ZAKARIA 10:1 - BIBEL JAMITA NA DENGGAN

¹ Pangido hamu ma tu Tuhan udan di hatiha pangkuron! Tuhan do na mambaen ronggur manyoro, lehenonNa tu halahi dohot udan tu ganop suan-suanan di ladang.

ZAKARIA 10:1 Referans Kwoze

JESAYA 44:3

Tano na manguas Hupabutong dohot aek, di tano na harsang, mardalan ma batang aek. DuruskononKu ma kuasongKu tu angka dakdanakmu, jana Hupasupasu pomparanmu.

JAKOBUS 5:7

Antong sobar ma hamu angka dongan lopus ro Tuhanta i. Ligi hamu ma sobar ni angka partani i paintehon lopus dilehen tanonia i suha na mararga disia. Sobar do ia paintehon udan di musim gugur dohot udan di musim bunga.

JEHESKIEL 36:37

Didok Tuhan Debata i ma, “Ale bangso Israel, Hupaloas ma hamu mangulahi mangido tolong tu Au; tambaanKu ma bahat ni bilanganmunu songon punguan ni biri-biri.

JESAYA 30:23

Muda manyabur same hamu, tongoson ni Tuhan ma udan anso tubu same i jana mangalehen suha marlompit ganda. Di pahan-pahananmunu pe rade ma bahat jampalanna.

MASMUR 65:9

Dilehen Ho do udan tu tano jana tongtong dipature Ho, napu dibaen Ho gabe bahat suhana. Digohi Ho do angka batang aek bubung dohot aek, gabe marsuha maradu bahat.

PANGARATAION 28:23

Nada ra ro udan, jana marpir ma tanomunu songon bosi.

JOHANNES 16:23

Anggo di ari i, nada sapaanmunu be sanga aha tu Au. Tutu do na Hudok on tu hamu; sanga aha na nipangidomunu sian Ama i markite-hite goarKu lehenon ni Damang ma i di hamu.

MIKA 5:7

Angka halak Israel na tading dope di tonga-tonga ni angka bangso, tudos tu singa ma i na manjalahi panganonna di harangan sanga di padang-padang. Manyaroso ma singa i tu tonga-tonga ni punguan ni biri-biri, soroanna ma biri-biri i jana parsibakkononna; nada adong na ro mangurupi biri-biri i.

AMOS 4:7

Au do na mangantak ulang ro udan di na porlu situtu maraek suan-suananmunu. Huparo udan tu kota na sada, tapi tu kota na asing nada. Ladang na sada por udan, hape ladang na asing halogoan.

HOSEA 10:12

Hudok ma, ‘Ale Israel! Buka ma ladang na imbaru di ho, sabur ma tusi same hatigoran, jana buat ma suha ni situtu ni rohamu mangkaholongi Au. Dibaen madung dapot hatihana mulak jana jalahanmu Au, Tuhanmu. Anso ro noma Au jana duruskononKu songon udan tu ho angka pasupasungKu.’

JEHESKIEL 34:26

PasupasuonKu ma halahi jana paloasonKu maringanan humaliang dolokKu Na Badia i. LehenonKu ma di halahi udan muda dung porlu di halahi; i ma udan na parohon pasupasu tu halahi.

JEREMIA 14:22

Adong ma he lakna na bisa parohon udan sian tonga-tonga ni debata gana-ganaan ni angka bangso i? Sanga tarbaen langit i ma lakna paporkon udan? Hum Ho do ale Tuhan, Debata na hami haporsayai, na bisa mambaen sasudena i!

JEREMIA 10:13

Hum parenta do dilehen Ia, gumadobur ma aek ni parlangitan dipanaek Ia ombun sian ujung ni tano on. Dibaen Ia hilap na margurasa di bagasan udan, ditongos Ia alogo sian panyimpananna.

JESAYA 5:6

PadiaronKu noma disi martubuan hayu riar. Nada be tamboranKu tanona i jana bona ni anggur i pe nada be papangkas-pangkasonKu. Mur padiaronKu noma i tehe lombuton ni sihupi dohot andor-andor. Salang ombun pe antahanKu noma ulang diparo udan tusi.”

PODA 16:15

Hadengganan ni roha ni raja na pangoluhon do i, songon ombun na paijur udan patumonaan.

MASMUR 104:13

Sian langit diduruskon Ho udan di dolok, dilehen Ho marlobi-lobian suha ni tano.

JEREMIA 51:16

Hum parenta do dilehen Ia, mardorom ma aek di awang-awang sian ujung ni tano on marroan angka ombun dibaen Ia. Dibaen Ia mamincar porkas di bagasan udan, ditongos Ia alogo sian panyimpananna.

1 RAJA-RAJA 17:1

Sanoli adong ma sada halak panurirang na margoar si Elia na sian Tisbe na di Gilead ro mandapotkon Raja Ahab jana didok ia ma, “Mangasahon Tuhan Debata na mangolu, na nisomba ni halak Israel jana na huoloi, hupaboa ma tu raja i, anggo dua tolu taon on nada adong ombun sanga udan rimbus pe, anggo so hudokkon.”

1 KORINTUS 3:6

Au manyuan jana si Apollos ma manyiram, tapi anggo na patubuhon laing Debata do.

HOSEA 6:3

Hara ni i, tahaburjuhon ma laho mananda Tuhan. Pasti do ro Ia tu hita songon parbincar ni mataniari jana songon udan na mangaehi tano di ujung ni ari nonat.”

MASMUR 72:6

Sai songon udan na mijur di padang ma ia, songon udan potir na mambornoki tano.

JOB 29:23

Marjop roha ma sudena manjaluangi angka hatangku, songon partani manyambut udan di musim bunga.

MASMUR 135:7

Sian ujung ni portibi diparo Ia ombun dibaen Ia hilap mardongan udan. Dung i diparentahon Ia tu haba-haba anso ruar be sian panyimpananna.

JEREMIA 5:24

Nada unjung diingot hamu laho pasangapkon Au, hape Au do nian na manongos udan, mamungka sian bona ni ari nonat lopus tu ujungna; laing Au muse do na mangalehen masa ni sabion di hamu ganop taon.