Kolose 1:6 - O GIKIMOI AWI JAJI ma BUKU

^6-7 Maro o habari daloloha gena isopo so yosihabari o dunia ma bi nyawaka so o bi nyawa ipipiricaya manga dala gena foloisi idogo-dogo o dunia ma sigilolika, komagena lo idadi to ngini nia sidongirabaka, sidago lo ma noma-noma o dodoto magena o Epafras ngini winidoto so o Gikimoi Awi laha aku nianako itiai de kanaga ngini lo asa niopiricaya. Una o Epafras gena miwidodaraka, de una lo mia dodiao moi mimomanara de lo ma ngale ngini ma Kristus iwileleani wokaeli.

Kolose 1:6 Referans Kwoze

Yohanes 15:16

Komagenawa, sababu ngini gena nihiriwa Ngohi, duma Ngohi masirete ngini tinihirika de lo tinitideka ma ngale nitagi Ai manara niaaka la isopo, de ma sopo magena isisawa. So komagena de to Ngohi Ai ronga o bi kia bato ngini nigogolo o Gikimoika, magena Una asa winihike nginika.

Filipi 1:11

Komagena o Yesus Kristus winiaka so to ngini nia sininga gena aku itiai de o moi-moi o kia itotiai gena aku niaaka la nia oho ifero, maro o bi gota ma goho so ma sopo ifoloi daloha. Ngohi tosumbayang la ma ngale o bi nyawa tanu iwisihoromati o Gikimoika de lo Awi ronga isilamo.

1 Petrus 5:12

O surati manena ma ngale ngohi o Silas woiriwo so tinisidingo nginika, una nanga dodiao wopipiricaya gena totemo aku powipiricaya. Ngohi o surati ma demo idalawa manena talefo nginika, la ma ngale ngini tinibaja de tinisingangasu o Gikimoi Awi laha wonasidudumu ngoneka gena ka igogou de itero, komagena maro ipapasaka ngini tinidedemo daboloka. So ngohi togolo nginika bilasu magena niopiricaya daputuru.

Kolose 1:23

Ngini asa nitebika, hitilahi o dodoto itotiai gena ngini niapiricaya daputuru sidago lo nia piricaya gena nisitatapu igogou. Upa sidago nia ngongano o dodoto itotiai inisihohabarika gena ngini niodongosa. O dodoto itotiai magena isihabari dabolo o nyawa yadadala o dunia ma dokuka, de ma ngale o dodoto magena ngohi manena Paulus lo ai manara tosihohabari moi.

Roma 16:26

duma o orasi manena asa wosimane daboloka. Magena o Gikimoi wokokakali asa wosulo Awi nabi-nabika la yalefo, de magena lo misihabari ma ngale o bi bangsa o Yahudika ma nyawa yasowo gena yangodu-ngodu Una wipiricaya so aku wisigise Unaka.

Roma 1:13

Ai dodiao nipipiricaya, bilasu nianako kanaga he ma para ma dalaka ai sininga ma dupa totagi tinikurumi nginika, duma ma fafati lo ka idala so idadiwa. Ai dupa komagena la ma ngale tomanara, so o bi bangsa ma binuka manga sidongirabaka lo kanaga o bi nyawa foloi yadala aku o Jou Yesus wipiricayaka, komagena lo tanu kagena to ngini nia sidongirabaka.

Yohanes 4:23

Ngaroko komagena, ma orasi done asa yaado, de igogou ma orasi magena yaadoka, de Ai Baba Awi Gurumi asa o nyawa yariwo so ona aku isuba Ai Babaka. O nyawa kanaga la manga suba ma gola Unaka gena, ona magegena igogou winako. O suba ma ngeko komagena Ai Baba wodupa.

Markus 16:15

So kagena de Una wasulo onaka, “Nitagi ma bati o bi doku o dunia ma ngoguka, de nisihabari o habari daloloha o Gikimoino ma meta o dunia ma nyawaka.

Markus 4:8

O gisisi ma sonongali asa itura o tona dalolohaku. So ioho ma goho ifero daloha de ma hutu ilamo so isopo. Ma sopo kanaga daloha sidago ma dala ma para moruwange, de ma binuka daloha sidago ma para moributanga, de ma binukali daloha sidago lo ma para ratu moi.”

Matius 24:14

Duma o dunia ma dodogu yaado waasi, de o habari daloloha o Gikimoino gena bilasu isihabari kasi sidago o dunia ma pupuku ihaka, la o bi doku yangodu lo aku yoiseka. Dabolo de o dunia ma dodogu asa imasidiado.”

2 Tesalonika 2:13

Mia dodiao nipipiricaya de kanaga o Jou Yesus winidododaraka, ma orasi mia sumbayang miatide, de ma ngale ngini de mia sumbayang dangodu ma rabaka kanaga mitemo, “Ya, Jou! Ani laha ka ilamo poli.” Sababu ngini gena idodoma o dunia wosidadi waasi, de o Gikimoi asa winihiri la o orasi ma simaka ma ngale de o Gurumi Datetebi ma kuasa nia sininga datebi de lo o dodoto itotiai niopiricaya, so ngini asa nisalamatika.

1 Tesalonika 2:13

De lo mia sumbayang ma rabaka dangodu kanaga lo mitemo, “Ya, Jou! Ani laha ka ilamo poli.” Sababu ma orasi o Gikimoi Awi demo minisihabari so niise gena, ngini niadehe daloha, sababu nianako o demo magena to nyawa manga demowa, duma ngini nianako igogou-gogou magena to Gikimoi Awi demo, de Awi demo magena imanara to ngini nipipiricaya nia sininga ma rabaka.

1 Tesalonika 1:5

Ngomi mianako komagena, sababu ma orasi o habari daloloha ngomi minisingangasu nginika de iniado nia sidongirabaka, upa cawali de ka o demo so ngini asa o habari magena niadehe. Duma ngini niadeheka, sababu ma orasi o Gikimoi Awi nonako ihahairani de Awi kuasa winisikelelo nginika, de lo o Gurumi Datetebi asa winisiputuru sidago niopiricaya o habari magegena igogou de itiai. Komagena lo ma orasi ngomi kagena ngini kasi, de ngini nianako idodooha maro to ngomi mia oho de lo mia bicara nginika ma ngale ngomi miniriwo daloha.

Kolose 1:10

Mia gogolo komagena la ngini lo asa o moi-moi niaaka maro o kia o Jou wodudupa, ma ngale o orasi isigeto-geto aku Una niwisisanangi. Magegena maro to ngini nia sopo, so o moi-moi daloloha dangodu aku niaaka de lo o Gikimoi Una niwinako foloisi itiai.

Filipi 4:17

Komagena ngohi tinidedemo, upa de ma sababu ngohi tasari ma ngale o pipi ngohi nihike, duma sababu ngohi asa tasari la tanu ngini nihike ngohika gena, kanaga ma ngale maro o nagi ma bobangu moi magena o Gikimoi Awi laha ifoloisi idala winisidumu nginika.

Efesus 5:9

Sababu nakoso nitagi o nita ma rabaka gena, kanaga niaaka o manara de ma sopo moi-moi dangodu kiaka daloloha, itotiai, de lo igogou.

Efesus 4:23

De lo ngini inidotoka la o orasi manena kanaga nia sininga magena idadi damuane,

Efesus 4:21

Igogou, o habari ma ngale o Yesus gena ngini niiseka de lo to Una Awi dodoto itotiai gena inidotoka.

2 Korintus 10:14

So nakoso ma ngale ngomi mia manara nginika gena mia giliri masirete misimane, de mia bati gena asa miatilaku waasi. Sababu nakoso to ngini nia kotaka de miaado waasi, de igogou mia manara nginika ma ngale ihiwa so itiaiwa ma ngale mia manara nginika de mia giliri masirete misimane. Duma kanaga itiaika ma ngale mia manara nginika gena mia giliri masirete misimane, sababu ngomi gena igogou ngini nia kota miadoka so o habari daloloha lo misihabarika.

2 Korintus 6:1

So nakoso ngomi gena, o Gikimoi Awi manara ma rabaka ngomi Una miwimote la Awi demo gena misihabari o nyawaka. So ngomi minibaja de migolo nginika, o Gikimoi Awi laha kiaka niamamakeka, magena upa ka niadohaka la nitura o dorouku.

Roma 15:19

Ai manara gena de o Gurumi Datetebi ma kuasa so taaku taaka o nonako ihahairani gena lo de ma kuasa. So o Yerusalemka de tokahika sidago o Ilirikumka, de o habari daloloha ma ngale ma Kristus gena ngohi tosihabari dabolo o nyawa yangoduka.

Rasul 26:18

ma ngale onaka nadoto sidago manga sininga ma rabaka yanako igogou de itiai, so o Iblis he yapareta kawa la o Gikimoi manga sininga wapareta, imatero maro o nyawa o bubutu ma rabano isupu de iwosa o nita ma rabaka. De ma ngale manga piricaya Ngohika so manga dorou lo asa Una wosiapongu so ona yatebika, de asa wasingosa o bi nyawa wahihiri manga sidongirabaka.’

Rasul 16:14

Kanaga manga sidongirabaka moi momisigigise, muna magena o Yahudika misowo o Tiatira ma nyawa moi ami ronga ongo Lidia, o baro dauungu de ma ija ihali gena momasiiija, de lo modupa mosusuba o Gikimoika. Ma orasi magena o Jou ami sininga wapelenga sidago o Paulus awi demo moi-moi muna masahe de modupa mosigise.

Rasul 12:24

So komagena o bi nyawa foloisi yadala yodupa isigise o Gikimoi Awi habari daloloha so yopiricayaka.

Rasul 11:18

Komagena ona iise dabolo, de ona he ikalekono kawa, so gila-gila o Gikimoi wigilirika, de itemo, “Nakoso komagena, o Yahudika ma bi nyawa yasowo lo o Gikimoi wasimaha ona itoba de imatoduba la manga oho ikakali bai!”

Matius 28:19

So nitagi ma bati o bi bangsa o dunia ma ngoguka niaado de o bi nyawa yangodu niadoto la ona idadi to Ngohi Ai nyawa imomote. Niaosi ona de o Baba Gikimoi, de ma Ngopa, de lo o Gurumi Datetebi to Ona Manga ronga.

Efesus 3:2

Igogou, ngini niise daboloka ma ngale nginika gena idodooha o Gikimoi o manara moi woihike ngohika, so kanaga o habari daloloha ma ngale Awi laha gena bilasu tinisihabari nginika.

Roma 15:28

Komagena so ma orasi o Yerusalemka tatota dabolo, eko igogou o ngongike magena tasidiadoka, de ngohi asa tomajobo takahika nginika, de nia daera tatiho ma ngale ai dodagi tadofa o Spanyolka.

Yohanes 17:19

De Ngohi asa tomasidailakoka la ka cawali to Ngona Ani manara taaka, de ma ngale ona magegena taaka so aku igogou ona yatingaka, ena gena ona Ani dodoto itotiai gena yosigise so idadi ka to Ngona Ani nyawa masirete.”