Gogelelo 19:7 - O GIKIMOI AWI JAJI ma BUKU

⁷ Hino la ngone gena nanga siningaka cawali o nali de o more ka ka Una magena powisigiliri de powisihoromati. Sababu o Duba ma Goho Awi kawi ma wange he yaadoka de lo ma pedeka momasidailako daboloka.

Gogelelo 19:7 Referans Kwoze

Gogelelo 21:9

Dabolo de o malaikat yatumudingi ona idomaka o udo-udo de o bodito ma dodogu tumudingi iaaho, ona magena manga sidongirabano wimoi wahino ngohino, de wotemo, “Nahinosi, la ngohi tonisikelelo ngonaka mokakawi muna magena o Duba ma Goho to Una Awi pedeka.”

Gogelelo 21:2

De kanaga lo o kota moi de o bi dorou datotorou moi lo ihiwaka so datetebi, de takelelo gena o kota damomuane moi, ena gena o Yerusalem asa iuti o sorogaku. Magena isidailako maro o ngopedeka moi mokakawi ma ngale ami roka gena o baju daloloha-loha imihike la momasitiba. O kota magena o Gikimoi kagena o sorogaka de asa wosigutiku.

2 Korintus 11:2

Igogou, ngohi kanaga ai edekati daloloha foloisi ilamo nginika, imatero de o Gikimoi lo kanaga Awi edekati daloloha foloisi ilamo nginika bai! Ngohi manena ma nonoma ngini tinidoto la ma Kristus ngini niwipiricaya, de tongongano ka Una niwipiricaya daputuru. Ngini gena maro o jojaru moi imabobaika de yanau moi. De muna magena ngohi tomingosoka to una awi simaka, ena gena ma Kristus Awi simaka.

Matius 22:2

“O Gikimoi wopareta gena, posiade-ade imatero maro o kolano moi kanaga waaka awi ngopa yanau moi awi kawi ma rarame.

Gogelelo 19:9

Dabolo de o malaikat moili wotemo ngohika, “O nyawa la kanaga yakoro de yahino o Duba ma Goho Awi kawi ma rarameka, ona magena igogou de manga sininga isosanangi. Magena hika nalefo. O demo magena ka igogou o Gikimoi Awi demo.”

Efesus 5:32

O demo manena gena ma ngale ilamo. Magena tositero maro ma Kristus dede o gogobu.

Yohanes 3:29

Igogou, o Yesus Awi manara dede to ngohi ai manara gena, to Una Awi manara foloi ilamo. Ma orasi o kawi ma rarame ma rabaka de ngohi maro wokakawi awi dodiao moi. Ngaroko una kanaga o bi moi-moi dangodu gena waaturu, duma muna mokakawi gena de una magena wisowo. Wokakawi awi dodiao gena wisulo wodomano, ma ngale ka waaka to muna mokakawi ami dailako. Wosidailako daboloka, de ma orasi wokakawi wahino so muna gena womingoso de awi nali de awi more gena, awi dodiao magena woise so una lo foloisi winali. Maro wokakawi awi dodiao awi more, komagena ngohi lo aku ai more de lo ai nali ifoloi.

Efesus 5:23

Sababu ma Kristus gena ngone nanga dorouno wonasisalamatika de posiade-ade Una o gogobu nanga sahe de ngone gena Awi rohe, so maro Una gena ngone wonapareta komagena lo asa o roka de ma pedeka. Sababu una kanaga ma pedeka womipareta, imatero maro o rohe so o sahe gena o rohe yapareta.

Filipi 3:3

Sababu o Gikimoi wotemo upa dede ona magena, duma cawali ngone manena asa maro to Una Awi nyawa ma duhutu. Ngone manena Awi Gurumi wonasiputuru so o Gikimoika poleleani. De ma ngale o Yesus Kristus Awi manara to ngone nanga siningaka so nanga giliri asa posimane. So o bobita o Gikimoino maro o Musa walelefo ma ngale pomasuna gena, upa he papiricaya kali.

Matius 1:20

Ma orasi o Yusuf ka watagapisi awi sininga ma rabaka womidolomu eko hiwa, de una wokioloka de wotoguruga. Awi doguruga ma rabaka una wakelelo o Jou Awi malaikat moi yahino de itemo unaka, “Yusuf, ngona gena o Daud awi ngopa de awi dano moi. Upa nimodo ongo Maria nomidehe, sababu o ngopa ami poko ma rabaka idadi gena ka cawali o Gikimoi Awi Gurumi Datetebi ma kuasa so imasibolote munaka.

Gogelelo 11:13

De kanaga o orasi magena asa o osu isitodokano sidago lo o kota magena, o regu mogiowo so o regu moi yasiwaroka, de o nyawa manga dala yacala tumudingi isoneka. So o nyawa ma binukali gena asa ka yamodo de itemo, “Igogou! O Gikimoi o sorogaka gena ka Una magena wolamo.”