ZAKARIA 14:21 - BIBEL JAMITA NA DENGGAN

²¹ Sude hudon na adong di Jerusalem dohot na di Juda sudena hapunjungkonon ma i baen sipakeon di bagasan paribadatan tu Tuhan Na Markuaso i. Pakeon ni halak na manghaulkon haul ma i pangalompaan ni juhut sihaulkononna i. Muda dung dapot hatiha i, nada adong be parjagal di Bagas Ni Tuhan Na Markuaso i.

ZAKARIA 14:21 Referans Kwoze

JEHESKIEL 44:9

Au Tuhan Debata, pabotohon, ganop halak sileban na so marsunat dohot halak na so marpangoloion tu Au, nada tola masuk tu BagasKi. Laing songon i muse do dohot tu halak sileban na hot maringanan ditonga-tonga ni bangso Israel.”

1 KORINTUS 10:31

Sanga aha pe na nibaenmunu – mangan sanga minum hamu – pasangapkon Debata ma baen hamu sudena i.

JOEL 3:17

“Ale Israel, saonnari botoonmunu, Au do Tuhan Debatamunu. Di Sion do Au maringanan i ma dolokKu Na Badia i. Gabe kota na badia noma Jerusalem, nada be taluhonon ni halak na asing kota i.

HALUMBAAN 22:15

Tapi sanga ise halak na mambaen habilean, angka na marhadatuon, angka halak na mambaen rorang, angka halak sibunu jolma, angka halak na marsomba gana-ganaan, dohot angka halak pargabus di hatana sanga markite-hite pambaenanna, di balian ni kota i do anggo inganan ni angka halak sisongon i.

HALUMBAAN 21:27

Tapi sanga ise halak na mangkarejohon angka pangalaho sihailahononkon, dohot angka pargabus, nada dipatola masuk tu bagasan – pendekna sandok na hodar, nada tola dioban masuk tu bagasan. Anggo na dipatola masuk tu bagasan, hum angka halak na tarsurat do goarna di bagasan buku hangoluan ni Anak Ni Biri-biri i.

NEHEMIA 8:10

Saonnari mulak ma hamu di bagasan jop ni roha. Lehen hamu ma deba sian sipanganon dohot anggurmunu tu angka halak na marhahurangan. Ari na marhapunjungan do ari on di Tuhanta, antong ulang hamu marsak. Hamogaan na nilehen ni Tuhanta di hamu, i ma na patogu rohamunu.”

1 PETRUS 4:17

Madung dapot hatihana, Debata manguhumi portibi on. Jana halak ni Debata sandiri do parjolo niuhuman. Antong, muda sian hita ma pungkaon ni Debata, tarbia muse noma ulaning na masa tu angka halak na so mangkaporsayai Jamita Na Denggan na sian Debata?

IBRANI 3:6

Tapi anggo Kristus, songon anak do di bagasNia. Jana hita do bagas i muda tongtong marmomos jana marpos ni roha paboa na jagitonta do sanga aha na niarop ni rohanta.

1 TIMOTEUS 3:15

betak sai tarlambat au anso diboto ho hian sanga na bia sapatutna hita mangolu songon halak na sabagas dohot Debata, i ma parlagutan ni Debata na mangolu. Parlagutan i ma na songon tiang partunggul ni hasintongan ni Debata.

ZAKARIA 14:20

Di ari i, gorgahonon ma tu angka giring-giring na di abit ni kudo hata na mandok, “Dihapunjungkon di Tuhan.” Argahonon ma angka hudon na di Bagas Ni Tuhan songon angka mangkuk parhaulan na di jolo ni langgatan.

ZAKARIA 7:6

Laing songon i muse muda mangan sanga minum hamu, nada he na mangan dohot minum tu hamu sandiri do?”

HOSEA 12:7

Hara ni i, ale hamu pomparan ni si Jakob, haporsayai hamu ma Debatamunu i jana mulak ma hamu tuSia. Gok holong ni roha dohot hatigoran ma ngolumunu, jana sobar ma hamu paintehon lopus tulus i dibaen Debatamunu.

JESAYA 35:8

Gabe adong ma disi dalan godang, goarna “Dalan na tu hangoluan.” Nada boluson ni pardosa sian i, na bodo nada ihutkononna sian i.

JESAYA 4:3

Ganop halak na tading di Sion jana pasipasi ni Jerusalem angkon digoari na badia, i ma ganop halak na di Jerusalem na nitodo manjagit haluaan.

PANGARATAION 12:12

Sai marjop ni roha ma hamu di inganan i, di adopan ni Tuhan, rap dohot angka dakdanakmunu, angka naposomunu dohot angka halak Levi na maringanan di hutamunu, dibaen nada dapot bagian angka halak Levi di tanomunu i.

PANGARATAION 12:7

Laing di inganan i muse, di adopan ni Tuhan Debatamunu na dung mamasumasu hamu, hamu rap dohot dongan sabagasmunu, disi ma mangan mandai rasoki sian pandapotan ni karejomunu.

JESAYA 52:1

Jonggor ma, jonggor ma! Pake ma gogomu songon pakean ale Sion, pake ma pakean hamuliaonmi, ale Jerusalem kota na badia! Harana umpe sahalak na so disunat sanga na hodar nangkon masuk be tu ho.

JEHESKIEL 45:1

Taran so dibagi-bagi dope tano i gabe pusako ni ganop marga, angkon jolo dipaasing do sabagian di Tuhan. Angkon dua bolas satonga kilometer do ginjang ni tano i, jana bidangna sampulu kilometer. Ditontuhon ma sude tano i na badia.

ZEPANYA 1:11

Mangandungi ma hamu jana martangisan di na tarbege sora i tu hamu, ale pangisi ni kota parlombang, angke ma pola mate sude parboniaga hona bunu!