Filipi 2:29 - O GIKIMOI AWI JAJI ma BUKU

²⁹ So ngini gena tanu una niwingaho daloha dede nia nalika, maro nia dodiao o Jou Yesus wipipiricayaka. De o nyawa yangodu maro una magegena tanu ngini asa niahoromati.

Filipi 2:29 Referans Kwoze

1 Timotius 5:17

Nakoso o nyawa ipipiricaya manga bobareta la o nyawa ipipiricaya manga oho moi-moi yaaturu daloha, de ma boboloi ona o nyawa ipipiricaya manga bobareta isihohabari o Gikimoi Awi demo de manga bobareta yododoto, ona magenaka bilasu o nyawa ipipiricaya yahoromati de manga gaji lo yafangu la yariwo.

1 Tesalonika 5:12

Ai dodiao nipipiricaya, ngomi migolo tanu ngini niahoromati to ngini nia bobareta, ona magena to ngini nia roriri yomomanara datubuso ma ngale inisitiari de lo o Jou Awi demo moi-moi inidoto.

1 Korintus 16:18

Sababu ona magegena kanaga ngohi isiwoma so ai sininga idadi isanangika, imatero idomaka de ona ngini lo inisiwoma so nia sininga isanangika. Komagena so ngohi ngini tinigolo la o nyawa maro ona magenena niahoromati bai!

Roma 16:2

Ngohi togolo nginika tanu muna magena ngini nimidehe foloi daloha, sababu maro ngini komagena lo muna o nyawa o Jou mowipipiricaya moi. De lo muna gena ami kurangi tanu ngini sutu nimiriwo, sababu o nyawa he yadalaka de lo ngohika muna masirete lo moriwo daboloka.

2 Korintus 10:18

Sababu o nyawa kiaka o Jou wadehe dalohaka gena, upa ona lo kagena manga giliri masirete isimane, duma kanaga ona magena lo manga giliri gena ka Una wosimane.

1 Korintus 16:10

Nakoso o Timotius wahika nginika, de hika ngini niwingaho daloha la ma ngale una gena to ngini nia sidongirabaka upa he niwimodo, sababu ngomi mia manara, o Jou Yesuska miaaaka gena, ka imaketero.

3 Yohanes 1:10

Komagena so done ma orasi kadoka tomasidiado asa ngohi o bi nyawa manga simaka, de ma ngale to una awi manara moi-moi magena asa ngohi takalaki. Awi manara o gulai magena ma ngale ngomi womikalaki de awi edekati gena o ronga ma dorou womigaka. De lo magegena una awi sininga isanangi waasi so nakoso o nyawa ipipiricaya kanaga inakurumi so ngone bilasu pangaho daloha gena, una masirete ka woholu. De lo o nyawa ma binuka nakoso kanaga yodupa imakangaho daloha, de una wasimahawa de lo wodupa o gogobu manga rimoi ma rabano ona magena wasisupu.

Ibrani 13:17

Ngini nia bobareta idodoto ona magena, bilasu manga sulo niamote de ona niasigise, sababu ona gena kanaga to ngini nia sininga magena yojajaga, de done asa ona manga manara magena bilasu widedemo o Gikimoika la Una wahiri. So ona gena bilasu niasigise, la ona aku o manara magena yaaka de manga nalika. Nakoso ngini niasigisewa, de ona magena asa ka de manga sininga datubuso, de ma duuruka ngini gena asa o loha niamakewa.

Kolose 4:10

O Aristarkhus lo o bui ma rabaka wisangisara dede ngohi, una asa awi salam wosidingo nginika tanu nimakamake kali. De kanaga o Markus, gena o Barnabas ma ngopa moi, una lo asa awi salam wosidingo nginika tanu asa nimakamake kali. (Ma ngale una gena idomaka ngohi tobeseso nginika nakoso una wahino nginika, de bilasu niwidehe daloha.)

2 Korintus 7:2

Ngomi mingongano ngini gena asa ngomi nimidehe daloha bai! O orasi moi lo ihiwa la ngomi o sala minigaka nginika, eko ngini minisirugi, eko lo minikulai.

Roma 10:15

De lo nakoso o nyawa la ma ngale Awi habari Una wasulo waasi isihabari, de idodooha o nyawa itagi isihabari. Kanaga Una Awi Jaji ma Buku ma rabaka itemo, ‘Igogou, o nyawa la kanaga yahino o habari daloloha yosihabari gena, o manara moi magena daloha icarawa.’ Ngaroko o Gikimoi wojaji komagena, duma Awi jaji magena wosiganapu waasi.”

Rasul 28:10

Kanaga lo o nyawa ona magena de manga ngongike idala imihike ngomika ona imihoromati, so ma orasi ngomi he mimajobo, de o deru ma rabaku lo manga roriwo moi-moi ona isibane ma ngale to ngomi mia oho ma kurangi o dodagi ma rabaka.

Rasul 8:8

So o bi Samariaka ma nyawa ona magena imore de yanali.

Rasul 2:46

O wange isigeto ona imatekerimoi imatolomuno o Gikimoi Awi Tahuka. De manga nali de manga sininga daloha so yodupa manga tahu moi-moika imatolomuno asa yoodo,

Yohanes 13:20

O nyawa Ngohi tasusulo so itagi o nyawaka, la nakoso ona magena yadehe daloha, magena imatero de ona lo Ngohi idehe daloha. So o nyawa nagoona la Ngohi idehe daloha, ona manga dehe ma manara magena lo ma meta Ai Babaka, sababu Ngohi Una woisulo so tahino.”

Lukas 9:5

De lo nakoso o riho moika la nitulu, de ona ngini iniholu sidago o habari daloloha magena lo yoise iholu, o riho magena niodongosa. Duma nia dohu ma gaapo niapari kasi la imaaka o nonako moi onaka, igogou ona magena de manga fajaka o Gikimoi Awi simaka.”

Filipi 2:28

Mutuwade ngohi bilasu o Epafroditus gena towisigiliho dacapati nginika, la ma orasi ngini niwikelelo de nia sininga asa ifoloi isanangi de ngohi lo ai sininga ma beleso foloi isiguui.