SURAT NI SI PAULUS TU PARLAGUTAN ROM 10:17 - BIBEL JAMITA NA DENGGAN

¹⁷ Jadi sian parbinegean do ro haporsayaan, jana parbinegean i markite-hite hata ni Kristus.

SURAT NI SI PAULUS TU PARLAGUTAN ROM 10:17 Referans Kwoze

GALATIA 3:2

Paboa hamu ma jolo tu au pangalaho na sada on: Adong he hara ni na mandalankon Tona do umbaen na nijagitmunu Tondi Parbadia nabaruon, sanga hara ni na umbege Jamita Na Denggan na sian Debata dohot hara ni na porsaya tu Kristus do?

GALATIA 3:5

Dipasingkop Debata do TondiNa tu hamu jana dibaen do angka hahomangan di tonga-tongamunu. Adong he hara ni na mandalankon Tona umbaen na nipatupa ni Debata songon i, sanga hara ni na umbege Jamita Na Denggan i dohot hara ni na mangkaporsayai Kristus do?

1 TESSALONIKA 2:13

Adong dope sada nari pangalaho na mambaen hami angkon tongtong mandok tarimakasi tu Debata. I ma, hara ni panjagitmunu di jamita na sian Debata dompak hami jamitahon tu hamu. Nada songon jamita na sian jolma i dijagit hamu tapi songon jamita na sian Debata do. Jana na sian Debata do i tutu! Na markarejo do hata ni Debata di bagasan dirimunu na mangkaporsayai Kristus.

KOLOSSE 3:16

Sai mur maringan ma angka pangajaran ni Kristus tu bagasan rohamunu jana dilehen ma pasupasuNa di hamu mardapot-dapot. Marsiajar-ajaran ma hamu jana marsipaingotan samalomunu. Endehon hamu ma Masmur dohot puji-pujian bope angka ende partondion tu Tuhan. Mardongan hatarimakasion sian bagasan rohamunu, marende ma hamu tu Debata.

LUKAS 11:28

Tapi dialusi Jesus ma, “Sanga ise na umbege hata ni Debata jana na mandalankonsa, halahi do na martua situtu!”

MARKUS 4:24

Didok Jesus dope muse. “Parrohahon hamu ma sanga aha na nibegemunu on! Muda bahat do dikarejohon hamu, laing bahat muse ma lehenon ni Debata di hamu. Lobi dope sian na nihalojahonmunu. Tapi muda otik do dikarejohon hamu, otik muse ma jagitonmunu.

LUKAS 8:21

Tapi didok Jesus ma tu halahi sude, “Angka halak na umbege hata ni Debata jana na mamarangehonsa, i do Dainang dohot anggingKu.”

SURAT NI SI PAULUS TU PARLAGUTAN ROM 1:16

Dibaen nada maila au hara ni Jamita Na Denggan i, angke i do hagogoon ni Debata na markarejo laho paluahon sudena halak na porsaya; na parjolo i ma halak Jahudi, dung i muse angka bangso na asing.

SURAT NI SI PAULUS TU PARLAGUTAN ROM 10:14

Tapi bia ma parpio ni halak tuSia anggo so porsaya dope halahi tuSia? Jana bia ma pangkaporsayai ni halahi di Tuhan i anggo so jolo dibege halahi taringot tuSia? Jana bia ma baenon ni halahi umbege taringot tuSia, anggo so adong halak na manjamitahonsa?

1 PETRUS 1:23

Angke markite-hite hata ni Debata na mangolu jana na manongtong i, madung gabe jolma na imbaru hamu dibaen, i ma na so sorang sian jolma, tapi sian Ama na manongtong i do.

LUKAS 8:11

“Ondo astuan ni umpama i: Same i, i ma hata ni Debata.

HALUMBAAN 1:9

Si Johannes do au, kahanggi bope donganmunu saparjuangan na topet manaon parkancitan, di harajaan dohot di pohom ni roha paintehon Jesus. Na tarbuang do au di pulo Patmos hara ni na pararatkon jamita na sian Debata na nipasahat ni Jesus.

2 KORINTUS 2:17

Nada songon halak na asing anggo hami, na mambaen jamita na sian Debata i songon barang sigadison sajo. Polin do tujuannami, harana Debata do na marsuru hami markarejo. Jana diida Debata sandiri do hami songon naposo ni Kristus pasahat jamita i.

JOB 42:5

Nabaruon dapot sian parbinegean do parbinotoanku tu Ho, tapi anggo saonnari adop mata do hutanda Ho.

IBRANI 4:2

Harana madung dipaboa tu hita Jamita Na Denggan i laing songon na tu halahi. Hape anggo di halahi nada marguna jamita i. Angke di na nibege ni halahi jamita i, nada dijagit halahi i mardongan haporsayaan tu Debata.

JOHANNES 1:37

Dibege sisean ni si Johannes sidua halak i do na nidok ni si Johannes songon i, gabe diihutkon halahi ma Jesus.