PANGARATAION 27:25 - BIBEL JAMITA NA DENGGAN

²⁵ ‘Bura ni Debata ma di halak na manjagit sogok laho mamunu sada halak na so marsala.’ Dung i sude ma bangso i mandok: ‘I ma tutu!’

PANGARATAION 27:25 Referans Kwoze

MASMUR 15:5

jana painjamkon hepeng so marbunga; na so giot manjagit hepeng suap laho mangarugi i halak na so marsala. Halak na mambaen songon i tongtong sonang nada adong manyusai.

PANGARATAION 10:17

Di ginjang ni sude debata do Tuhan Debatamunu i jana Tuhan ni sasudena tuan, Debata na tongam jana na markuaso do Ia jana angkon nioloan. Nada ra Ia marpihak jana nada ra muse Ia manjagit sisip.

PANGARATAION 16:19

Di na mambuat haputusan, nada tola halahi mambaen roha-rohana sanga na teleng sabola. Nada tola muse halahi manjagit sisip angke mambaen mapitung do angka silua, bope di halak na bisuk dohot na tigor, lopus gabe dibaen halahi haputusan na sala.

BAENON NI ANGKA RASUL 1:18

Anggo si Judas on, madung dapot ia tano kuburannia upa ni hajahatannia na manghianat i. Madabu ma ia jana mate, mapultak butuhana i gabe sarge sude na di butuhana i.

MATEUS 26:15

Didok ia ma tu halahi, “Aha ma lehenonmunu di au muda hupasahat Jesus tu hamu?” Dung i dietong halahi ma tolu pulu hepeng perak. Dilehenkon halahi ma hepeng i tusia.

HAMALIMON 19:16

Ulang sai dokkon barita-barita gabus sanga tu ise pe. Muda marguru di parkaro ni sada-sada halak noma ngoluna sanga hamamatena hatiha ditimbang parkarona i, mangkuling ma ho muda tarbaen hasaksianmi mangurupisa. Au do Tuhan.

HAKIM-HAKIM 9:24

Tarjadi pe pangalaho on, anso marbalos do hajahatan ni si Abimelek dohot angka halak Sikem na manjajang ia anso mambunu angka anak ni si Gideon na pitu pulu halak i.