora.

Kolose 3:9

De lo upa nitodamatoko moi de moika. Sababu to ngini nia sininga ma dupa datotorou de o manara idodoma niaaakaka, magena niaaka kawa de niaumoka.

1 Petrus 2:1

So ngini o oho ka sidutu ikakali niamamakeka. Komagena so bilasu nia dorou moi-moi gena dangodu niapalako. Ena gena, bilasu ngini upa de nia edekati datotorou o nyawaka, de upa nitodamato, de upa nia lade isago de nitemo nia sala ihiwa, komagena lo upa o nyawa niaduhudu de upa niogaka o nyawa manga ronga ma dorou.

2 Korintus 12:20

Ngohi totemo komagena, sababu ngohi tohawateri upa sidago, nakoso ngohi done tahika nginika la ngini tinimake, de kagena nginika maro o kia ngohi tongongano gena ihiwa, de ngohi lo ai sininga nginika gena asa maro ngini niongongano gena ihiwa. Upa sidago ma orasi ngini tinimake, de ngini gena nimatekekangamo, eko nimatekedoosa, eko nimatekeduhudu de nimatekesikoholu. Upa sidago ma orasi ngini tinimake, de ngini gena nia ronga ma dorou nimatekekagaka, eko lo nimacaralamo de nimatekeruwahe.

1 Korintus 3:3

sababu ngini gena niaakasi nia sininga ma dupa datotorou, maro o dunia ma bi nyawa o Gikimoi wihoholu ona magena. Kanaga ngini nimatekedoosa de nimatekekangamo moi de moika, so komagena isikelelo igogou ngini o orasi manena kanagasi nia sininga ma dupa datotorou gena niaaka.

Matius 5:22

Duma orasi manena Ngohi totemo nginika, o nyawa nagoona la o nyawa ma somoa moi de yangamo, ona magena lo bilasu yasisala maro yotooma moi. De o nyawa la kanaga manga dodiao manga ronga yogaka datorou, o nyawa ona magena bilasu yangaho la yasisala o Mahkamah Agama manga simaka. De lo o nyawa la kanaga manga dodiaoka yatemo, ‘Nofufuma de o nyawa ma dorou!’ o nyawa ona magena bilasu o naraka ma ukuku yaumo.

Galatia 5:15

Duma nakoso ngini gena o dorou nimatekekagaka, maro o haiwani ilalago o bolu moi imatekekogoli de imatekekoodo gena, upa. Done ngini kagena asa o nyawa ipipiricaya o bolu moi gena nibiau so nimakokitingaka.

Roma 13:13

De lo bilasu ngone paaka komagena, la ma ngale ona o Yesus wipipiricaya waasi asa ngone inahoromati, so o loha moi-moi maro o nyawa manga manara o nita ma rabaka magena ngone bilasu paaka. Upa inatobadalu sidago lo porarame poli. De upa nanga nyafusu ma dorou paaka sidago lo posundali. De lo upa pomakangamo sidago lo pomatekeduhudu.

Yudas 1:8

Komagena lo ona la kanaga o orasi manena o dodoto ikokulai yaaho. Ona manga doguruga datotodamato manga sininga masirete yasigaro, so manga dodoto ikokulai gena ka yamotesi so yasifaja de manga nyafusu ma dorou. Ona o Gikimoi Awi kuasa yaholu de o kia bato ikokuasa o sorogaka gena isibicara datorou.

2 Petrus 2:18

Ona gena de manga bicara ma faida ihihiwa ma ngale manga manara masirete gena imasicaralamo, la yabaja o nyawa nagoona kangano asa o dorou yapalako gena yaaka kawa maro manga dodiao manga gogoho datotorou. Ena gena, yasibaja la yaaka o nyafusu ma dorou maro to ona manga ake de manga nao.

Yakobus 2:7

De o kia naga moili kanaga ifoloisi datorou gena, ona ma Kristus Awi ronga daloha de lo o ronga o kia nisiaso ma orasi niwipiricaya, kiaka to Una Awi ronga ma dorou ona masirete asa yogaka.

1 Timotius 1:20

O nyawa ona magena manga dongirabaka kanaga o Himeneus de o Aleksander. Ona magena ngohi tahikeka o Ibliska la ona wasisangisara, so ona magena bilasu imatogu o Gikimoi o ronga ma dorou iwigaka.

1 Timotius 1:13

Ngaroko, idodoma ngohi manena o Jou Yesus Awi ronga ma dorou togaka, de Awi nyawa wipipiricaya tasisangisara, de Una masirete lo towisicekeka. Sababu o orasi magena ngohi towipiricaya waasi so tanakowa o kia ngohi taaaka magena o Gikimoi towilawangi, so ma Kristus ngohi woigalusiri.

Galatia 5:26

Komagena so upa sidago ngone gena, ngaroko ma sababu o kia naga moi lo ihiwa, duma pomacaralamo sidago lo pomatekesigaro so pomatekeduhudu moi de moika.

Galatia 5:20

de manga suba yatide o bi giki ikokulaika de imagogomahate, de yolawangi de imakangamo, de o doosa de yatodoosa poli sidago imatoore, de imatekesikoholu la yaaka so manga siningaka ma dupa gena ma ngale ka ona masirete imasihie de foloisi imasilamo de o nyawa ma binuka sidago lo o ritinga idadi he o bolu sinotoka de imatekesikoholu,

Markus 7:22

isusundali, yatotesere, de lo o dorou moi-moi iaaka, yatotodamato, de manga adati ihiwa, yatotodoosa, o ronga ma dorou iaaka, imacaralamo de isusa padoto sababu manga sahe datogoi.

Gogelelo 16:9

O nyawa ona magena yatupu de o wange ma sahu koloko o uku, sidago lo ona imatadahewa imatoba de imatoduba eko ona lo iwisigiliri iholuka. Duma ona asa o Gikimoi Awi ronga ma dorou yogaka de widoosa, sababu o bodito-bodito magena Una masirete wosulo.

Yudas 1:13

Ona manga manara lo yasimade-madeka, maro o moku-moku dasosihilo irama o teoka so o geko de o reremo yaaho. De ona lo o nyawa yakulai so o Gikimoi lo wimote kawa, maro o bi ngoma so ma dodagi lo itiaiwa. So ma ngale ona magena manga riho kanaga o Gikimoi wosidailako lo daboloka, ena gena o naraka dapopuputuka.

2 Petrus 2:7

De lo to ona manga sidongirabaka lo kanaga o Lot wogoge, una awi sininga itiai o Gikimoika. O wange isigeto-geto una foloisi wopeleso, sababu una wogiise de lo wakelelo o nyawa o nyafusu ma dorou yaaka sidago ona o bobita moi lo yosigise kawa. So o Gikimoi asa una o Lot o sangisara magenano wisisupu.

Efesus 4:25

So igogou ngini bilasu nia gogoho ma manara idodomaka gena niaaka kawa de niaumoka, so nitodamato kawa. Lebelaha o kia naga itotiai gena niadedemo o nyawaka, sababu ngone inangodu maro ma Kristus Awi rohe gena kanaga pomarimoika, so bilasu pomatekekokiriwo.