SURAT NI SI PAULUS TU PARLAGUTAN ROM 9:17 - BIBEL JAMITA NA DENGGAN

¹⁷ Angke Buku Na Badia i mandok tu raja ni Mesir, “Hubaen pe ho gabe raja, na adong do sada maksudKu, i ma laho patuduhon kuasongKu markite-hite ho jana mambaen tarbonggal goarKu di portibi on sudena.”

SURAT NI SI PAULUS TU PARLAGUTAN ROM 9:17 Referans Kwoze

HARURUAR 9:16

Tapi Hupadiar dope mangolu hamu laho patidahon kuasongKu tu hamu, anso tarbonggal goarKu tu sude portibi on.

PODA 16:4

Dibaen Tuhan do sude hombar tu tujuanna; jana hamagoan do ujung ni parjahat.

JOHANNES 17:26

Madung Hupabotohon Damang tu halahi; jana sai pupuonKu do mambaen songon i, anso laing dihilala halahi muse holong ni roha ni Damang tu Au jana Au pe sada ma dohot halahi.”

JESAYA 37:20

Ale Tuhan Debata, palua ma hami sian angka halak Asur i, anso diboto sandok bangso na di tano on bahaso sasada Ho do Tuhan.”

ESTER 4:14

Sanga na bia pe dalanna pasti maruli partolongan do halak Jahudi, anso malua halahi. Tapi anggo laing hohom do ho di bagasan pangalaho na songon on, ho sandiri pe mate do jana abis ma barita ni keluarga ni amangmu. Ise he umboto i, betak hara ni haporluan di angka hatiha na songon on do antong umbaen na hona pili ho gabe ratu!”

JOSUA 9:9

Jadi dicaritohon halahi ma tu si Josua songon on, “Na sian luat na dao situtu do hami ro, tuan, dibaen madung hami bege taringot tu Tuhan Debata na nisombamunu tuannami. Madung hami bege taringot tu sude na nibaenNia di Mesir.

GALATIA 3:22

Hape di bagasan Buku Na Badia i tarsurat do bahaso sasudena jolma manusia madung di toru ni kuaso ni dosa. Jadi hara ni haporsayaan tu Jesus Kristus sajo noma tarlehen tu jolma na nijanjihon i, i ma tu halak na porsaya i.

1 SAMUEL 4:8

Anggo on mago ma hita! Ise dope tarbaen paluahon hita sian Debata Na Gumogo i? Nada he Debata i do na mamunu halak Mesir di parhorsihan i najolo?

GALATIA 4:30

Tapi bia do tarsurat di Buku Na Badia i? Songon on do tarsurat anggo disi: “Paorot ma boru hatoban i rap dohot anakna i, angke nada tola anak ni boru hatoban i sapanganan rap dohot anak na sian boru na mardeka i.”

GALATIA 3:8

Madung diida Buku Na Badia i hian do na dung dilehen Debata dalan anso mardenggan mangulahi angka halak na so Jahudi dohot Debata, muda porsaya halahi tu Debata. Tu si Abraham do parjolo dipaboa Jamita Na Denggan i, di bagasan janji on, “Markite-hite ho, pasupasuon ni Debata ma sandok bangso na di ginjang tano on.”

SURAT NI SI PAULUS TU PARLAGUTAN ROM 11:4

Tapi bia do alus ni Debata tusia? “Hutinggalkon dope pitu ribu halak di Au, na so unjung marsomba tu Baal.”

DANIEL 4:22

O rajanami, raja i ma da hayu na gincat i. Sai martamba do hagodangan ni raja i lalu tu langit jana mabidang do kuaso ni raja i lopus tu ujung ni tano on.

MASMUR 76:10

Rimas ni jolma gabe pujian do i di Ho jana na debanari i gabe hauntunganMu dipake Ho.

JESAYA 19:12

O ale raja ni Mesir, dia ma he panuturi ni raja angka na malo-malo i? Betak na diboto halahi do antong sangkap ni Tuhan Na Markuaso i salaho tu Mesir.