ZAKARIA 6:13 - BIBEL JAMITA NA DENGGAN

¹³ Ia ma da halakna na giot mambangun Bagas Ni Tuhan jana na manjagit hasangapan songon sada raja, jana mamarenta ma ia tu rayatnia i. Adong ma sada malim na gabe dongan pangalambunginia jana denggan do halahi rap saparkarejoan jana di bagasan dame.’

ZAKARIA 6:13 Referans Kwoze

MASMUR 110:4

Madung marsumpa Tuhan, nada tarihonNia be mangulahi, “Ho do malim salolot-lolotna, mangihutkon aturan ni si Melkisedek.”

IBRANI 3:1

Hara ni i ale angka dongan na badia, na dohot taruli di pio-pio na sian banua ginjang, ligi hamu ma rasul dohot Malim Godang na taoku i, i ma Kristus Jesus.

JESAYA 22:24

Tapi anggo si solkot dohot ale-ale maradu sitanggungonnia gabe boban ma i disia. Marsigantung tusia do halahi songon huali na gantung di sangkotan.

JESAYA 11:10

Dapot do hatihana, ro sada raja pomparan ni si Daud na gabe pamusatan ni roha ni angka bangso. Marlagut ma halahi di kota ni harajaan jana mangalehen sangap tusia.

JESAYA 9:6

Madung sorang di hita sada dakdanak; dibasa-basahon di hita sada anak. Ia ma na gabe pamimpinta. Digoari do Ia: “Panuturi Na Marroha”, “Debata Parkuaso”, “Ama Salolot ni lolotna”, “Raja Ni Hadameon”.

MASMUR 21:5

Hara ni pangurupiMu mambaen tangkas ia tarida, dibaen Ho goarnia marmulia jana tarbarita.

HALUMBAAN 3:21

Di na monang i ma lehenonKu anso juguk ia rap dohot Au di habangsangKi, laing songon Au na monang jana na juguk rap dohot Damang di habangsaNia i.

1 PETRUS 3:22

jana madung manaek Ia tu banua ginjang. Saonnari markuaso ma Ia rap dohot Debata jana mamarenta tu sude surusuruan, tu sude parkuaso dohot tu sude angka hagogoon di pangalaho partondion.

IBRANI 6:20

Madung ditotas Jesus dalan sibolusonta tusi, jana madung masuk Ia tusi songon Malim Godang di hita salolot-lolotna, di bagasan horong ni Malim Melkisedek.

KOLOSSE 1:2

tu angka dongan sahaporsayaan di bagasan Kristus na di Kolosse; i ma angka na badia. Asi ni roha ma di hamu dohot hasonangan na sian Debata Amanta, i ma na mandongani hamu.

SURAT NI SI PAULUS TU PARLAGUTAN ROM 5:1

Hara ni i, hita na nipatigor markite-hite haporsayaan, mangolu do hita di bagasan hasonangan dohot Debata markite-hite Tuhanta Jesus Kristus.

ZAKARIA 6:11

Baen ma sada tuku sian sere dohot perak na nihaulkon ni halahi i jana papakehon ma i tu ulu ni Malim Godang Josua anak ni si Josadak.

ZAKARIA 4:14

Jadi didok ia ma, “I ma dua halak na nipili, na jongjong di adopan ni Tuhan ni sandok tano on.”

MIKA 5:4

jana ia do hadameon i. Muda ro tentara ni Asur mamorangi tanonta on dohot mangarumpakkon partahananta, pabangkitonta ma pitu halak parmahan mangalaho halahi, bope sanga salapan halak pamimpin ni jolma.

JEREMIA 23:6

Muda dung mamarenta ia, malua ma halak Juda jana Israel mangolu ma di bagasan sonang. Goaron ma raja i ‘Tuhan do hasintonganta.’

JESAYA 54:10

Muncat pe angka dolok jana humutur dohot tor, tapi holong ni rohangKu nada muncat sian ho, jana janji hadameonKu nada morot sian ho,” ninna Tuhan, na manghaholongi ho.

PAMUNGKAAN 14:18

Ro ma si Melkisedek raja ni Salem, malim ni Debata Na Gumincat i muse do ia, maroban roti dohot anggur di si Abram,

MASMUR 110:1

Didok Tuhan do tu tuanku, “Juguk ma ho di siamunKu, lopus tu na Hubaen angka musumu gabe sidege-degean ni patmu.”

JESAYA 9:7

Mur tu godangna do kuasonia, jana tongtong dame harajaannia. Ia ma raja na songon panggonti ni si Daud, marojakan tu hatigoran dohot hasintongan do harajaannia sian mulai saonnari lalu tu salolotna. Angkon tulus sudena i baenon ni Tuhan Na Markuaso i.

JEREMIA 23:5

Didok Tuhan ma, “Dapot do i hatihana, patubuonKu ma di pomparan ni si Daud sada tunas na tigor. Marhite bisuk mamarenta raja i, jana patulusonna hatigoran dohot hatutuan di sandok luat.

JEREMIA 33:15

Anggo di hatiha i pilionKu ma sada raja na tigor sian pomparan ni si Daud. Padalanon ni raja i ma hatigoran dohot na sintong di sude luat.

ZAKARIA 4:9

Ninna ma, “Madung dipayakkon si Zerubabel ojahan ni BagasKu, jana pasidungonnia ma sude bangunan i. Muda tulus tarjadi i, botoon ni bangsongKu ma, bahaso Au do na marsuru ho ale Zakaria tu halahi.

2 SAMUEL 7:13

Ia do na giot pajongjong bagas di Au, jana pahotonKu harajaannia sapanjangna.

MASMUR 21:4

Dipangido ia ngolu; umur na ginjang dilehen Ho disia, dohot dope ngolu na salolotna.

JESAYA 9:5

Sipatu ni tentara na mangolat dohot bajuna na margulu mudar, gabe bagian ni api lopus puntung sasudena.