TITUS 1:16 - BIBEL JAMITA NA DENGGAN

¹⁶ Pandok ni halahi, ditanda halahi do Debata, hape anggo sian parange ni halahi nada tarida na songon i. Jahat do roha ni halahi jana nada marpangoloion. Sada pe nada adong tarpatupa halahi na denggan.

TITUS 1:16 Referans Kwoze

1 JOHANNES 2:4

Sanga ise na mandok, “Hutanda do Debata,” hape nada dioloi ia angka tona ni Debata, pargabus do halak na songon i, jana na so adong do maringanan jamita na sintong i na sian Debata di bagasan rohania.

JESAYA 29:13

Didok Tuhan, “Hum hata-hata sajo do angka jolma i manyomba Au, hape anggo roha ni halahi dao do sian Au. Hum paraturan ni jolma na niapil sajo do anggo ibadat ni halahi.

EPESUS 5:6

Ulang jabat tarpaoto-oto hamu dibaen angka pangkataion na rumar. Angke angka pangalaho na songon on ma mambaen muruk Debata tu angka halak na so ra mangoloi Ia.

JEHESKIEL 33:31

Ro do halahi marbahat-bahat songon bangsongKu, tangihonon ni halahi do angka hata na nidokmu, tapi anggo na niparentahonmu nada diterge halahi. Hata holong ni roha do dipajojor bibir ni halahi, tapi anggo rohana di bagasan hum mamikiri untung sajo do.

JUDAS 1:4

Angke madung adong masuk tu tonga-tonganta sian angka halak na so porsaya so sian pamotoanta. Dipabalik-balik halahi do jamita taringot tu asi ni roha ni Tuhanta i, anso tarbaen halahi patuluskon angka parange ni halahi na so ture. Jana na so ra do halahi mangoku paboa Jesus Kristus do Parkuaso dohot Tuhanta na sasada i. Mamungka sian nahinan madung dipaboa hian di Buku Na Badia i uhuman na tu halahi.

SURAT NI SI PAULUS TU PARLAGUTAN ROM 1:28

Jadi hara ni na so diporluhon halahi laho mananda Debata, laing songon i ma dipasahat Debata halahi tu parrohaon na so hasaya, mambaen na so tupa.

HALUMBAAN 21:27

Tapi sanga ise halak na mangkarejohon angka pangalaho sihailahononkon, dohot angka pargabus, nada dipatola masuk tu bagasan – pendekna sandok na hodar, nada tola dioban masuk tu bagasan. Anggo na dipatola masuk tu bagasan, hum angka halak na tarsurat do goarna di bagasan buku hangoluan ni Anak Ni Biri-biri i.

1 SAMUEL 15:22

Tapi didok si Samuel ma, “Dia do na jumop roha ni Tuhan, pangoloion tu Tuhan do ulang pado na manghaulkon haul? Marpangoloion tu Tuhan, dumenggan do i sian na manghaulkon haul. Dumenggan do i sian tabo-tabo ni biri-biri.

HALUMBAAN 21:8

Tapi anggo angka parbiar, angka na so tontu, angka na so ture, sibunu jolma, angka na rogon, angka pardatu-datu, angka na manyomba gana-ganaan dohot sudena pargabus, laut api do inganan ni halahi dohot barerang na gara-gara, i ma hamatean na paduahon i.”

1 TIMOTEUS 5:8

Muda halak na so paturehon koum sisolkotna, lumobi donganna samudar, na mamorso haporsayaanna do halak na songon i; jumatjat dope i sian halak na so porsaya.

JESAYA 58:2

Dijalahi halahi do Au ganop ari, jana marpor ni roha giot mananda nasa dalanKu. Songon bangso na mangkarejohon na tutu dohot na so maninggalkon aturan ni Debatana disapai halahi do Au taringot tu aturan na tigor, jop do roha ni halahi mangadop tu Debata.

JESAYA 48:1

Tangihon ma hata on, ale pomparan ni si Jakob, na mandok dirina marhite goar ni Israel, jana na nidok pomparan ni Juda; na marsumpa mangasahon goar ni Tuhan jana na mangokui Debata ni Israel, tapi nada sasintongna jana nada sian ias ni rohana.

1 SAMUEL 15:24

Umbege i, mangoku ma si Saul tu si Samuel, didok ia ma, “Tutu do i madung mardosa au, hulaosi do parenta ni Tuhan jana hupasiding sipaingotmi. Na mabiar do au tu paranganki gabe huoloi pangidoan ni halahi i.

JOB 15:16

Mur jolma na rorang dohot na jurngit ma hape, na mandorguk hajahatan songon aek.

1 TIMOTEUS 1:9

Angkon laing ingoton do, dibaen pe angka Tona ni ugamo i, nada na giot di halak na burju, tapi na giot tu halak pangalanggar Tona do i, tu angka na jahat, tu halak na so mananda Tuhan, tu halak pardosa, tu halak na so marugamo, tu parroha portibi, tu halak sibunu simatobangna, tu angka sibunu jolma,

BILANGAN 24:16

Ise na dilehen hamaloon manangihonsa angka hata na ro sian Debata? Ise tarbaen manjagit parbinotoan sian na guminjang, sian Tuhan? Huida di bagasan parnidaan, dohot mata na ungkap sada parnidaan sian Debata Na Sun Markuaso.

JEREMIA 6:30

Goaron noma halahi perak na so hasaya angke Au Tuhan, madung manulakkon halahi.

PODA 30:12

Adong do halak na mangetong ias dirina hape nian na santak do hodarna.

JESAYA 59:13

Madung mardosa hami jana mangalo maradopkon Ho, jana nada ra mangihutkon Ho. Madung hami parkanciti halak na asing jana marbalik hami sian Ho. Nada tutu be pikirannami, jana hatanami pe gabus noma.

JEREMIA 5:2

Haru pe didok halahi, “Marhite Tuhan na mangolu,” tapi marsumpa pargabus do halahi.

JEREMIA 12:2

Songon suan-suanan, disuan Ho halahi; marurat ma i, martumbur jana marbatu. Matua sai mandok hata na denggan-denggan halahi taringot tu Ho, hape anggo di bagasan roha ni halahi satutuna nada holong roha ni halahi mida Ho.

2 TIMOTEUS 3:17

Mardongan Buku Na Badia i dipasingkop do sadenggan-dengganna sanga ise na mangoloi Debata di sude ragam ni parkarejoan na denggan.

TITUS 3:1

Paingot ma sudena ruasmu anso tunduk halahi tu angka pamimpin dohot na markuaso di negara, jana mangoloi dohot na patuluskon sandok na denggan.

TITUS 3:3

Angke hita pe oto do najolo, nada mangoloi jana nada tigor. Dirajai angka hagiot dohot por ni roha na marragam rupa do hita. Na mangolu di angka hajahatan dohot gutgut dohot na marsihosoman hian do hita.