PANGARATAION 28:52 - BIBEL JAMITA NA DENGGAN

⁵² Porangan ni halahi ma ganop kota na adong di tano na giot silehenon ni Tuhan Debatamunu i di ho; matolbak ma angka tembok ni kota na nipatogu jana na nipangasahonmunu i.

PANGARATAION 28:52 Referans Kwoze

MATEUS 22:7

Dung dibege raja i na songon i, muruk sajo ma ia. Gabe disuruhon ia ma tentarania mambunu angka sibunu jolma i dohot manyurbu kota ni halahi.

ZAKARIA 14:2

Palaguton ni Tuhan ma sandok bangso laho mamorangi Jerusalem. Taluhononna ma kota i, jana dirampasi angka bagasna i, jana angka dadaboru na disi paksaonna marmainan. Satonga sian halak kota i obanonna tu habuangan, tapi anggo na asing i tading do di kota i.

ZAKARIA 12:2

“BaenonKu ma Jerusalem songon piala na marisi anggur; inumon ni angka luat na hombar balokna ma i jana lenong-lenong halahi songon na mabuk. Jana muda hona hobuk Jerusalem, angka kota na tading i pe di Juda laing hona hobuk muse ma.

DANIEL 9:26

Di ujung ni hatiha i hona bunu ma pamimpin na nitodo ni Debata i, hape nada adong nian salania. Jadi ro ma tentara ni sada raja na gogo, sego-segoonnia ma kota Jerusalem dohot Bagas Ni Tuhan i. Ro ma hatiha parujungan i songon aek na magodang na maroban porang dohot hasegoan, laing songon na nisangkapkon ni Debata.

JEREMIA 37:8

Jadi ro muse ma halak Babel mangulahi manyerang kota on lalu manaluhon dohot manyurbusa.

JEREMIA 10:18

Danggurkonon ni Tuhan ma hamu tu habuangan; abiskononNia noma hamu. I ma parenta ni Tuhan.

JESAYA 62:8

Marhite sumpa Tuhan madung marjanji, hara ni kuasoNia pasti do manjadi: “Nada be panganon ni musumu sian gandummu, halak na asing nada be inumonna anggurmu.

JESAYA 1:7

Madung disego-sego sude luat ingananmu; angka kotamunu pe madung disurbu. Laing di jolo ni matamu dibuat halak na asing tanomu lalu disego-sego sudena.

2 RAJA-RAJA 18:13

Di taon paopat bolaskon dung mamarenta Raja Hiskia, diporangi si Sanherib raja ni Asur ma angka kota na marbenteng di Juda lopus ditaluhon.

HAMALIMON 26:25

ParoonKu ma parporangan laho manguhum hamu, angke madung dilaosi hamu aturanKu, dung i muda marlagut hamu di kotamunu manjalahi paronding-ondingan, paroonKu ma tu hamu nyae na so haubatan gabe tunduk hamu tu musumunu.

PANGARATAION 28:51

Pangabison ni halahi ma pahan-pahanan dohot suha ni ladangmunu. Saotik pe nada adong tadingkonon ni halahi sian gandum, aek ni anggur, miak zetun, lombu sanga hambengmunu lopus mate tangkuraparon ho.

2 RAJA-RAJA 6:29

Jadi gabe hami lompa ma anakki jana hami pangan. Ancogotna i, hupangido ma anso hami lompa anaknia i, hape ditabunihon ia!”

JEREMIA 10:17

Hona hobuk do hamu halak na maringanan di Jerusalem! Antong marhobas ma hamu!

ANDUNG 2:2

Ganop kota na adong di Juda, dironcohon Ia nada adong ibo ni roha. Angka benteng na mangondingi luat i dionjarkon Ia lopus marumpahi. Didabuhon Ia lopus marbile noma harajaan i dohot angka pamimpinna.