TITUS 2:12 - BIBEL JAMITA NA DENGGAN

¹² Na mangajari hita do hadengganan ni roha ni Debata i anso ulang be maralo ngolunta tu hagiot ni Debata jana nada be mangihutkon hagiot ni portibi on; diajari do hita anso malo hita mangarajai dirinta, tigor jana manghaholongi Debata.

TITUS 2:12 Referans Kwoze

JEHESKIEL 36:27

DuruskononKu ma tondingKi tu bagasan rohamunu jana sai jagoanKu ma hamu anso mardalan mangihutkon angka aturan na sian Au jana anso mangoloi di sude na Huparentahon.

MATEUS 16:24

Dung i didok Jesus ma tu anak siseanNia i, “Muda adong halak na giot mangihutkon Au, angkon dihalupahon ia do dirina sandiri, dung i diporsan ia ma silangna dung i pe anso diihutkon Au.

SURAT NI SI PAULUS TU PARLAGUTAN ROM 6:19

Mangihutkon hasomalan ni jolma do mangkatai au dohot hamu, anso ummura astuanmunu. Songon na dipasahatmunu na jolo goar-goaran ni pamatangmunu tu na mangoloi hahodaran dohot hajahatan na maroban hamu tu hahodaron, laing songon i saonnari pasahat hamu ma goar-goaran ni pamatangmunu gabe hatoban ni hatigoran, jana anso gabe badia ma hamu.

MASMUR 4:3

Boto hamu ma, na dung ditodo Tuhan halak na nihaholonganNia, ditangihon Tuhan do muda pio-pio au tuSia.

2 PETRUS 2:9

Jadi anggo taringot tu angka halak na mangihutkon hagiot ni Tuhan, diboto Tuhan do sanga na bia dalanna baenonNia laho paluahon halahi sian angka ujian na masa tu halahi. Jana taringot tu angka jolma na jahat pe, diboto Tuhan do manabunihon halahi anso hona siksa di Ari Paruhuman,

1 JOHANNES 2:6

Sanga ise na mandok na marsada ngoluna dohot Debata, angkon laing songon Jesus Kristus ma muse ngoluNia.

2 TIMOTEUS 3:12

Angkon hona ayak-ayak do tutu sude halak na ra pasahat ngoluna marsomba tu Debata jana na marpardomuan dohot Kristus Jesus,

HALUMBAAN 14:12

Na porlu dison i ma hasobaran ni angka halak na badia, jana na mangihutkon parenta ni Debata dohot marhaporsayaan tu Jesus.

LUKAS 1:75

di bagasan habadiaan dohot hatigoran di adopanNia, salolot ni lolotna.

1 TESSALONIKA 4:7

Dipio Debata pe hita, nada anso hodar ngolunta, tapi anso badia do ngolunta i.

TITUS 3:3

Angke hita pe oto do najolo, nada mangoloi jana nada tigor. Dirajai angka hagiot dohot por ni roha na marragam rupa do hita. Na mangolu di angka hajahatan dohot gutgut dohot na marsihosoman hian do hita.

1 TESSALONIKA 4:9

Nada pola porlu be suratkononnami tu hamu anggo taringot tu na manghaholongi dongan sahaporsayaan sanga na bia baenonmunu. Hamu sandiri pe madung diajari Debata anso marsihaholongan.

EPESUS 2:2

Angka hasomalan ni portibi on do dipaolo-oloi hamu hatiha i; astuanna, tunduk tu angka parkuaso ni harajaan na di awang-awang i do hamu, i ma tondi na laing mangela-ela roha ni angka halak na so ra tunduk tu Debata saonnari.

SURAT NI SI PAULUS TU PARLAGUTAN ROM 12:2

Ulang pahombar hamu dirimunu tu hasiangan on, tapi pauba hamu ma dirimunu markite-hite haimbaruon ni rohamunu anso tartimbang hamu sanga dia do hagiot ni Debata: Na denggan, na tumbuk jana na sanggam.

SURAT NI SI PAULUS TU PARLAGUTAN ROM 6:12

Antong ulang be paloas hamu dosa i mangarajai pamatangmunu na ra mate i, anso ulang dioloi hamu be hagiotna na jahat i.

MATEUS 28:20

Laing ajari hamu ma halahi anso burju mangoloi sude na Huparentahon tu hamu. Botoonmunu ma. Au ma tongtong rap dohot hamu lopus tu hasidungan ni tano on.”

1 JOHANNES 2:27

Harana di bagasan dirimunu tinggal do pamiahion na dung nijagitmunu sian Ia. Hara ni i nada porlu hamu ajaran ni halak na asing, tapi songon dia pamiahonNia mangajari hamu taringot tu sudena – jana sintong do pangajaranNia i; nada gabus – jana songon dia Ia mangajari hamu na jolo, songon i muse ma nian hamu maringanan di bagasan Ia.

2 PETRUS 3:11

Antong, anggo na giot segohonon do sudena i, angkon gabe na badia ma ngolumunu jana marpangoloion tu Debata,

IBRANI 8:11

Sahalak pe nada pola porlu halahi mangajari donganna sabangso, sanga paboahon tu donganna, ‘Tanda ma Debata.’ Angke sudena halahi, sian na menekna lopus tu na gumodang, tandaonna ma Au.

1 TIMOTEUS 6:17

Tu angka halak na kayo di tano on, paingot ma halahi anso ulang manyombong jana anso ulang mararop ni roha halahi tu angka barang-barang na ra salpu – songon sinadongan rupani. Angkon mararop ni roha tu Debata do halahi, i ma Debata na mangalehen sasudena tu hita marlobi-lobi anso sonang hita.

1 TIMOTEUS 4:12

Ulang ma padiar sahalak pe marlayas ni roha tu ho hara ni na poso i dope ho. Tapi angkon gabe tiruan na denggan ma ho di angka halak na porsaya, di bagasan pangakataionmu, pangalahomu, holong ni rohamu, haporsayaanmu dohot di haiason ni ngolumu.

KOLOSSE 1:22

Tapi anggo saonnari madung dipadame Ia hamu di bagasan pamatangNia markite-hite hamatean i, anso badia hamu, nada martihas jana na so sipincangon maradopkon Ia.

GALATIA 5:24

Angka halak na dung gabe nampuna ni Kristus Jesus, madung dimatehon halahi do bakona humani na jat i.

GALATIA 1:4

na dung mangalehen diriNa hara ni dosanta, laho paluahon hita sian hajahatan saonnari, mangihutkon hagiot ni Debata Amanta i.

2 KORINTUS 7:1

Antong hamu ale dongan na nihaholongan! Tu hita do dibaen angka janji i sudena. Tapaias ma dirinta sian sasude na pahodarkon pamatang dohot rohanta. Tahabiari ma Debata, anso sanggam tarbaen hita mangolu mamunjung tu Debata.

2 KORINTUS 1:12

Anggo na pagodang rohanami on do: Dipapos taroktoknami do rohanami taringot tu sude na hami karejohon di tano on – lumobi na marpardomuan tu hamu – sian roha na ias jana na polin na sian Debata do hami baen i sudena, nada sian habisuhon ni portibi, tapi sian asi ni roha ni Debata do.

SURAT NI SI PAULUS TU PARLAGUTAN ROM 8:13

Harana, muda mangihutkon bako ni jolma do hamu mangolu, ujungna angkon mate ma hamu; tapi anggo mardongan kuaso ni Tondi Parbadia do, matehononmunu ma torus angka pangalahomunu na mardosa i, gabe mangolu ma hamu.

BAENON NI ANGKA RASUL 24:25

Tapi di na nipajojornia taringot tu haburjuon dohot hatomanon songon i dohot taringot tu Ari Parpudi, gabe mabiar ma si Peliks. Didok ia ma tu si Paulus, “Saonnari madung tola ho mulak. Hupio pe ho sanga andigan habolasan,” ning ia.

BAENON NI ANGKA RASUL 24:16

Hara ni i do umbaen na tongtong au marsitutu karejo, anso ias taroktokku maradopkon Debata jana ias muse maradopkon jolma.

1 JOHANNES 5:19

Taboto do na sian Debata haroroanta, jana sude na satano on di bagasan tangan ni si Parjahat i.

EPESUS 1:4

Dompak so dijadihon dope portibi on, madung ditodo Debata hian hita markite-hite Kristus anso gabe Debata sandiri nampuna hita jana na so martihas di adopanNia. Hara ni holong ni roha ni Debata,

JOHANNES 14:30

Nada pola bahat be Au mandok hata tu hamu angke madung ro raja ni portibi on. Tapi nada markuaso i tu Au.

JOHANNES 6:25

Dung marsuo halahi dohot Jesus di ipar ni dano i, disapai halahi ma tuSia, “Ale, Rabbi sadihari dehe Ho lalu tuson?”

LUKAS 1:6

Jop do roha ni Debata marnida ngolu ni halahi na saripe. Rap sipangoloi do halahi na dua di parenta dohot paraturan ni Tuhan.

MASMUR 105:45

anso oloan ni halahi angka uhumNia jana ihutkononna parentaNia. Puji ma Tuhan!

JUDAS 1:18

Madung dipaboa halahi hian tu hamu, marroan do angka halak na mangincahi hamu marayak dapot ari na parpudi; i ma angka na mangolu mangihutkon giot-giot ni halahi sandiri na jat i.

2 TIMOTEUS 4:10

harana madung ditinggalkon si Demas au hara ni holong ni rohania tu portibi on. Madung kehe ia tu Tessalonika. Si Kreskes pe madung kehe tu Galatia jana si Titus tu Dalmatia.

MATEUS 12:32

Halak na mandok hata laho mangalo Anak Ni Jolma, tarsesa do i. Tapi anggo halak na mandok hatana laho mangalo Tondi Parbadia, bagi na bia pe nada tarsesa be i, bope di portibi on sanga pe di ari na giot ro!”

1 TIMOTEUS 6:9

Tapi sanga ise angka halak na giot kayo, targoda jana hona jorgong ma i dibaen hagiot na oto na marragam rupa boti na manyegohon. Angka hagiot na songon i ma na mangalantuk dohot na mangagohon halak.

JAKOBUS 1:27

Haburjuon marugamo na ias jana na so martihas diadopan ni Debata Amanta, on do: Manyarihon na so marama so marina dohot angka na mabalu na mardangol; dohot na manjagohon dirina sandiri anso ulang sego dibaen portibi on.