PANGARATAION 14:22 - BIBEL JAMITA NA DENGGAN

²² “Ganop taon angkon paindingonmunu do saparsampulu ni sude suha ni sabamunu.

PANGARATAION 14:22 Referans Kwoze

NEHEMIA 10:37

Obanonnami ma tu angka malim di Bagas Ni Tuhan adonan na sian gandum na parjolo disabi ganop taon, songon i muse angka haul na asing songon anggur, miak zetun dohot ragam-ragam ni parbatu ni suan-suanan. Obanonnami ma haul parsampuluan sian suha ni ladangnami tu angka halak Levi na palagut angka haul parsampuluan di hutanami be.

PANGARATAION 12:17

Nada tola sanga na aha pe panganonmunu di bagas ingananmunu sian sude na nihaulkonmunu tu Tuhan: Haul parsampuluan sian gandummunu, anggurmunu, miak zetunmunu, lombu sanga biri-birimunu na parjolo sorang, haul panggarar ni haulmunu, haul sian na nionjar ni rohamunu, sanga hasil na asing pe.

PANGARATAION 12:6

Angkon tu inganan i ma obanonmunu angka haul situtungon dohot angka haul na asing, haul parsampuluan maradu angka haul na asing, haul panggarar ni haulmu haul sian na nionjar ni rohamunu dohot lombu sanga biri-biri na parjolo sorang.

BILANGAN 18:21

Didok Tuhan ma tu si Harun, “Saparsampulu sian sude na nilehen ni halak Israel di Au, madung Hulehen di halak Levi. On ma upa ni halahi pature-ture Bandar ParmiananKu.

PAMUNGKAAN 28:22

Jana lehenonku ma di Ho saparsampulu ni sandok na nilehenMu di au. Batu parningotan, na hupajongjong on, gabe inganan parsombaan tu Ho ma i.”

BILANGAN 15:20

Muda ditutung hamu roti sian gandum na parjolo disabi, roti na parjolo angkon haulkononmunu gabe haul hapunjungan tu Tuhan. Pangalaho ni na giot manghaulkon i dos dohot pangalaho di na manghaulkon gandum parjolo na nigilingmunu.

MALEAKI 3:10

Oban hamu ma parsampuluanmunu i tu BagasKu anso adong disi mardapot-dapot sipanganon. Uji hamu ma Au, jadi gabe idaonmunu ma Huungkap angka pintu ni banua ginjang jana pagukguhonKu sandok na denggan tu hamu, ninna Tuhan Na Markuaso.

PAMUNGKAAN 47:24

Muda sabion, angkon mangalehen ma hamu tu raja i saparlima ni suhana i. Lobina i ma sipakeonmunu gabe same dohot panganonmunu dohot keluargamunu.”

PAMUNGKAAN 47:26

Jadi dipahot si Josep ma pangalaho i gabe aturan ni Luat Mesir; saparlima sian suha ni karejo angkon gabe raja nampunasa. Lopus saonnari laing mardalan do aturan i. Hum tano ni malim ma i na so raja nampunasa.

BILANGAN 18:31

Na lobi i tola ma panganonmu dohot hamu sabagas sanga di dia sajo, angke i ma upamunu hara ni na marhobas ho di Bandar ParmiananKu.

NEHEMIA 10:38

Tapi angkon donganan ni malim na sian pomparan ni si Harun do angka halak Levi i muda palagutkon angka haul i halahi. Jana angkon obanon ni angka halak Levi i do saparsampulu ni sude haul i tu angka kamar talobat na di Bagas Ni Tuhan.