PANGARATAION 17:19 - BIBEL JAMITA NA DENGGAN

¹⁹ Angkon simpanonnia do buku i di lambungnia jana angkon siseonnia do i salolot mangolu ia, anso marsiajar ia manghabiari Tuhan jana mardongan haburjuon oloannia sude parenta na nisurat di bagasan buku i.

PANGARATAION 17:19 Referans Kwoze

JOSUA 1:8

Parrohahon ma denggan anso sai tongtong disise buku niuhum i ganop maribadat hamu. Parsiajari ma buku i arian dohot borngin jana dalankon ma sude na tarsurat di bagasan buku i ulang parlayas. Muda dipatulus ho sudena i, sonang ma ngolumu jana maruntung.

MASMUR 1:2

tapi na ringgas patuluskon Tona Ni Tuhan, jana na pahusor-husorkon di bagasan rohana arian dohot bornginna.

JOHANNES 5:39

Diparsiajari hamu do nian Buku Na Badia i angke dipikir hamu dapot hamu ma hangoluan na so mantak i muda dung diparsiajari hamu i. Jana Buku Na Badia i sandiri pe disaksihon i do taringot tu Au!

PANGARATAION 11:18

Sai paingot-ingot hamu ma angka parentaNa i jana haholongi hamu. Tambatkon ma i di tanganmunu jana lilitkon di bohimu baen parningotan.

PANGARATAION 4:10

taringot tu ari i di na jongjong hamu di adopan ni haroan ni Tuhan Debatamunu di Dolok Sinai. Didok Ia do di hatiha i tu au, ‘Palagut ma bangso i. GiotKu anso ditangihon hamu sanga aha na giot sidokkononKu, anso marsiajar halahi marpangoloion tu Au sapanjang mangolu halahi jana anso diajari halahi angka dakdanak ni halahi marpangoloion tu Au.’

PANGARATAION 4:9

Parrohahon jana denggan ingot hamu, anso ulang lupa hamu sapanjang mangolu di sude na nisaksihonmunu sandiri. Baritahon hamu ma i di pomparanmunu,

PANGARATAION 5:1

Dipalagut si Musa ma sude bangso Israel jana didok ia ma tu halahi, “Dongan sabangso, tangihon hamu ma sude aturan na giot silehenonku tu hamu sadari on. Parsiajari hamu ma angka aturan i jana haburjuhon hamu ma mangoloisa.

2 RAJA-RAJA 22:10

Dipatidahon si Safan ma buku na nilehen ni si Hilkia i tusia jana didok ia ma, “Sian si Hilkia do on.” Lalu disise ia ma buku i di raja i.