Kolose 1:16 - O GIKIMOI AWI JAJI ma BUKU

¹⁶ Sababu ka Una magena so o bi moi-moi dangodu idadika, o moi-moi kanaga o sorogaka so dangodu pakokelelowa, de o moi-moi dangodu o duniaka so paaku pakeleloka, komagena o bi gurumi lo dangodu ikokuasa de ipopareta lo. Una gena foloisi wolamoli ma sababu o moi-moi dangodu wosidadi ma ngale Una iwisigiliri.

Kolose 1:16 Referans Kwoze

Roma 11:36

Magena igogou, sababu o bi moi-moi dangodu gena o Gikimoi Una magena wosidadika de lo wapareta, so kanaga ka iohosi la ma ngale o moi-moi iooho magena asa Una Awi ronga isilamo. Tanu Una magegena o nyawa inangodu wisigiliri ka sidutu ikakali. Amin.

Yohanes 1:3

De o Demo so o bi moi-moi dangodu aku wosidadika. Ena gena, nako Una wihiwa de o kia naga idadadika moi lo asa idadiwa.

1 Korintus 8:6

Duma ngone popipiricaya gena ka panako igogou o Gikimoi gena ka womatengo. Una magegena nanga Baba o bi moi-moi o duniaka gena dangodu wosidadadika, de to Una Awi giliri gena kanaga ngone nanga oho ma gaalu. De igogou lo o Jou ka womatengo, ena gena o Yesus Kristus. Una magena o Gikimoi asa wisulo la Una waaka so o bi moi-moi dangodu aku idadi, de lo sababu Una magena, so ngone aku o oho ka sidutu ikakali pamake.

Ibrani 2:10

Komagena o Gikimoi Una gena, o bi moi-moi o kia naga dangodu gena wosidadika de magena ma ngale Una masirete wigiliri. So itiaika la Una gena wasimaha la o Jou Yesus wisangisara ma ngale Una womatengo gena womaaka o Salamati wololoa moi, kiaka o ngeko wasidumu Awi nyawaka ma ngale ona wasisalamati so aku imakomote yasimulia Una dede ona.

Ibrani 1:2

Duma o orasi manena gena kanaga o orasi ma dodoguka, to Una Awi demo gena Awi Ngopa masirete Una magena asa wonasingangasu ngoneka. Una Awi Ngopa gena wisitatapuka la o bi moi-moi o kia naga dangodu gena to Una, o bi moi-moi kiaka sababu ka Una magena so o dunia de o dipa lo dangodu idadika.

Efesus 1:10

So done ma orasi itotiai gena imasidiadoka, de o Gikimoi asa Awi edekati dangodu gena waaka. Ena gena, o bi moi-moi o kia naga o sorogaka de lo o duniaka gena dangodu-ngodu asa isirimoi la ma Kristus wapareta.

Kolose 1:15

Ma Kristus Una Awi jamani gena imatero de ka to Gikimoi, gena Una powikokelelowa. Nako o moi-moi isidadadika dangodu, ma Ngopa Una womatetengo kanaga foloisi wolamo.

Kolose 2:10

De ngini lo nimarimoika dede ma Kristus, Una magena o dodadi ikokuasa dangodu wapareta so to Una Awi Gurumi masirete gena kanaga nia siningaka de ma boloika.

Filipi 2:10

So o Yesus Una magegenaka bai ona o sorogaka de o duniaka de lo o sone ma rihoka gena ona yangodu ibukuku de manga suba yatide Unaka,

Kolose 1:20

O Gikimoi ngone wonatuluru so powosa ma Ngopa Awi pareta ma rabaka, sababu ma ngale ngone wositatapu ma Ngopa wisulo la wosone so ngone dede o Gikimoi aku pomarimoi de pomakadame. De upa ka cawali ngone bato, duma kanaga o sorogaka de lo kanaga o duniaka ngodu de Una imakadame daloha.

1 Petrus 3:22

Una wisioho kali de asa Una wodola o sorogaye, de kagena o Gikimoi Awi girinaka womatamiye ma ngale bilasu o bi malaikat de lo o bi kuasa dangodu-ngodu ka Ona yasinoto yasigise.

Kolose 2:15

De komagena lo sababu ma Kristus o sangahadika wosone, so o bi gurumi ipopareta gena dangodu waturaka. De lo aku o nyawaka wasikelelo nako o gurumi magena ma kuasa de to Una Awi kuasa, de igogou-gogou Awi kuasa magena foloisi ilamo de daputuru, maro o prajurit kanaga manga lawangi yaturaka so kanaga o rarame ma rabaka, de manga lawangi lo idadi o dafaka de ona magena yasikelelo o nyawa manga simaka.

Efesus 6:12

Sababu ngone nanga kudoti ma rabaka gena o nyawa pasiholuwa. Duma ngone posiholu o kuasa moi-moi datotorou de ipopareta o ngawa-ngawaka gena o bi kuasa ma jako dangodu, koloko o toka, de o gurumi datotorou, de lo o kia bato o Gikimoi wihoholu.

Roma 8:38

Ngohi tanako igogou-gogou, o kia naga moi lo yaakuwa o Gikimoi Awi dodara ngoneka gena yafati, upa o kuasa o sorogaka eko lo o duniaka, upa o malaikat eko lo o toka. Dadoohawa nakoso o kia naga idadi o orasi manena eko lo o orasi ma simaka, ngaroko posone eko lo pooho. Igogou, o kia naga o Gikimoi wosidadadika moi lo yaakuwa yafati to Una Awi dodara wosidumu ngoneka, sababu Una magegena o Yesus Kristus nanga Jou wisulo la wahino, so ngone igogou aku panako Awi dodara ngoneka ma bati lo ihiwa.

Yohanes 1:10

O Demo magena kanaga o duniaka, de ngaroko Una wosidadika o bi moi-moi dangodu o dunia ma rabaka, duma o dunia ma bi nyawa winakowa Una magena naguuna.

Roma 9:5

De lo to ona manga ete de manga topora gena o nyawa yalalago, ena gena o Abraham, o Ishak, de lo o Yakub. De ma boboloi lo ma Kristus maro o nyawa moi Awi aheli imaketero de ona. Ngaroko komagena, ona iwipiricayawa. Una gena o bi moi-moi dangodu wakolano, ena gena o Gikimoi, so tanu Una magegena powigiliri de Awi ronga posilamo ka sidutu ikakali. Amin.