ZAKARIA 3:7 - BIBEL JAMITA NA DENGGAN

⁷ “Muda dioloi ho angka aturanKu jana didalankon ho angka karejo na Hulehen tu ho, jadi bolas ma ho gabe pamimpin tu pudi on di bagasan BagasKu dohot mangurus alamanna i. TangihononKu ma angka tangiangmu, songon panangihonKu di angka tangiang ni angka surusuruan na donok tu lambungKu.

ZAKARIA 3:7 Referans Kwoze

PAMUNGKAAN 26:5

PasupasuonKu ma ho, hara ni na nioloan ni si Abraham Au jana ditiop ia togu uhum dohot haputusanKu.”

MATEUS 19:28

Dialusi Jesus ma halahi, “Hudok ma tu hamu, satutuna di hatiha panompaon muse, di hatiha juguk Anak Ni Jolma i, di habangsa hamuliaonNa, hamu angka na mangihutkon Au, giot juguk di ginjang di habangsa na dua bolas i laho manguhumi Israel na dua bolas marga i.

HAMALIMON 8:35

Angkon donok tu pintu ni Bandar Parmianan Ni Tuhan i do hamu arian dohot borngin pitu ari honokna, laho mangkarejohon sanga aha na nidok ni Tuhan. Muda nada dibaen hamu songon i, mate ma hamu. Songon i do didok Tuhan i tu au.”

HALUMBAAN 3:21

Di na monang i ma lehenonKu anso juguk ia rap dohot Au di habangsangKi, laing songon Au na monang jana na juguk rap dohot Damang di habangsaNia i.

JOHANNES 14:2

Bahat do inganan di bagas ni Damang. Na giot pasingkop ingananmunu do Au kehe tusi. Pola ma Hudok songon i tu hamu, anggo na so tutu do songon i?

LUKAS 22:30

Tola ma hamu rap dohot Au marsonang-sonang di HarajaanKi. Jana juguhanmunu ma dua bolas habangsa laho manguhumi halak Israel sidua bolas marga i.”

ZAKARIA 6:5

Dialusi ia ma, “Halahi ma da na haruar tu opat jurusan ni alogo, dung sidung halahi mangadop tu Tuhan ni sude tano on.

ZAKARIA 4:14

Jadi didok ia ma, “I ma dua halak na nipili, na jongjong di adopan ni Tuhan ni sandok tano on.”

JEHESKIEL 48:11

Angka malim sian pomparan ni si Zadok ma nampuna tano na marhapunjungan i. Na dung burju do halahi mangoloi Tuhan jana nada songon halak Levi dongan samarga ni halahi i na dohot mambaen dosa rap dohot angka halak Israel na asing i.

1 JUJUR TAON 23:32

Dibaen tanggung jawab ni halahi mangurus Bandar Ni Tuhan dohot Bagas Ni Debata dohot mangurupi angka kahanggi ni halahi, i ma angka malim pomparan ni si Harun di na mandalankon ibadat di inganan i.

1 RAJA-RAJA 2:3

Patulus ma sanga aha na niparentahon ni Tuhan Debatamu tu ho. Oloi ma sude tona dohot angka parentaNia na tarsurat di buku ni si Musa, anso sai maruntung ho sanga tudia pe ho kehe dohot di sude sanga aha na nikarejohonmu.

JEHESKIEL 44:8

Indada be halahi na mangatur angka upacara na badia di bagasan BagasKi, tapi angka halak sileban na nitugaskon ni halahi i noma mandalankon.

HAMALIMON 10:3

Didok si Musa ma tu si Harun, “On ma pikiran ni Tuhan i di na nidokNia, ‘Sude halak na giot mangoloi Au angkon pasangaponna do Au angke sasada Au do Debata. Giot patuduhononKu hamuliaonKu tu bangsongKu.’ ” Tapi hohom do si Harun.

1 RAJA-RAJA 3:14

Jana muda burju ho mangoloi Au songon amamu si Daud, jana dipatulus ho angka uhumKu lehenonKu ma di ho umur na ginjang.”

JESAYA 62:9

Tapi hamu na manyuan dohot na palagut suhana, panganonmunu ma suhana jana pujionmunu ma Tuhan. Hamu na palagutkon batu ni anggur, inumonmunu ma aekna di alaman ni BagasKu.”

ZAKARIA 3:6

Dung i dipalalu Surusuruan i ma hata na nidok ni Tuhan tu si Josua,

ZAKARIA 6:15

Marroan be ma angka halak sian na dao jana urupanna ma pajongjong Bagas Ni Tuhan. Muda dung sidung dibangun Bagas Ni Tuhan, botoonmunu ma bahaso Tuhan Na Markuaso i do na marsuru au mandapotkon hamu. Tulus ma sudena i muda tutu situtu dioloi halahi angka parenta na sian Au Tuhan Debata ni halahi.”