ZAKARIA 1:8 - BIBEL JAMITA NA DENGGAN

⁸ Di sada parnidaan taran borngin-borngin, huida ma sada halak manaek sada kudo na rara. Maradian ma ia di sada holbung di tonga-tonga ni hayu dulang-dulang. Jongjong ma di pudina i angka kudo na asing, adong na rara, na mera jambu dohot na bontar.

ZAKARIA 1:8 Referans Kwoze

HALUMBAAN 6:4

Dung i ruar ma sada nari kudo na asing. Na rara sun do tompa ni kudo i. Dilehen ma kuaso tu na manengget kudo i laho mangagohon hadameon sian portibi on, anso marsimatean jolma i na sada tu na asing. Dilehen muse ma tusia sada podang na godang.

HALUMBAAN 2:1

“Tu surusuruan ni parlagutan na di Epesus, songon on ma suratkon: On ma barita sian na maniop bintang na pitu i di tangan siamunNia jana na mardalan pahae-pahulu di holang-kolang ni parlampuan sere na pitu i.

ZAKARIA 13:7

Didok Tuhan Na Markuaso i ma, “Jongjong ma ho, ale podang, lancim ma parmahan na Husuru i! Matehon ma ia, gabe marserak ma angka biri-biri i. AloonKu ma bangsongKu.

JESAYA 55:13

Gonti ni sihupi tubu ma bona ni sampinur, gonti ni latong tubu ma hayu na huskus. Songon tanda na hot na paingotkon tu rohamunu, taringot tu na dung Hubaen, Au Tuhan mambaensa di hamu.”

JESAYA 41:19

SuananKu ma hayu ares di halongonan, hayu akasia, hayu murad dohot bona ni zetun. Husuan hayu sampinur di padang na bidang, dohot barangan songon i dohot tusam di lambungna.

DANIEL 7:13

Di bagasan parnidaan na tu au borngin i, huida ma adong tarsongon jolma. Ro ma ia dihuliangi ombun lalu kehe ia mandapotkon Na Tongtong Mangolu i jana dipatandahon tuSia.

DANIEL 2:19

Laing di borngin i dipaboa Debata ma tu si Daniel arti na di bagasan sada parnidaan. Jadi dipuji si Daniel ma Debata na di banua ginjang i.

JESAYA 57:15

Angke songon on do pandok ni Na Gumincat jana Na Marmulia na marhabangsa salolotna jana Na Sun Badia goarNa: “Di inganan na gincat jana badia do habangsangKu, tapi rap muse do dohot halak na magopu jana na toruk rohana, laho pangoluhon arop ni roha ni halak na toruk roha dohot laho pangoluhon roha ni halak na magopu.

JOB 4:13

Mangganggu modom lalu marjonggor, songon nipi na sambor di borngin na holom.

1 RAJA-RAJA 3:5

Borngin i dipataridahon Tuhan ma diriNa tusia di bagasan nipi jana manyapai, “Aha do dipangido rohamu lehenonKu tu ho?”

JOSUA 5:13

Jadi dompak di lambung ni Jeriko si Josua, ompot ma diida ia sada bayo na jongjong di jolonia manyintak podang. Didapotkon si Josua ma bayo i lalu disapai ia, “Dongan dehe ho sanga na alo?”

PAMUNGKAAN 20:3

Di sada borngin dipatidahon Debata ma diriNia tu raja i di bagasan nipi jana didok ma, “Mate noma ho, angke dibuat ho do antong dadaboru i na dung adong halaklahina.”

ENDE NA GODANG 6:2

Na kehe tu kobunna do haholonganki, di kobun parmasak do marmahani biri-biri dohot mamutiki angka bunga bakung.

ENDE NA GODANG 2:16

Au do nampuna haholonganki, jana ia do nampuna au; di holang-kolang ni bunga bakung ia marmahan biri-biri

HALUMBAAN 6:2

Jadi hupamanat ma, gabe huida ma sada kudo na bontar. Ditiop na manengget kudo i do sada sior jana dilehen ma tusia sada tuku. Ruar ma ia songon sada halak parmonang, na maju laho mambuat hamonangan i.

NEHEMIA 8:15

Jadi gabe dibaen halahi ma boa-boa di sude Jerusalem dohot di angka kota maradu angka huta songon on, “Kehe ma hamu tu dolok jana marsibuat ma sian i angka dangka ni tusam, zetun, hayu miak, mare-mare dohot angka hayu na asing laho mambaen undung-undung domu tu paraturan na di bagasan Buku Uhum i.”

ZAKARIA 1:7

Di tanggal dua pulu opat bulan Sebat, i ma bulan sabolas di taon paduahon hatiha mamarenta Raja Darius, ro ma hata ni Tuhan tu Panurirang Zakaria anak ni si Berekia, anak ni si Ido songon on:

ZAKARIA 1:10

Halak na jongjong di tonga-tonga ni hayu dulang-dulang i mulai manghatai, ning ia ma, “On ma halahi sude na nisuru ni Tuhan giot manghaliangi tano on!”

ZAKARIA 1:11

Dipaboa halahi ma sude tu Surusuruan i, “Madung hami bolusi sude sisik ni portibi on, hape na sonang do sude tano on hara ni na dung ditaluhon.”

PAMUNGKAAN 46:2

Mandok hata do Debata tusia di bagasan parnidaan di sada borngin jana pio-pio ma tusia, “Jakob, Jakob!” ninna. “Olo Tuhan,” ning ia mangalusi.

BILANGAN 12:6

didok Tuhan i ma, “Tangihon hamu ma sanga aha na giot dohononKu! Muda adong angka panurirang di tonga-tongamunu, giot Hupatidahon diringKu tu halahi di bagasan parnidaan, jana mangkatai Au dohot halahi markite-hite nipi.