Ibrani 7:18 - O GIKIMOI AWI JAJI ma BUKU

^18-19 O bi bobita o Musa wosilelefo kanaga de ma kuasa gena ihiwaka de lo ma faida ihiwaka, so ma ngale idadiwa o bobita magena ngone posigise so nanga sininga done itiai o Gikimoika. Komagena so o bi bobita idodomaka gena yapalakoka de yatagalika de o ngongano moi kiaka o ngeko foloisi daloloha. Ena gena, o Jou Yesus o ngeko moi ngone wonahihikeka la ngone aku pahika pomasidate o Gikimoika.

Ibrani 7:18 Referans Kwoze

Roma 8:3

Ena gena, sababu ngone o nyawa kanaga nanga siningaka o dorou podupa, so o bobita o Gikimoino posigise paakuwa. Duma o Gikimoi gena igogou waaku bai! To Una Awi Ngopa masirete wisulo la wahino womadadi maro ka o nyawa moi de Awi siningaka o dorou ma dupa lo wosigisewa, so ma ngale ngone nanga dorou gena dangodu watupu sidago Una masirete iwitooma.

Rasul 13:39

De bilasu ngini lo nianako, ngaroko de o Gikimoi Awi bobita o Musano gena yaakuwa nia sininga itotiai yaaka, duma nagoona o Yesus wipiricayaka gena to ona manga sininga itotiai aku Una waaka.

Galatia 4:9

Duma o orasi manenaka de ngini magena asa igogou o Gikimoi niwinakoka, eko ngini gena o Gikimoi lo wininakoka. Komagena de dadodooha so nia sininga ma rabaka asa itiaiwa, so nisisala de sidago o Yahudi manga bobita o Gikimoino, ngaroko nia sininga yaakuwa yaaka itiai, duma magena niamote kali. Upa sidago magena niamote kali so ngini maro idodomaka inipareta kali.

1 Timotius 4:8

Sababu o demo ma duuruka manena, gena igogou so bilasu o nyawa inangodu padehe daloha, ena gena, “O nyawa la cawali manga rohe isiputuru gena ma faida ka ma cunu, duma o nyawa la yaaka daloha maro o Gikimoi wodudupa gena, ma faida foloisi ilamo. Magena ma faida ilamo, sababu o orasi manena o Gikimoi asa Awi laha wosidumu onaka de o orasi ma simaka ona asa yamake o oho ka sidutu ikakali.”

Ibrani 13:9

O dodoto kiaka imakoketerowa de nanga piricaya gena, upa sidago ngini inisihaga. Nako o bobita ma ngale o ino gena, idala o bi Yahudika ma nyawa yamote, duma o bobita magena asa yaakuwa o laha isidumu o nyawa ona magena o bobita yamomoteka. So ifoloisi daloha ngone pososininga o Gikimoi Awi sininga ma laha la aku nanga sininga isiputuru.

Galatia 3:17

De magegena ngohi ai edekati la o Gikimoi wijaji o Abrahamka de o jaji magena wositatapu daboloka wotemo, “Igogou! Ngohi Ai jaji ngonaka gena asa taganapuka.” Dabolo so o taungu 430 ipasaka, de ma ngale Una Awi bobita o nyawa bilasu yamote gena wahike. Duma ngaroko komagena, idodoma asa Una Awi jaji o Abrahamka magena upa watilaku. Upa sidago Awi jaji o Abrahamka magena wapiki. Hiwa! O kia naga o Gikimoi wojaji de wosasi lo daboloka, magena yaakuwa itagali.

Galatia 4:21

Ngini nimuruo naga niodupa o Yahudika manga bobita o Gikimoino gena niapareta, de ngini magegenaka ngohi totemo bilasu ngini nisihoda itiai o kia naga moili o Musa walefo o Gikimoi Awi Buku ma rabaka.

Galatia 3:15

Ai dodiao nipipiricayaka, idodooha o Gikimoi wojaji o Abrahamka gena hika ngini ngohi tinisikelelo. Hino la ngone posiade-ade de positero maro o kia naga moi de o orasi isigeto-geto asa idadika. Nakoso o nyawa yasinoto de kanaga ma ngale o kia naga moi gena imatekekajajika de lo o jaji magena isitatapu lo daboloka, ngaroko ona magena ka o nyawa, duma o nyawa nagoona bato yaakuwa o jaji magena yasisa eko lo o jaji magena yatagali.

Roma 3:31

So nakoso o nyawa kanaga itemo, “Nakoso ngone o Jou Yesus powipiricayaka, so o Gikimoi asa waaka nanga sininga itiai, de nagala ma ngale magena so ngone aku o bobita o Gikimoino gena paumoka, de upa he paaka.” De ngohi tosango, komagenawa bai! Nakoso ngone o Jou Yesus powipiricayaka gena, bilasu o bobita o Gikimoino magena pamote de paaka daloha.

Galatia 3:21

Nagala o nyawa moili asa wosanoli, “O Gikimoi wodupa wojaji, de asa o kia naga moi Unano pamake gena imaterowa, nakoso o Gikimoi Awi bobita gena bilasu pamote. So idodooha o Gikimoi Awi jaji de o Gikimoi Awi bobita kanaga imatekekalawangi.” Ngohi tosango, hiwa bai! Nakoso potemo o Gikimoi Awi bobita o nyawa wahike so aku yamake o oho ka sidutu ikakali, de igogou sababu ona Awi bobita gena yamoteka, de magena asa Una to ona manga sininga itotiai gena bilasu waaka.