PILIPPI 2:7 - BIBEL JAMITA NA DENGGAN

⁷ Tapi ditadingkon Ia do sudena i gabe sarupa tu sada hatoban. Gabe songon jolma Ia, jana ngoluNia pe idaon laing songon jolma do.

PILIPPI 2:7 Referans Kwoze

2 KORINTUS 8:9

Angke tangkas do diboto hamu, holong situtu do roha ni Jesus Kristus Tuhanta i maradopkon hita. Na mora do Ia nian, tapi gabe marpogos do Ia hara ni hamu, anso mamora hamu hara ni hapogosonNia i.

MATEUS 20:28

Sarupa dohot Anak Ni Jolma i muse; nada na giot paolo-oloan umbaen na ro Ia, tapi na giot mangoloi do, jana dilehen Ia dope hosaNia laho paluahon bahat halak.”

JOHANNES 1:14

Jadi madung gabe sibuk do Hata i, jana maringanan di tonga-tonganta, madung taida hamuliaonNia. Songon hamuliaon ni Anak Sasada na sian Ama i, na gok asi ni roha dohot hasintongan.

SURAT NI SI PAULUS TU PARLAGUTAN ROM 8:3

Sanga aha na so tarpatupa Tona i, hara ni bako ni hajolmaonta na gale, madung dibaen Debata. Madung ditaluhon Debata do kuaso ni dosa na di bagasan bako ni jolma i, i ma markite-hite na marsuru AnakNia sandiri, na ro di bagasan pangalaho na sarupa dohot jolma pardosa, laho manyesa dosa.

GALATIA 4:4

Tapi dung dapot hatiha hadenggananna, disuru Debata ma AnakNia i tu portibi on. Na sorang sian sada dadaboru do AnakNa i jana na mangolu di toru ni Tona i.

IBRANI 4:15

Angke anggo Malim Godang i nada malim na so dohot mangkilala angka hagaleanta. Ma pola hona uji Ia di sude ragam ni pangalaho, laing songon hita; hum i tutu, nada mardosa Ia!

SURAT NI SI PAULUS TU PARLAGUTAN ROM 15:3

Harana, Kristus pe nada hasonanganNia sajo dipikirkon Ia. Songon na tarsurat, “Sude incak-incak na tu hamu, gabe tu Au do madabu.”

JESAYA 53:11

Dung abis hasusaannia idaonnia ma na torang jana puas ma pangkilalaanna. Tigor do parrohaon ni naposongKi, jana bahat do halak gabe tigor hara ni ia, ampe tusia do uhuman na tu halahi.

IBRANI 12:2

Tu Jesus ma tatatap, na manogu-nogu hita di bagasan haporsayaan, jana na maroban haporsayaanta i tu hasanggaman. Ditaonkon Ia do mate di hayu parsilang gonti ni jop ni roha na dung diparade diSia, jana juguk do Ia nuaeng di siamun ni habangsa ni Debata.

LUKAS 22:27

Ise ma he na gumodang: Halak na mangan di meja do, sanga halak na mangoloi ia? Tontu na juguk i do. Tapi anggo Au di tonga-tongamunu do gabe songon pangoloi.

SURAT NI SI PAULUS TU PARLAGUTAN ROM 15:8

Tapi on do na hudok, na gabe pangoloi ni halak Jahudi do Kristus, hara ni hasintongan ni Debata, anso dipatogu Ia janji na dung nilehenNia di angka ompunta.

PILIPPI 2:6

Anggo satutuna sarupa do Ia dohot Debata, tapi dihilala Ia nada pola angkon sai partahankononNia haDebataanNia i.

JESAYA 42:1

“Ligi, indu do naposongKu na Hutiop, naposo todoan ni rohangKu, lomo do rohangKu disia. Madung Hulehen kuasongKu tusia, laho maroban hatigoran tu angka bangso sudena.

MASMUR 22:6

Nada jolma au, tapi goya do, diincahi halak jana dipacia-cia do.

ZAKARIA 9:9

Ale boru Sion, marjop ni roha ma ho! Marolop-olop ma hamu ale pangisi ni Jerusalem! Ligi ma! Ro rajamu mardongan hamonangan! Raja na tigor do Ia na maroban haluaan. Na serep roha do Ia, jana mangalombut halode, sada halode jara-jara.

MATEUS 12:18

“Ligi ma suruanKu na Hutodo i, haholongan ni roha na pajopkon rohangKu. TuSia ma lehenonKu tondingKu, dung i jamitahononNia ma tona tu angka bangso.

IBRANI 13:3

Ingot hamu ma angka halak na tarhurung, laing songon na dohot hamu tarhurung rap dohot halahi. Dohot angka na manaon pambaenan na so patut, ingot hamu ma halahi songon na dohot hamu manaonkon na songon i.

SURAT NI SI PAULUS TU PARLAGUTAN ROM 1:3

Jamita Na Denggan taringot tu Anak Ni Debata i, i ma Tuhanta Jesus Kristus na sorang sian pomparan ni si Daud mangihutkon hajolmaon,

MARKUS 9:12

Dialusi Jesus ma, “Tutu do i nian, angkon jolo ro do si Elia laho paradehon nasa na porlu. Tapi tarbia ma pangalahona taringot tu Anak Ni Jolma i? Biasi tarsurat di Buku Na Badia i angkon bahat taononNia parkancitan jana dipalayas halak Ia?

ZAKARIA 3:8

Tangihon ma, ale Malim Godang Josua, dohot hamu ale angka malim na asing, hamu ma da na songon gambaran ni hatiha hasonangan na giot ro. PatidahononKu ma di hatiha i naposongKu i ma Sada Tunas.

DANIEL 9:26

Di ujung ni hatiha i hona bunu ma pamimpin na nitodo ni Debata i, hape nada adong nian salania. Jadi ro ma tentara ni sada raja na gogo, sego-segoonnia ma kota Jerusalem dohot Bagas Ni Tuhan i. Ro ma hatiha parujungan i songon aek na magodang na maroban porang dohot hasegoan, laing songon na nisangkapkon ni Debata.

JESAYA 49:3

Didok Ia tu au, “Ho ma da naposongKu, Israel, hara ni ho, patuduhononKu ma hagodanganKu.”

2 KORINTUS 13:4

Nian anggo dompak na niparsilangkon i Ia, gale do Ia tutu, hape anggo saonnari mangolu do Ia hara ni kuaso ni Debata. Hami pe gale do di bagasan Ia, tapi angkon mangolu do hami rap dohot Ia salaho tu hamu hara ni kuaso ni Debata.