PARJAMITA 12:1 - BIBEL JAMITA NA DENGGAN

¹ Ingot ma Na Manompa ho taran di haposoonmu, painte so dapot angka taon na gok hasusaan. Anggo di hatiha i dokkononmu ma, “Nada martua ngolungku.”

PARJAMITA 12:1 Referans Kwoze

ANDUNG 3:27

Angke denggan do i marsiajar anso sobar taran di haposoon dope iba.

PARJAMITA 11:8

Dokkon ma tarimakasi muda martamba umurmu. Tapi ingot ma, haru lolot pe ho mangolu di tano on, lumolot dope ari-arimu di bagasan hamatean. Jadi, aha dope lakna siaropon ni rohanta? Parcuma do sudena i jana magopo.

PODA 22:6

Ajarkon ma tu na poso parngoluon na pajop roha ni Tuhan, gabe songon i ma ngolunia sapanjangna.

LUKAS 18:16

Tapi dipio Jesus ma angka jolma i didok Ia ma tu halahi, “Padiar hamu ma marroan angka dakdanak i tu Au! Ulang larang hamu halahi, angke halak sisongon on ma na gabe anggota ni Harajaan Ni Debata.

MASMUR 34:11

Tangihon ma, sude hamu angka dakdanak, huajari hamu pasangapkon Tuhan.

2 TIMOTEUS 3:15

Ingotonmu do, mamungka sian hamenehanmu dope madung ditanda ho Buku Na Badia i. Ditorangi Buku Na Badia i do rohamu laho mangastui anso maruli haluaan ho sian na mangkaporsayai Kristus Jesus.

MASMUR 90:10

Hum pitu pulu taon do lolot ni ngolunami, lalu salapan pulu taon muda margogo hami. Tapi hum hasusaan dohot hamaolon do na dapot hami, dung salpu ngolu na pendek i, mago ma hami.

PARJAMITA 11:10

Paorot ma ganggu dohot susa sian rohamu, angke tibu do salpu haposoonmu.

PODA 8:17

Huhaholongi do na marholong ni roha di au; na manjalahi au, gabe dapot ia do au.

2 SAMUEL 19:35

Ma marumur au salapan pulu taon jana nada adong be na pasonangkon di au. Nada huboto be daina sanga aha na hupangan sanga na huinum i, jana nada hubege be sora ni angka parende. Hum boban sajo noma au di raja i.

1 SAMUEL 2:26

Tapi anggo si Samuel dakdanak i, mur magodang ma ia boti mur pajop roha ni Tuhan bope roha ni jolma sudena.

PAMUNGKAAN 39:2

Didongani Tuhan do si Josep, gabe sai manjadi do sude karejonia. Di bagas ni tuannia i do ia tinggal, i ma halak Mesir i.

LUKAS 1:15

Gabe halak na godang do dakdanak i mangihutkon parnidaan ni Tuhan. Nada tola ia minum anggur, sanga siinumon na koras. Mamungka di bortian dope ia, Tondi Parbadia do mangarajai ia.

1 SAMUEL 16:7

Tapi didok Tuhan ma tu si Samuel, “Ulang marguru ho di ginjang ni pamatang dohot di jogi ni rupana; nada i por ni rohangKu. Nada songon parsuhat ni jolma parsuhatKu. Anggo jolma siida rupa do, tapi anggo Au marnida roha do.”

PAMUNGKAAN 39:23

Nada pola porlu be anto-antoan ni kapala ni hurungan i sandok karejo na nipasahat tu si Josep, dibaen Tuhan do mandongani ia gabe manjadi ma sude karejonia i.

EPESUS 6:4

Hamu angka dongan na dung mardakdanak! Ulang ma baen hamu na so patut tu dakdanakmunu anso ulang gabe muruk halahi. Tapi gumonan do ajari hamu halahi di aturan dohot pangajaran ni Tuhan.

DANIEL 1:17

Dilehen Debata ma tu doli-doli na opat i bisuk dohot hamaloon di parbinotoan taringot tu hata dohot ragam ni angka surat. Tambani i dilehen Ia muse do tu si Daniel hamaloon laho patorang parnidaan dohot nipi.

JESAYA 26:8

Hami patulus do giotMu, ale Tuhan, hum Ho sajo do haposannami dohot lungun ni rohanami.

1 SAMUEL 2:18

Anggo si Samuel anak ni si Hanna i, dipupu ia do mangoloi Tuhan. Mamake baju efod do ia na dibaen sian abit linen, songon baju parkobas ni angka malim.

1 RAJA-RAJA 18:12

Muda kehe au sian on, mungkin do obanon ni Tondi Ni Tuhan amang tu inganan na so huboto! Jana muda hupaboa tu si Ahab na dison amang, hape nada marsuo ia tu amang, tontu bunuonnia ma au, haru pe na marsitutu au na maribadat i tu Tuhan sian na menek.

1 SAMUEL 1:28

Jadi hara ni i, hupasahat ma dakdanak on tu Tuhan anso gabe Ia nampunasa salolot mangolu.” Dung i marsomba ma halahi tu Tuhan.

HOSEA 7:9

Hape na so pamotoan ni halahi, mago do hagogoan ni halahi hara ni hasadaan ni tahi ni halahi dohot angka bangso-bangso i. Donok noma ajal ni halahi, hape nada diboto halahi.

JOB 30:2

Na so marguna do halahi di iba hara ni na dung abis gogona.

1 RAJA-RAJA 14:13

Marsiluluton ma sude rayat ni Israel jana kuburkonon ni halahi ma ia. Hum sasada ia sajo ma sian pomparan ni si Jerobeam na marsangap dikuburkon, angke hum sasada ia ma i na tumbuk di roha ni Tuhan, Debata ni halak Israel i.

PANGARATAION 8:18

Ingot hamu ma! Tuhan Debatamunu i do na mambaen mamora hamu. Patunda ni na laing setia do Ia lalu tu sadari on tu janji na nibaenNia dohot ompumunu umbaen na dipatupa Ia na songon i.

NEHEMIA 4:14

Di na huida mabiar rayat i, hudok ma tu halahi dohot tu angka hatobangon maradu tu angka pamimpin, “Ulang hamu mabiar mida musu! Tuhan na gogo jana na markuaso i ma ingot hamu, jana parjuangkon hamu ma angka kahanggimunu, angka dakdanak, dongan saripe dohot bagasmunu!”

MASMUR 63:6

Di na payak au di podoman, huingot do tu Ho; sasaborngin sai huhalungunkon do Ho,

MASMUR 119:55

Huingot do Ho muda borngin, ale Tuhan, sai hutiop do tongtong TonaMu.

PARJAMITA 11:2

Lehenma bagian i tu pitu sanga tu salapan halak, angke porlu do jamot-jamot halak, painte so masa hasusaan.

2 SAMUEL 19:36

Nada patut au manjagit upa na songon i godangna. Hum manaruhon raja i nada pala saotik nari tu bariba ni Batang aek Jordan on sajo noma lungun ni rohangku.