SURAT NI SI PAULUS TU PARLAGUTAN ROM 8:26 - BIBEL JAMITA NA DENGGAN

²⁶ Laing songon i do Tondi Ni Debata, na ro do i mangurupi hita di hagaleanta. Angke anggo hita nada taboto sanga na tarbia sapatutna hita martangiang. Tapi Tondi i sandiri do mangadop tu Debata laho mangidohon di hita sian lungun ni roha na so tarhatahon jabat nada tuk hata pajojorkonsa.

SURAT NI SI PAULUS TU PARLAGUTAN ROM 8:26 Referans Kwoze

MATEUS 10:20

Nada hamu na giot mangkatai disi, Tondi ni Ama na di banua ginjang i do, tapi markite-hite hamu.

EPESUS 6:18

Mardongan tangiang mangido tolong tu Debata ma patulus hamu sudena i. Ulang hamu lupa martangiang ganop adong hatihana sanga hombar tu panogu-noguon ni Tondi Parbadia di hamu. Tongtong ma jonggor hamu. Tongtong ma martangiang hamu, manangiangkon sudena halak na porsaya.

GALATIA 4:6

Dibaen dakdanak ni Debata do hamu, disuru Debata muse ma Tondi Ni AnakNia i masuk tu bagasan rohanta, i ma Tondi na pio-pio, “Abba, ale Amang.”

JOHANNES 14:16

Dung i Hupangido pe tu Ama i, anso dilehen Ia Pangurupi na asing di hamu, na tinggal rap dohot hamu salolot-lolotna,

EPESUS 2:18

Markite-hite Kristus tarbaen ma hita sudena solkot tu Ama i – sanga na halak Jahudi sanga pe angka na so Jahudi.

SURAT NI SI PAULUS TU PARLAGUTAN ROM 8:15

Harana anggo Tondi na nijagitmunu i ale angka dongan, nada dibaen i hamu gabe hatoban, anso gabe mangulahi mabiar hamu. Sabalikna do, gabe angka dakdanak ni Debata do hamu dibaen. Jana hara ni pangonjar ni kuaso ni Tondi i, pio-pio ma hita tu Debata mandok, “Abba, ale Amang!”

MASMUR 6:9

Diparate-atehon Ia do tangiangku, jana dioloi Ia pangidoanku.

IBRANI 4:15

Angke anggo Malim Godang i nada malim na so dohot mangkilala angka hagaleanta. Ma pola hona uji Ia di sude ragam ni pangalaho, laing songon hita; hum i tutu, nada mardosa Ia!

JAKOBUS 4:3

Tarsung pe dipangido hamu, hape laing nada dapotan hamu, angke madung sala tujuan ni pangidoanmunu i; na laho pasonang-sonangkon dirimunu sajo do na nipangidomunu i.

SURAT NI SI PAULUS TU PARLAGUTAN ROM 15:1

Anggo hita na margogo, angkon manaon hagaleon ni angka na so margogo do. Ulang ma tajalahi hasonangan ni dirinta sandiri.

LUKAS 22:44

Mabiar situtu do Jesus, gabe mur marsitutu ma Ia na martangiang i. Songon mudar noma hodokNia manetehi tu tano i.]

ZAKARIA 12:10

Dung i lehenonKu ma tondi na sai marhagiot mangampuni dohot na marhagiot martangiang tu pomparan ni si Daud dohot tu halak na maringanan di Jerusalem. Tatapon ni halahi ma na nitiham ni halahi jana andungan ni halahi ma i songon pangandungi ni anak sasada. Lungun noma pangandung ni halahi, songon dia na agoan anak siangkaan.

2 KORINTUS 5:4

Salolot di bandar on hita maringanan, sai holsoan do hita hara ni dokdok ni pananggunganta. Nada hara ni na por rohanta malua sian pamatangta na sian tano on, tapi hara ni na lungun do rohanta laho manyolukkon pamatang na sian banua ginjang i tu na parjolo i anso dibondut hangoluan i pamatangta na ra mate on.

MASMUR 10:17

Tuhan, ditangihon Ho do tangiang ni halak na bile, jana dipagodang Ho do roha ni halahi be.

2 KORINTUS 5:2

Holsoan do hita anggo di bagasan bandarta na saonnari on, hara ni lungun ni rohanta tu bagasta na sian banua ginjang i anso dipapakehon ma i tu hita.

MATEUS 20:22

“Na so diboto hamu do na nipangidomunu,” ning Jesus tu halahi. “Tarinum hamu ma lakna panginuman na giot inumonKi?” “Tarinum hami do i,” ninna halahi.

MASMUR 102:5

Mangangguki au marngiar, hum tinggal bobak lohot di holi-holi noma pamatangku.

MASMUR 6:3

Ale Tuhan, na sun ma sompit ni rohangku, sadia honok nari tadingkononMu au?

IBRANI 5:2

Laing gale do Malim Godang i di ragam-ragam ni pangalaho, tapi haru songon i pe laing tarbaen ia muse dope marlambok ni roha maradopkon angka halak na so umboto sanga aha jana na lilu pardalananna.

SURAT NI SI PAULUS TU PARLAGUTAN ROM 7:24

Jolma na lebak do au. Ise ma he na giot palua au sian pamatang hamatean on?

MASMUR 69:3

Pio-pio do au marsurak lopus loja jana mahiang tolonanku. Maniak huhilala matangku mararop roha di Debatangku.

MASMUR 102:20

giot manangihon holos ni halak tahanan dohot paluahon jolma na niuhum tu hamatean.

JOB 37:19

Ajari ma hami salaho tu sidohononnami maradopkon Debata; nada adong na tarpajojor hami, rumar do pikirannami.

ANDUNG 3:56

Gomos pangidoanku ulang be da tulak au. Jadi gabe ditangihon Ho pangidoanki jana didok Ho, ‘Ulang ho mabiar.’