SURAT NI SI PAULUS TU PARLAGUTAN ROM 1:16 - BIBEL JAMITA NA DENGGAN16 Dibaen nada maila au hara ni Jamita Na Denggan i, angke i do hagogoon ni Debata na markarejo laho paluahon sudena halak na porsaya; na parjolo i ma halak Jahudi, dung i muse angka bangso na asing. Gade chapit la |
Adong dope sada nari pangalaho na mambaen hami angkon tongtong mandok tarimakasi tu Debata. I ma, hara ni panjagitmunu di jamita na sian Debata dompak hami jamitahon tu hamu. Nada songon jamita na sian jolma i dijagit hamu tapi songon jamita na sian Debata do. Jana na sian Debata do i tutu! Na markarejo do hata ni Debata di bagasan dirimunu na mangkaporsayai Kristus.
Hara ni hadengganan na dipataridahonmunu, gabe bahat halak pasangapkon Debata, angke diida halahi ma antong burju ni rohamunu maradopkon Jamita Na Denggan i na patorangkon Jesus Kristus na niihutkonmunu i. Mardomu muse hara ni habasaonmunu laho mambagi-bagihon sanga aha na adongmunu tu halahi bope tu sude halak na asing.